ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އަރިއަތޮޅު އުތުރުބުރީގެ ދެ ރަށަކަށް މާދަމާ ވަޑައިގަންނަވަން ނިންމަވައިފިއެވެ.
ރައީސް އޮފީހުން މިއަދު ބުނީ ރައީސް ޞާލިޙު މާދަމާ ވަޑައިގަތުމަށް ހަމަޖެހިފައިވަނީ، އއ.އުކުޅަހަށާއި، އެއަތޮޅު ފެރިދޫއަށް ކަމަށެވެ.ރައީސްގެ މި ދަތުރުފުޅަކީ، ދުނިޔޭގެ އިންސާނީ ހައްޤުތަކުގެ ދުވަހާއި، ރާއްޖޭގެ މަސްވެރިގެ ދުވަހުގެ މުނާސަބަތުގައި ކުރައްވާ ދަތުރުފުޅެކެވެ.
ރައީސްގެ މި ދަތުރުފުޅުގައި އެ ދެރަށަށް ވަޑައިގެން ރަށުގެ ރައްޔިތުނާއި، ސަރުކާރުގެ މުއައްސަސާތަކާއި އިދާރަތަކާއި އަދި ވިޔަފާރިވެރިންނާ ބައްދަލުކުރައްވާ ވާހަކަފުޅު ދެއްކެވުމަށް ހަމަޖެހިފައިވެއެވެ. ރައީސްގެ މި ދަތުރުފުޅުގައި އަދި އުކުޅަހުގެ ކައުންސިލްގެ ވެބްސައިޓްވެސް ލޯންޗުކޮށްދެއްވާނެއެވެ.
ރައީސުލްޖުމްހޫރިއްޔާ އއ.ގެ ދެ ރަށަށް ކުރައްވާ މި ދަތުރުފުޅަކީ ރައީސްކަމާއި ހަވާލުވެވަޑައިގެންނެވުމަށްފަހު ކުރައްވާ ދެވަނަ ދަތުރުފުޅެވެ. އެމަނިކުފާނު އެންމެ ފުރަތަމަ ވަޑައިގެންފައިވަނީ ކ. ދިއްފުށްޓަށެވެ.