މާލެއަށް އިއްޔެ ކުރި ވިއްސާރައިގެ ސަބަބުން ގެއްލުން ލިބުނު ފަރާތްތަކަށް އެހީތެރިވުމުގެ ގޮތުން މަޝްހޫރު ވިޔަފާރި ކުންފުނި ޔުނިވަރސަލް އެންޓަރޕްރައިސަސްގެ ފަރާތުން 3 ލައްކަ ރުފިޔާ ހަދިޔާކޮށްފިއެވެ.
ނެޝެނަލް ޑިސާސްޓަރ މެނޭޖްމަންޓް ސެންޓަރުގައި ބޭއްވި ރަސްމިއްޔާތެއްގައި ޔުނިވަރސަލްގެ މި ފައިސާގެ އެހީއާއި ހަވާލުވެވަޑައިގަތީ ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދުދީދީއެވެ.
މި އެހީއާއި ހަވާލުވެވަޑައިގަތުމަށްފަހު މީޑިއާއަށް މަޢުލޫމާތުދެއްވަމުން ޑިފެންސް މިނިސްޓަރ މާރިޔާ ވިދާޅުވީ، ގުދުރަތީ މިފަދަ ކާރިސާތަކުން އަރައިގަތުމުގައި ދަޢުލަތުގެ ބަޖެޓުންނާއި އާއްމު ރައްޔިތުންގެ ޖީބުން ބޮޑު ޚަރަދުތަކެއް ކުރަންޖެހޭއިރު، އާއްމު ފަރާތްތަކާއި، ވިޔަފާރި ކުންފުނިތަކުން ލިބޭ މިފަދަ އެހީތަކުގެ މަޢުލޫމާތަކީ މީޑިއާތަކާއި ހިއްސާކުރުން މުހިއްމު މަޢުލޫމާތުތަކެއްކަމަށް ދެކެވަޑައިގަންނަވާކަމަށެވެ. އަދި މިފަދަ އެހީއިން ފައިސާ ޚަރަދުކުރާގޮތުގެ މަޢުލޫމާތު އެން.ޑީ.އެމް.ސީގެ ފަރާތުން ހާމަކުރައްވާނެކަމަށާއި، މިފަދަ އެހީތަކަކީ ފާހަގަކުރަންޖެހޭ ކަންކަންކަމަށް މިނިސްޓްރ ވިދާޅުވިއެވެ.
މި އެހީއާ ގުޅޭގޮތުން ވާހަކަދައްކަމުން ޔުނިވަރސަލް ފައުންޑޭޝަންގެ ރައީސް އިޔާޒް ވަހީދު ވިދާޅުވީ، ކާރިސާގެ މި ދަނޑިވަޅުގައި ރައްޔިތުންނަށް އެހީތެރިކަމުގެ އަތެއް ދިށްކޮލުމުގެ ފުރުޞަތު ލިބުމަކީ ލިބޭ އުފަލެއްކަމަށާއި، މިފަދަ ކަންކަމުގައި އެހީތެރިކަން ފޯރުކޮށްދިނުމަށް އެކުންފުނިން އަބަދުވެސް ތައްޔާރަށް އޮތްކަމަށެވެ.
މާލޭގައި ފެންބޮޑުވުމުގެ ސަބަބުން ލިބުނު ގެއްލުންތަކުން އަރައިގަތުމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރާއި ޤައުމީ ދިފާޢީ ބަރާއި ކަމާ ގުޅުންހުރި ފަރާތްތަކުން ކުރަމުންދާ މަސައްކަތަށް އެހީވުމަށް ސަރުކާރު ހިއްސާވާ ކުންފުނިތަކާއި، ބައެއް އަމިއްލަ ފަރާތްތަކުންވެސް ދަނީ އެހީތެރިކަން ފޯރުކޮށްދެމުންނެވެ.