ޕެސިފިކް ކަނޑުގައި އޮންނަ ނިއު ކެލެޑޯނިއާގެ އައްސޭރިފަށަށް އައި ބިންހެލުމުގެ ސަބަބުން އުފެދޭނެކަމަށް ބެލެވޭ ސުނާމީގެ އަސަރު ރާއްޖެއަށް ނުކުރާނެކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.
ނިއު ކެލެޑޯނިއާގެ 155 ކިލޯމީޓަރު ބޭރުން ކަނޑުގެ 10 ކިލޯމީޓަރުގެ އަޑިއަށް އައި 7.5 މެގްނިޓިއުޑްގެ ބާރުގަދަ ބިންހެލުމުގެ ސަބަބުން ޕެސިފިކް ކަނޑުގެ ނިއު ކެލެޑޯނިއާ އާއި ވެނަޓުއާއަށް ސުނާމީއެއް އަރާފާނެކަމުގެ އިންޒާރު ޕެސިފިކް ސުނާމީ ވޯނިންގ ސެންޓަރުން ދީފައިވެއެވެ. ނަމަވެސް މި ބިންހެލުމުގެ ސަބަބުން މާ ބޮޑު ގެއްލުންތަކެއް ލިބިފައިވާކަމުގެ މަޢުލޫމާތު ލިބިފައިނުވާކަމަށް އެ ޤައުމުގެ ކަމާބެހޭ ފަރާތްތަކާ ހަވާލާދީ ބައިނަލްއަޤްވާމީ މީޑިއާތަކުން ރިޕޯޓުކޮށްފައިވެއެވެ.
ނިއު ކެލެޑޯނިއާ ކައިރިއަށްއައި ބިންހެލުމުގެ ސަބަބުން ސުނާމީއެއް އުފެދުނުނަމަވެސް، އެ ސުނާމީގެ އަސަރު ރާއްޖެއަށް ނުކުރާނެކަމަށް މޫސުމާބެހޭ ޤައުމީ އިދާރާއިން ބުނެއެވެ.
މި ބިންހެލުމުގެ ސަބަބުން އުފެދިދާނެ ސުނާމީއަކުން ލިބިދާނެ ގެއްލުންތަކުން ރައްކާތެރިވުމަށްޓަކައި އައްސޭރިފަށުގެ ސަރަޙައްދުތަކުގައި ދިރިއުޅޭ ރައްޔިތުން 300 މީޓަރު ދުރު އަދި ކަނޑުގެ ލޮނުގަނޑަށްވުރެ 12 މީޓަރު އުސް ސަރަޙައްދުތަކަށް ހިޖުރަކޮށް، ރައްކާތެރިކަމުގެ ފިޔަވަޅު އެޅުމަށް އެ ޤައުމުގެ ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.