ނުހައްގުން މުއްސަނދިވުން ހުއްޓުވުމަށް، ރައްޔިތުންގެ މަޖިލިހަށް ޤާނޫނެއް ހުށައެޅުމަށް ސަރުކާރުން ނިންމައިފިއެވެ. މި ޤާނޫނު ކުރިއަށް އޮތް ދެމަސްދުވަހުގެ ތެރޭގައި ރައްޔިތުންގެ މަޖިލީހަށް ހުށަހަޅާނެކަން ސަރުކާރުން ހާމަކޮށްފައިވަނީ، މިސަރުކާރުގެ ފުރަތަމަ ސަތޭކަ ދުވަހުގެ ތެރޭގައި ކުރުމަށް ކަނޑައަޅާފައިވާ ކަންކަމުގެ ތެރޭގައެވެ.
ރާއްޖޭގެ ސިޔާސީ މަޤާމުތަކުގައި ތިއްބަވާ ފަރާތްތަކާއި، ދައުލަތުގެ އިސްމަޤާމުތަކުގައި ތިއްބަވާ ފަރާތްތަކުގެ މާލީ ޙާލަތު ދެނެގަނެވޭނެ ގޮތެއް ނެތްކަމަށްބުނެ ބައެއް ފަރާތްތަކުން ކަންބޮޑުވުން ފާޅުކުރަމުން އަންނައިރު، ނުހައްގު މުއްސަނދިވުން ހުއްޓުވުމަށް ޤާނޫނެއް އެކުލަވާލުމަކީ ރައީސް އިބްރާހީމް މުޙައްމަދު ޞާލިޙްގެ ރިޔާސީ ވަޢުދުފުޅެކެވެ.
މީގެ އިތުރުން، ސަރުކާރުގެ އިދާރާތަކާއި ދައުލަތުގެ ކުންފުނިތަކަށް މިނިވަން މުއައްސަސާތަކަށް ޢައްޔަންކުރާ ހުރިހާ ފަރާތްތަކުންވެސް، އެމީހުންގެ އަނބިނާއި، ފިރިންގެ މުދަލާއި މާލީ ބަޔާން ހާމަކުރުމާއި، ޤަވާޢިދުން ރިވިއުކުރުމަށްވެސް ސަރުކާރުން ސަތޭކަ ދުވަހުގެ ތެރޭގައި ކުރަން ނިންމާފައިވާ ކަންކަމުގެ ތެރޭގައި ހިމަނާފައިވެއެވެ.
މީގެ އިތުރުން ކޮރަޕްޝަން ހުއްޓުވުމަށް ސަރުކާރުން ކުރަން ނިންމާފައިވާ ކަންކަމުގެ ތެރޭގައި، ޢާންމުންނަށް ޚިޔާލުހުށައެޅުމަށް ފުރުސަތު ދިނުމާއި، ކޮރަޕްޝަނާ ގުޅޭ މައްސަލަތައް ފަސޭހައިން ހުށަހެޅޭނެ ޕްލެޓްފޯމެއް ޤާއިމްކުރުމާއި، ޒީރޯ ޓޮލެރެންސް ޓު ކޮރަޕްޝަން ކެމްޕެއިން ފެށުންވެސް ހިމެނެއެވެ. އަދި މިނިވަން މުއައްސަސާތައް މިނިވަން ކަމާއެކު ހިންގޭނެ ގޮތަށް ޤާނުނުތައް އިސްލާޙްކުރަން މަޖިލިހަށް ހުށައެޅުމަށާއި، ރިޝްވަތު ހިފާ މީހާއާއި އެއްވަރަށް ރިޝްވަތުދޭ މީހާ ވެސް ކުށްވެރިވާގޮތަށް އެންޓިކޮރަޕްޝަން ޤާނޫނަށް ބަދަލު ގެނައުމަށްވެސް ސަރުކާރުންވަނީ ނިންމާފައެވެ.