އަންނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހެޅުން އަންގާރަދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފިއެވެ.
އަންގާރަދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް ދައުލަތުގެ ބަޖެޓް ހުށަހެޅުން އެޖެންޑާކޮށްފައިވާއިރު، ފިނޭންސް މިނިސްޓްރީން ވަނީ މިދިޔަމަހުގެ 31 ވަނަ ދުވަހު މަޖިލީހުގެ އިދާރާއަށް ބަޖެޓް ފޮނުވާފައެވެ.
ފިނޭންސް މިނިސްޓްރީން ބުނީ އަންނަ އަހަރަށް ލަފާކޮށް ހުށަހަޅާފައިވަނީ 29.6 ބިލިއަން ރުފިޔާގެ ބަޖެޓެއްކަމަށެވެ. މިބަޖެޓަކީ އިންތިޚާބީ ރައީސްގެ ފަރާތުން ހުށަހަޅާފައިވާ ކަންކަން ހިމަނައިގެން ހުށަހަޅާފައިވާ ބަޖެޓެއްކަމަށްވެސް ފިނޭންސް މިނިސްޓްރީން ބުނެއެވެ. ނަމަވެސް ބަޖެޓްގެ އިތުރު ތަފްސީލެއް ފިނޭންސް މިނިސްޓްރީން ދީފައެއްނުވެއެވެ.
އަންނަ އަހަރަށް 29.6 ބިލިއަން ރުފިޔާގެ ބަޖެޓެއް ހުށަހަޅާފައިވާއިރު، މި ހިނގާ 2018 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވަނީ 27.9 ބިލިއަން ރުފިޔާގެ ބަޖެޓެކެވެ.