މަޝްރޫޢުތައް ތަންފީޒުކުރެވިއްޖެނަމަ، ދަރަނި އަދާކުރުމުގެ ޤާބިލުކަން އިތުރުވެގެންދާނެ- މިނިސްޓަރ މުނައްވަރު

ކުރިއަށްއޮތް 5 އަހަރަށް ހިންގުމަށް ރާއްވާފައިވާ ތަރައްޤީގެ މަޝްރޫޢުތައް، ރޭވިފައިވާގޮތަށް ތަންފީޒުކުރެވިއްޖެނަމަ ދަޢުލަތުގެ އާމްދަނީ އިތުރުކުރެވި، ދަރަނި އަދާކުރުމުގެ ޤާބިލުކަން އިތުރުވެގެންދާނެކަމަށް ފިނޭންސް މިނިސްޓަރ އަޙްމަދު މުނައްވަރު ވިދާޅުވެއްޖެއެވެ.

2019 ވަނަ އަހަރަށް ލަފާކުރާ ދަޢުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅުއްވަމުން މިނިސްޓަރ ވިދާޅުވީ، މިހިނގާ 2018 ވަނަ އަހަރުގެ ބަޖެޓުގެ ޖުމްލަ އަދަދު 27.9 ބިލިއަން ރުފިޔާ އަރާނެކަމަށް ލަފާކުރެވޭކަމަށާއި ދަރަނި އަދާކުރުމުގެ ގޮތުން 2.1 ބިލިއަން ރުފިޔާ ހޭދަކުރެވޭނެކަމަށެވެ.

ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، މި ހިނގާ 2018 ވަނަ އަހަރުގެ ބަޖެޓަކީ މަންފާ ކުރަނިވި އެތައް މަޝްރޫޢުތަކެއް ނިމި، އޭގެ ފައިދާ ލިބެންފަށާފައިވާ ބަޖެޓެއްކަމަށެވެ. އެގޮތުން ވޭތުވެދިޔަ 5 އަހަރުގެ ބަޖެޓުން ގިނަގުނަ ޚިދުމަތްތަކާއި މަޝްރޫޢުތަކެއް ނިންމާ އިފްތިތާޙުކޮށްފައިވާކަން މިނިސްޓަރ ފާހަގަކުރެއްވިއެވެ.

ފިނޭންސް މިނިސްޓަރ މުނައްވަރު ވިދާޅުވީ، ރިކަރަންޓް ޚަރަދުގެ ގޮތުގައި 79 ބިލިއަން ރުފިޔާ އަދި ކެޕިޓަލް ޚަރަދުގެ ގޮތުގައި 41 ބިލިއަން ރުފިޔާ ވޭތުވެދިޔަ 5 އަހަރުގެ ތެރޭގައި ޚަރަދުކޮށްފައިވާކަމަށެވެ. މީގެ ތެރެއިން ކެޕިޓަލް ޚަރަދުގެ ގޮތުގައި 25 ބިލިއަން ރުފިޔާ ޕީ.އެސް.އައި.ޕީގެ މަޝްރޫޢުތަކަށް ހޭދަކޮށްފައިވާއިރު، މިއީ ރާއްޖޭގެ ތާރީޚުގައިވެސް ރިޔަސީ ދައުރެއްގެ ތެރޭގައި ޢުމްރާނީ ތަރައްޤީއަށް އެންމެ ބޮޑު ހޭދައެއް ކުރި ފުރަތަމަ ފަހަރުކަން މިނިސްޓަރ ފާހަގަކުރެއްވިއެވެ.

"މި ހިނގާ 5 އަހަރުގެ ތެރޭގައި ތަރައްޤީގެ މަޝްރޫޢުތަކަށް 25 ބިލިއަން ރުފިޔާ ޚަރަދުކުރެވިފައި ވާއިރު، އެވްރެޖްކޮށް ކޮންމެ އަތޮޅަކަށް ކޮންމެ އަހަރަކަށް 14.1 މަޝްރޫޢު ހިންގާފައިވާކަން ފާހަގަ ކޮށްލަން. ދައުލަތުން ޚަރަދުކޮށްފައިވާ މަޝްރޫޢުތަކަކީ ދިވެހިރާއްޖޭގެ އުފެއްދުންތެރިކަމާއި، ދިރިއުޅުމުގެ ފެންވަރު މަތިކޮށް، ދައުލަތުގެ އާމްދަނީ އިތުރުކޮށް، ދަރަނި އަދާކުރުމުގެ ޤާބިލުކަން އިތުރުކޮށްދޭނެ މަޝްރޫޢުތަކެއްކަންވެސް މިފުރުޞަތުގައި ފާހަގަކޮށްލަން. މި 5 އަހަރުގެ ތެރޭގައި އެންމެ ފާހަގަ ކުރެވޭ އެއް މަޝްރޫޢުއަކީ ވެލާނާ އިންޓަނޭޝަނަލް އެއަރޕޯޓްގެ މަޝްރޫޢު. މީގެ ސަބަބުން ރާއްޖޭގެ އިޤްތިސާދުގެ މައި ދޮރާށި ފުޅާކުރެވި، ފަތުރުވެރިކަމަށް އަންނަ ކުރިއެރުން އިތުރުކޮށްދޭނެ" މިނިސްޓަރ ވިދާޅުވިއެވެ.

