ޕަބްލިކް ސާރވިސް މީޑިއާ ޕީއެސްއެމުން ވަކިކުރި ދެ މުއްޒަފަކަށް ވަޒީފާ އަލުން އަނބުރާދީ ލިބެންޖެހޭ މުސާރައާއި އިނާޔަތްތައް އެ މުވައްޒަފުންނަށް ދިނުމަށް ވަޒީފާއާއި ބެހޭ ޓްރައިބިއުނަލުން ޕީއެސްއެމަށް އަމުރުކޮށްފިއެވެ.
ވަޒީފާ އަލުން ދިނުމަށް އަމުރުކޮށްފައިވާ ދެ މުވައްޒަފުންނަކީ ޑިރެކްޓަރ ކޭބަލް ޓީވީ އޮޕަރޭޝަންގެ މަޤާމު ހުއްޓާ ވަޒީފާއިން ވަކިކުރި އިސްމާއިލް އައިމަންއާއި ފައިނޭޝަލް ކޮންޓްރޯލާރގެ މަޤާމުގައި ހުއްޓާ ވަޒީފާއިން ވަކިކުރި ފަހުމީ ހަސަންއެވެ.
އައިމަން ވަޒީފާއިން ވަކިކޮށްފައިވަނީ އޭރު އޭނާ އަދާކުރަމުންދިޔަ ޑިރެކްޓަރ ކޭބަލް ޓީވީ އޮޕަރޭޝަންގެ މަޤާމު 13 މާރޗް 2018ގައި އުވާލުމަށްފަހުއެވެ. އަދި ފަހުމީ ރަޝާދު ވަޒީފާއިން ވަކިކޮށްފައިވަނީ، އޭނާ އަދަކުރަމުންދިޔަ ފައިނޭޝަލް ކޮންޓްރޯލާރގެ މަޤާމު އުވާލުމަށްފަހުއެވެ.
މި ދެ މުވައްޒަފުންގެ މައްސަލަ ނިންމާ ޓްރައިބިއުނަލް އިއްވި ހުކުމްގައި ބުނެފައިވަނީ މި ދެ މުވައްޒަފުންގެ މަޤާމުން ވަކިކޮށްފައިވަނީ ޤާނޫނާއި ހިލާފަށްކަމަށެވެ.
ޓްރައިބިއުނަލުން ނިންމި ނިންމުމުގައި ވަނީ އިސްމާޢީލް އައިމަން ޙަސަން، 19 މޭ 2013 އިން ފެށިގެން ޕީއެސްއެމްގައި ވަޒީފާ އަދާކުރަމުން ދަނިކޮށް އެއްވެސް ނޯޓީހެއް ދިނުމަކާނުލާ 13 މާރޗް 2018 އަށް އޭނާ އަދާކުރަމުންދިޔަ މަޤާމު އުވާލާފައިވަނީ ޤާނޫނާ ޚިލާފަށްކަމަށެވެ. އަދި އޭނާއަށް ލިބެންޖެހޭ މުސާރައާއި ޢިނާޔަތްތަކަށްވާ ބާވީސް ހާސް ތިންސަތޭކަ ރުފިޔާ މިއަދުން ފެށިގެން ތިރީސް ދުވަހުގެ ތެރޭގައި ދިނުމަށްވެސް ޕީއެސްއެމްގެ މައްޗަށްވަނީ އަމުރުކޮށްފައެވެ.
04 އޭޕްރީލް 1979 ވަނަ އަހަރުން ފެށިގެން ދިވެހިރާއްޖޭގެ އަޑާއި، ޓެލެވިޒަން މޯލްޑިވްސްގައި މަސައްކަތްކޮށް، ޕީއެސްއެމް އުފެދުނީއްސުރެ މަސައްކަތްކުރަމުންދިޔަ ފަހުމީ ރަޝާދަކީވެސް، އެއްވެސް ޙާލެއްގައި ވަޒީފާއިން ވަކިވެފައިވާ މީހެއްކަމުގައި ނުބަލާ، މިހާތަނަށް ލިބެންޖެހޭ މުސާރައާއި ޢިނާޢަތްތަކަށްވާ ސާޅީސް ނުވަހާސް ރުފިޔާ އެކީ އެއްފަހަރާ 30 ދުވަހުގެ ތެރޭގައި ދިނުމަށްވެސް ޕީއެސްއެމްގެ މައްޗަށް ވަޒީފާއާއި ބެހޭ ޓްރައިބިއުނަލުން ވަނީ ޢަމުރުކޮށްފައެވެ.