38 ވަނަ މަސްވެރިންގެ ދުވަސް ހުވަދުއަތޮޅު އުތުރުބުރީ ގެމަނަފުށީގައި ރަސްމީކޮށް ފާހަގަކުރުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން ނިންމައިފިއެވެ.
މިއަހަރުގެ މަސްވެރިންގެ ދުވަސް ގެމަނަފުށީގައި ފާހަގަކުރުމަށް ސަރުކާރުން ނިންމާފައިވާއިރު، މިދިޔަ ނޮވެމްބަރ މަހުގެ 30 ވަނަ ފިޝަރީޒް މިނިސްޓަރ ޒަހާ ވަހީދު ވަނީ ހުވަދުއަތޮޅު އުތުރުބުރީ ގެމަނަފުއްޓާއި، ވިލިގިއްޔަށް ދަތުރުފުޅެއް ކުރައްވާފައެވެ. އެކަމަނާގެ މިދަތުރުފުޅުގައި ގެމަނަފުށީ ކައުންސިލް މެމްބަރުންނާއި، މަސްވެރިންގެ އިތުރުން ދަނޑުވެރިންނާއި ބައްދަލުކުރައްވާފައިވެއެވެ.
ގއ. ގެމަނަފުއްޓަކީ މަސްވެރިކަމުގެ ދާއިރާގައި ރާއްޖެއިން ފާހަގަކުރެވޭ ރަށެކެވެ. ގިނަ އަދަދެއްގެ މަސްވެރިން ނިސްބަތްވާ ގެމަނަފުށީގެ މުޅި އިޤްތިޞާދު ބިނާވެފައިވަނީ މަސްވެރިކަމުގެ މައްޗަށެވެ. އެގޮތުން މަސްވެރިކަން ކުރި އެރުވުމާއި މަސްވެރިންގެ އަގު ވަޒަން ކުރުމުގެ ގޮތުން މިއަހަރުގެ މަސްވެރިންގެ ދުވަހާ ގުޅިގެން ގިނަ ހަރަކާތްތަކެއް ކުރިއަށްގެންދިއުމަށް ގެމަނަފުށި މަސްވެރިންގެ ޖަމިއްޔާއިންވެސް ވަނީ ނިންމާފައެވެ.
މަސްވެރިންގެ ދުވަހުގެ ގޮތުގައި ޑިސެމްބަރުމަހުގެ 10 ވަނަ ދުވަސް ރާއްޖޭގައި ފާހަގަކުރަން ފެށީ 1981 ވަނަ އަހަރުން ފެށިގެންނެވެ. މިދިޔަ އަހަރު މަސްވެރިންގެ ދުވަސް ރަސްމީކޮށް ސަރުކާރުން ފާހަގަކޮށްފައިވައިވަނީ ހއ. އިހަވަންދޫގައެވެ.
ރާއްޖޭގެ އިޤްތިޞާދު ހަރުދަނާކުރުމަށް ކުރާ މަސައްކަތުގެ ދަށުން މަސްވެރިކަމުގެ ސިނާޢަތް ފުޅާކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މެނިފެސްޓޯގައި ޙާއްސަ އަހައްމިއްޔަތުކަމެއްދީފައިވާ ސިނާޢަތަކެވެ. އެގޮތުން މަސްވެރިންނަށް ނުދެވި ހުރި ފައިސާ ދިނުމަށް މިފްކޯއަށް 37 މިލިޔަން ރުފިޔާ ސަރުކާރުން ދާދިފަހުން ހަމަޖައްސައިދެއްވާފައިވެއެވެ.