ހުޅުމާލޭ ދެވަނަ ފިޔަވަހިން ހަތަރު ސަތޭކަ ގޯތި ދޫކުރުމަށް ސަރުކާރުން ނިންމައިފިއެވެ.
ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވީ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ސިޔާސަތުގައި ހިމެނޭ އެންމެ މުހިންމު ދާއިރާއަކީ ރައްޔިތުންނަށް ބޯހިޔާވަހިކަން ހޯދައިދިނުންކަމަށެވެ. އެގޮތުން މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަކީ، ފާއިތުވި އެއްވެސް ސަރުކާރަކަށް ހައްލު ހޯދައި ދެވިފައިވާނުވާ މައްސަލައެއްކަމަށާއި، ނަމަވެސް ރައީސް ޔާމީން އެކަމަށް ހައްލު ގެނައުމަށް ގިނަ މަސައްކަތްތަކެއް ކުރައްވާފައިވާކަމަށެވެ.
އެގޮތުން ގެދޮރުގެ ދަތިކަން އެންމެ ބޮޑަށް ދިމާވެފައިވާ މީހުންނަށް ޚާއްޞަކޮށްގެން ހުޅުމާލޭގެ ދެވަނަ ފިޔަވަހިން ގޯތި ދޫކުރުމަށް ރައީސް ޔާމީން ނިންމަވާފައިވާކަން ފާހަގަކުރައްވާ މިނިސްޓަރ މުޢިއްޒު ވިދާޅުވީ، މާދަމާއިން ފެށިގެން ބުރާސްފަތި ދުވަހުގެ ނިޔަލަށް ފޯމްތައް ބަލައިގަންނާނެކަމަށެވެ. އަދި ހައުސިންގ މިނިސްޓްރީންނާއި އެ މިނިސްޓްރީގެ ވެބްސައިޓުން މިކަމަށް އެދޭ ފޯމް ލިބެން ހުންނާނެކަމަށެވެ.
މިނިސްޓަރ ވިދާޅުވީ، ހުޅުމާލެ ދެވަނަ ފިޔަވަހިން 1000 އަކަފޫޓުގެ 400 ގޯތި ދޫކުރުމަށް ނިންމަވާފައިވަނީ، އަކަފޫޓެއް 400 ރުފިޔާގެ މަގުންކަމަށާއި، އެއްހާސް އަކަފޫޓްގެ އަގަކީ ހަތަރު ލައްކަ ރުފިޔާކަމަށެވެ.
މިނިސްޓަރ ވިދާޅުވީ މިއީ މާލޭގެ ރައްޔިތުންގެ ތެރެއިން ކުޑަ ޖާގައިގައި ދަތިކޮށް އުޅޭ ރައްޔިތުންނަށް އުއްމީދުތަކެއް ގެނެސްދޭނެ މަޝްރޫޢެއްކަމަށެވެ.
ހުޅުމާލެ ދެވަނަފިޔަވަހިން ދޫކުރާ 1000 އަކަފޫޓްގެ ބިމުގައި 3 ކޮޓަރިއާއި 4 ކޮޓަރީގެ އެޕާޓްމަންޓްތަކާއި، އުސް އިމަރާތްތައް ބިނާކުރުމުގެ ފުރުސަތުވެސް ލިބޭނެކަން މިނިސްޓަރ ފާހަގަކުރެއްވިއެވެ.
މި ގޯތިތަކަށް ފައިސާދެއްކުމުގައިވެސް ފަސޭހަ އިންތިޒާމްތަކެއް ހަމަޖައްސާފައިވާކަން މިނިސްޓަރ ވަނީ ފާހަގަކުރައްވާފައެވެ. އެގޮތުން އެއްފަހަރާ ފައިސާ ދެއްކޭނެ އިންތިޒާމްގެ އިތުރުން ބައިބަޔަށް ބަހާލައިގެންވެސް ފައިސާ ދެއްކޭނެކަމަށް މިނިސްޓަރ ވިދާޅުވިއެވެ. އެގޮތުން ޑައުންޕޭމަންޓްގެ ގޮތުގައި 25،000 ރުފިޔާ ދެއްކުމަށްފަހު ބާކީ ފައިސާ 10 އަހަރަށް ބަހާލައިގެން ދައްކާ ޚަލާސްކުރެވޭނެކަމަށްވެސް ހައުސިންގ މިނިސްޓަރ ވިދާޅުވިއެވެ.
"އެއްފަހަރާ ފައިސާ ދެއްކުން މަޖުބޫރެއްނޫން. ޑައުންޕޭމަންޓަށް 25 ހާސް ރުފިޔާ އަދި ބާކީބައި 10 އަހަރު ތެރޭގައި ދައްކާ ޚަލާސްކުރާގޮތަށްވެސް ފައިސާ ދެއްކޭނެ. އަދި ފައިސާ ދައްކަން ޖެހޭނީވެސް އެޗްޑީސީއަށް. މީގެ އިތުރުން އެއްފަހަރާ ފައިސާ ދެއްކުމުގެ ފުރުސަތުވެސް އޮންނާނެ. ބާކީ ތިންލައްކަ ފަންސަވީސް ހާސްރުފިޔާ އަހަރަށް ބަހާލައިގެންވެސް ދެއްކޭނެ" މިނިސްޓަރ ވިދާޅުވިއެވެ.
ހުޅުމާލޭ ދެވަނަ ފިޔަވަހިން ގޯއްޗަށް ކުރިމަތިލުމުގެ ޝަރުތުތަކުގެ ތެރޭގައި ދިވެހި ރައްޔިތަކަށްވުމާއި، އުމުރުން 18 އަހަރު ފުރިފައިވާ މީހަކަށްވުމާއި، ކައިވެންޏެއް ކޮށްފައިވާ މީހަކަށްވުމާއި، މާލޭގެ ރައްވެއްސަކަށް ވުން ނުވަތަ މާލޭގެ ދަފްތަރުގައިވާ މީހަކަށްވުން ހިމެނެއެވެ.
މީގެ އިތުރުން ރާއްޖޭގެ އެއްވެސް ސަރަހައްދަކުން 600 އަކަފޫޓަށްވުރެ ބޮޑު ގޯއްޗެއް ނުވަތަ ބިމެއް ނެތުމާއި، ސަރުކާރުން ހިންގި ބޯހިޔާވަހިކަމުން އެއްވެސް މަޝްރޫޢަކުން ބޯހިޔާވަހިކަން ލިބިފައި ނުވުންވެސް މި ޝަރުތުތަކުގެތެރޭގައި ހިމެނެއެވެ. ހައުސިންގ މިނިސްޓަރ ވިދާޅުވީ، މި ޝަރުތުތައް ފުރިހަމަވާ ހުރިހާ ފަރާތްތަކަށްވެސް ގޯއްޗަށް އެދި ކުރިމަތިލެވޭނެކަމަށާއި، ގޯތި ދޫކުރާނީ އެއްވެސް ފަރާތެއް ތަފާތުކުރުމެއް ނެތި އެންމެންގެ ހާޒިރުގައި ނެގޭ ގުރުއަތަކުން ކަމަށެވެ.
ސަރުކާރުން ހުޅުވާލި މި ފުރުޞަތުގެ ސަބަބުން މާލޭގެ ބޯހިވާހަކިކަމުގެ ދަތިކަންހުރި ވަރަށް ގިނަ ފަރާތްތަކަށް ހައްލު ލިބިގެންދާނެކަމަށްވެސް ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވިއެވެ.