މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްގެ މެނޭޖިންގ ޑިރެކްޓަރުކަމުގެ މަޤާމުން ޢާދިލް މޫސާ އިސްތިޢުފާދެއްވައިފިއެވެ.
މިކަން ހާމަކުރައްވާ ޕްރައިވަޓައިޒޭޝަން ބޯޓުގެ ރައީސް މުޙައްމަދު ނިޒާރު މިއަދު ކުރެއްވި ޓުވީޓެއްގައި ވިދާޅުވީ، އެމް.އޭ.ސީ.އެލްގެ މެނޭޖިންގ ޑިރެކްޓަރުކަމުގެ މަޤާމުން ޢާދިލް މޫސާ އިސްތިޢުފާ ދެއްވަން ނިންމާފައިވާކަމަށާއި، އިސްތިޢުފާގެ ސިޓީ ޕްރައިވަޓައިޒޭޝަން ބޯޑުން ބަލައިގެންފައިވާކަމަށެވެ. އަދި މާދަމާއިން ފެށިގެން އެކުންފުނި ހިންގެވުމާއި ވަގުތީގޮތުން ހަވާލުވާނީ އެމް.އޭ.ސީ.އެލްގެ ޑެޕިއުޓީ ޗީފް އިންފޮމޭޝަން އޮފިސަރުގެ މަޤާމުގައި ހުންނެވި މޫސާ ޞާލިޙުކަމަށެވެ.
ދަޢުލަތަށް އެންމެ ބޮޑު ޢާމްދަނީއެއް ލިބޭ އެއް ކުންފުނިކަމަށްވާ އެމް.އޭ.ސީ.އެލްގެ މެނޭޖިންގ ޑިރެކްޓަރުކަމުގެ މަޤާމަށް ޢާދިލް މޫސާއަށް އައްޔަނުކޮށްފައިވަނީ 2015 ވަނަ އަހަރެވެ. ރައީސް ޔާމީންގެ ސަރުކާރުގެ 5 އަހަރުގެ ތެރޭގައި ވެލާނާ އިންޓަރނޭޝަނަލް އެއަރޕޯޓު ތަރައްޤީކޮށް، ޒަމާނީ ޚިދުމަތްތައް ތަޢާރަފުކުރުމަށް ހިންގި ހުރިހާ މަޝްރޫޢެއްގައިވެސް ޢާދިލް މޫސާ ވަނީ މުހިއްމު ދައުރެއް އަދާކުރައްވާފައެވެ.