އިންތިޙާބީ ރައީސް އިބްރާހީމް މުޙައްމަދު ޞާލިޙު އާއި ކުރީގެ ރައީސް މުޙައްމަދު ނަޝީދަށް މަރުޚަބާ ދެންނެވުމަށް ގެސްޓްހައުސް އެސޯސިއޭޝަނުން ޙާއްސަ ހަފްލާއެއް ބާއްވައިފިއެވެ.
ހުޅުމާލޭ ރެހެންދި ސުކޫލްގައި ބޭއްވި މި ހަފްލާގައި ހުޅުމާލޭ ގެސްޓްހައުސްތަކާއި ވޯޓާ ސްޕޯޓްސް ސެންޓަރުތަކުގެ އިތުރުން މިދާއިރާގައި ހަރަކާތްތެރިވާ އިސްފަރާތްތަކުން ބައިވެރިވިއެވެ.
ގެސްޓްހައުސް އެސޯސިއޭޝަނުން ބުނީ މިއީ އިބްރާހީމް މުޙައްމަދު ޞާލިޙްއާއި، ފައިސަލް ނަސީމް އިންތިޙާބު ކާމިޔާބު ކުރުމާއި ގުޅިގެން އެކަމުގެ އުފަލުގައި ބޭއްވި ހަރަކާތެއްކަމަށެވެ. ގުޅިފައިވާ ކޯލިޝަންގެ މެނިފެސްޓޯގައި ގެސްޓްހައުސްތަކަށް ގިނަ ކަންކަން ކޮށްދިނުމަށް ހަމަޖެހިފައިވާކަމަށާއި، އެހެންކަމުން ކޯލިޝަނުން އިންތިޙަބު ކާމިޔާބުކުރުމަކީ ގެސްޓްހައުސް ދާއިރާއަށް ލިބިގެންދާނެ އިތުރު ކުރިއެރުމެއްކަމަށް އެ އެސޯސިއޭޝަނުން ބުނެއެވެ.
މި ހަފްލާގައި ގެސްޓްހައުސް އެސޯސިއޭޝަނުން ވަނީ އިބްރާހީމް މުޙައްމަދު ޞާލިޙްއާއި، ފައިސަލް ނަސީމް އަދި މުޙައްމަދު ނަޝީދަށް ޙާއްސަ ހަނދާނީ ފިލައެއްވެސް އަރުވާފައެވެ.