ރައީސް ނަޝީދަށް މަރުޙަބާކިޔުމަށް ބާއްވާ ހަރަކާތްތަކަށް ސަލާމަތީ ބާރުތަކުން އެއްބާރުލުންދޭނެ- އެމް.ޑީ.ޕީ
ކުރީގެ ރައީސް މުޙައްމަދު ނަޝީދަށް މަރުޙަބާ ކިޔުމަށް މާލޭ ސިޓީގައި ކުރިއަށްގެންދާ ހަރަކާތްތަކަށް ސަލާމަތީ ބާރުތަކުން އެއްބާރުލުންދޭނެކަމުގެ ޔަޤީންކަން ދީފައިވާކަމަށް އެމް.ޑީ.ޕީން ބުނެފިއެވެ.
އެމް.ޑީ.ޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މާފަންނު އުތުރުދާއިރާގެ މެމްބަރު އަދި އެމް.ޑީ.ޕީގެ ތަރުޖަމާން އިމްތިޔާޒް ފަހުމީ ވިދާޅުވީ، ބުރާސްފަތި ދުވަހު ރައީސް ނަޝީދު މާލެ ވަޑައިގަންނަވާއިރު، އެމަނިކުފާނަށް މަރުޙަބާ ކިޔުމަށް އެޕާޓީން ކުރިއަށްގެންދާ ހުރިހާ ހަރަކާތްތަކަކީވެސް ޤާނޫނީ އިމުގެ ތެރެއިން، ސުލްޙަވެރިކަމާއެކު ކުރިއަށްގެންދާނެ ހަރަކާތްތަކެއްކަމަށެވެ.
އެގޮތުން ރައީސް ނަޝީދަށް މަރުޙަބާ ކިޔުމަށްޓަކާ އެމް.ޑީ.ޕީގެ މަޖިލިސް ދާއިރާތަކާއި ކައުންސިލްތައް ހިމެނޭހެން 85 ދާއިރާ ތަމްސީލުކުރާ ކުލަގަދަ ހަރަކާތްތަކެއް ނޮވެމްބަރުމަހުގެ އެއްވަނަ ދުވަހު މާލޭ ސިޓީގައި ކުރިއަށްގެންދިއުމަށް ނިންމާފައިވާއިރު، މި ހަރަކާތްތައް އިންތިޒާމްކުރުމުގައި ސަލާމަތީ ބާރުތަކުގެ އެހީތެރިކަން ލިބިގެންދާނެކަމަށް އިމްތިޔާޒު ވިދާޅުވިއެވެ.
އިމްތިޔާޒް ފަހުމީ ވިދާޅުވީ، ރައީސް ނަޝީދަށް މަރުޙަބާ ކިޔުމުގެ ހަރަކާތްތައް ކުރިއަށްދާނީ ޗާންދަނީމަގު ރީފްސައިޑް ކަންމަތިން ފެށިގެން މަޖީދީމަގުންގޮސް އެމް.ޑީ.ޕީ ހަރުގެއާއި ހަމައަށްކަމަށެވެ. މި ހަރަކާތްތަކުގެ ތެރެއިން ރައީސް ނަޝީދު އެމް.ޑީ.ޕީގެ ސަޕޯޓަރުންނާއި ބައްދަލުކުރައްވާ ވާހަކަފުޅު ދެއްކެވުމަށް ހަމަޖެހިފައިވާކަމަށްވެސް އިމްތިޔާޒް ފަހްމީ ވިދާޅުވިއެވެ. .
ނޫސްވެރިންގެ ބައްދަލުވުމުގައި ވާހަކަދައްކަވަމުން އެމް.ޑީ.ޕީގެ ޤައުމީ މަޖިލީހުގެ މެމްބަރު އަންވަރު އިބްރާހީމް ވިދާޅުވީ، ރައީސް ނަޝީދަށް މަރުޙަބާ ދެންނެވުމުގެ ގޮތުން ހުޅުލެއިން ފެށިގެން މާލެއާއި ދެމެދު އޮންނަ ކަނޑުގެ ސަރަޙައްދުގައިވެސް ހާއްސަ ހަރަކާތްތަކެއް ކުރިއަށްދާނެކަމަށެވެ. އެގޮތުން ކަނޑުމަތީގެ މި ހަރަކާތުގައި މިހާރުވެސް ގިނަ އަދަދެއްގެ އުޅަނދުތަކެއް ބައިވެރިވުމުގެ ޝަޢުގުވެރިކަން ފާޅުކޮށްފައިވާއިރު، މިމަހުގެ 31 ގެ ނިޔަލަށް އެ ފުރުޞަތު ހުޅުވާލާފައިވާކަމަށްވެސް އޭނާ ވިދާޅުވިއެވެ. އަންވަރު ވިދާޅުވީ، ރައީސް ނަޝީދަށް މަރުޙަބާ ދެންނެވުމަށްޓަކާ ކަނޑުމަތީގައިވެސް ސަޤާފީ އެކި ހަރަކާތްތަކާއި، މޫދުކުޅިވަރުތައް ކުރިއަށްދާނެކަމަށެވެ.
ރައީސް ނަޝީދަށް މަރުޙަބާ ދެންނެވުމަށް އެމް.ޑީ.ޕީން ކުރިއަށްގެންދާ ކުލަގަދަ ހަރަކާތުގައި އިންތިޙާބީ ރައީސް އިބްރާހީމް މުޙައްމަދު ސާލިޙާއި ގުޅިފައިވާ ޕާޓީތަކުގެ ލީޑަރުންވެސް ބައިވެރިވެވަޑައިގަންނަވާނެކަމަށް އެމް.ޑީ.ޕީން ބުނެއެވެ. އަދި ރައީސް ނަޝީދަށް މަރުޙަބާ ދެންނެވުމަށް ކުރިގެންދާ ހަރަކާތްތައް އަންނަ ބުރާސްފަތި ދުވަހުގެ ހަވީރުން ފެށިގެން، ރޭގަނޑުވެސް ކުރިއަށްދާނެކަމަށް އެޕާޓީން ބުނެއެވެ.