ފިނޭންސް މިނިސްޓަރ މުނައްވަރު ވިދާޅުވީ، މިހިނގާ 5 އަހަރުގެ ތެރޭގައި ތަރައްޤީގެ މަޝްރޫޢުތަކަށް 25 ބިލިއަން ރުފިޔާ ޚަރަދުކޮށްފައިވާއިރު، ދަޢުލަތުގެ ދަރަނި 23 ބިލިއަން ރުފިޔާއަށް އިތުރުވެފައިވާކަމަށެވެ. އަދި މިއަހަރު ނިމޭއިރު ދަޢުލަތުގެ ޖުމްލަ ދަރަނި ހުންނާނެކަމަށް ލަފާކުރެވެނީ 48.6 ބިލިއަން ރުފިޔާގައި ކަމަށެވެ.

ދަޢުލަތުގެ ދަރަނި އިތުރުވެފައިވަނީ މި 5 އަހަރުގެ ތެރޭގައި ނިންމާފައިވާ އަދި ހިނގަމުންދާ ތަރައްޤީގެ ބިޔަ މަޝްރޫޢުތަކަށް ބޭނުންވާ ފައިސާ ހޯދުމަށް ކަމަށާއި މި މަޝްރޫޢުތައް ރޭވިފައިވާގޮތަށް ތަންފީޒުކުރެވިއްޖެނަމަ ދަޢުލަތުގެ އާމްދަނީ އިތުރުވެ، ދަރަނި އަދާކުރުމުގެ ޤާބިލުކަން އިތުރުވެގެންދާނެކަންވެސް ފިނޭންސް މިނިސްޓަރ ވިދާޅުވިއެވެ.

"ދަރަނި އަދާކުރުމުގެ ގާބިލްކަން އިތުރުކުރުމުގެ ގޮތުން ރާއްޖޭގެ ތާރީހުގައި ފުރަތަމަ ފަހަރަށް ފަހަށް ފައިސާ ރައްކައު ކުރުމަށްޓަކައި "ސޮވްރިން ޑިވަލޮޕްމަންޓް ފަންޑު" ގެ ނަމުގައި ދައުލަތުގެ ރިޒަރވް ފަންޑެއް ގާއިމް ކުރެވިފައިވޭ. މިއަހަރުގެ އޮކްޓޯބަރު މަހުގެ ނިޔަލަށް މި ފަންޑުގައި 98 މިލިޔަން ޑޮލަރު ނުވަތަ 1.5 ބިލިޔަން ރުފިޔާ ވަނީ ރައްކައު ކުރެވިފައި. އަދި މި ފަންޑު އެމް.އެމް.އޭގެ އެހީއާއެކު، ރާއްޖެއާއި އިންޓަނޭޝަނަލް މާކެޓްގެ ރައްކާތެރި "ފައިނޭންޝިއަލް އިންސްޓްރުމަންޓް" ނުވަތަ އެފަންޑުން އިތުރަށް ފައިސާ ލިބޭނެ ގޮތްތަކަށް ވަނީ އިންވެސްޓް ކުރެވިފައި." މިނިސްޓަރ ވިދާޅުވިއެވެ.

ދަޢުލަތުގެ މާލީ ނިޒާމް ހަރުދަނާކުރުމަށް ކޮށްފައިވާ މަސައްކަތްތަކަށް އަލިއަޅުއްވާލައްވާ ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، ވަރލްޑް ބޭންކުގެ އެހީގައި ރާއްޖޭގެ ޕަބްލިކް ފައިނޭންސް މެނޭޖްމަންޓް ރިފޯމް ނުވަތަ މާލީ ނިޒާމް ހަރުދަނާކުރުމަށް ހެޔޮ ބަދަލުތަކެއް ގެނެސްފައިވާކަމަށެވެ. ހަމައެހެންމެ މާލީ ޤާނޫނުތަކުގައި ހުރި އެކިއެކި ފުށުއެރުންތައް ހައްލުކުރުމަށް އެ ޤާނޫނުތަކަށް ގެންނަންޖެހޭ ބަދަލުތަކާއި އަލަށް ތަޢާރަފުކުރަންޖެހޭ ޤާނޫނުތަކުގެ ދިރާސާތައް ކޮށް ނިންމާފައިވާކަމަށްވެސް އެމަނިކުފާނު ވިދާޅުވިއެވެ.