ރިޔާސީ އިންތިޚާބުގެ ނަތީޖާ އޮޅުވާލުމަށް އިލެކްޝަންސް ކޮމިޝަންގެ މެމްބަރުން މަސައްކަތްކޮށްފައިވާކަމަށް ބުނެ ސޯޝަލް މީޑިއާގައި ދައްކަނީ ހަޤީޤަތާ ޚިލާފު ވާހަކަތަކެއްކަމަށް އިލެކްޝަންސް ކޮމިޝަންގެ ރައީސް އަޙްމަދު ޝަރީފު ވިދާޅުވެއްޖެއެވެ.
އިލެކްޝަން ކޮމިޝަންގެ ރައީސް އަޙްމަދު ޝަރީފު މިހެން ވިދާޅުވީ އިންތިޚާބަށް ނުފޫޒު ފޯރުވިކަމަށް ބުނެ އިލެކްޝަންސް ކޮމިޝަނުގެ މެމްބަރުންނާ ގުޅޭގޮތުން ދައްކަމުންދާ ވާހަކަތަކަށް ޖަވާބުދާރީވުމަށް ޕީޕީއެމުން ގޮވާލާފައިވަނިކޮށެވެ.
ޕީއެސްއެމް ނިއުސްއަށް މައުލޫމާތުދެއްވަމުން ޝަރީފް ވިދާޅުވީ ސޯޝަލް މީޑިއާގައި ހަޤީޤަތާ ޚިލާފު ވާހަކަތައް ފަތުރަމުންދަނީ ކޮމިޝަނުގެ އިތުބާރު ގެއްލުވާލުމަށްކަމަށެވެ. އަދި އިންތިޙާބަށް ނުފޫޒު ފޯރުވުމުގެ މަޤްސަދުގައި އެއްވެސް ކަމެއް ކޮށްފައި ނޯންނާނޭކަމަށް ޝަރީފް ވިދާޅުވިއެވެ.
ޝަރީފު ވިދާޅުވީ، ރިޔާސީ އިންތިޚާބުގެ ހުރިހާކަމެއްވެސް ދިޔައީ ވަރަށް އަމާންކަމާއި، ސުލްޙަވެރިކަމާ އެކުގައިކަން އިންތިޚާބު މޮނިޓަރކޮށް އޮބްޒާވްކުރުމުގައި ހަރަކާތްތެރިވި ރާއްޖެއާއި، ބައިނަލްއަޤްވާމީ އޮފިޝަލުންވެސް ފާހަގަކޮށްފައިވާކަމަށެވެ. އަދި އިންތިޚާބާއި ގުޅޭގޮތުން އެކޮމިޝަނަށް ހުށައެޅޭ ޝަކުވާތަކަށް އެކަމަށް ޙާއްސަކޮށްފައިވާ ކޮމްޕަލަޔަސް ބިއުރޯއިން ޖަވާބުދާރީވަމުންދާކަމަށާއި ކޮމިޝަންގެ ޖަވާބާމެދު ހިތްހަމަ ނުޖެހޭނަމަ، އެ އޮންނަ އުޞޫލެއްގެ ތެރެއިން ޝަރުޢީ މަރުހަލާއަށް ދިއުމުގެ އިޙްތިޔާރުވެސް ކޮންމެ ފަރާތަކަށްވެސް އޮންނާނެކަމަށް ޝަރީފު ވިދާޅުވިއެވެ.
ރިޔާސީ އިންތިޚާބާގުޅޭގޮތުން އިލެކްޝަންސް ކޮމިޝަންގެ މައްޗަށް ކުރެވޭ ތުހުމަތުތައް އެކޮމިޝަނުން ދޮގުކޮށްފައިވާއިރު، ނަތިޖާ އޮޅުވާލުމަށް އިލެކްޝަންސް ކޮމިޝަންގެ މެމްބަރުން މަސައްކަތް ކޮށްފައިވާކަމަށްބުނެ ދެކެވޭ ވާހަކަތަކުގެ ހަޤީޤަތް އާއްމު ރައްޔިތުންނަށް ހާމަކޮށްދިނުމަށް ޕީ.ޕީ.އެމުން ވަނީ ގޮވާލާފައެވެ. އަދި އިންތިޙާބުގެ ދުވަސްވަރު އެކި ފަހަރު މަތިން އިލެކްޝަންސް ކޮމިޝަންގެ ސާވަރ ހެކްކުރުމަށް މަސައްކަތްކޮށްފައިވާކަމަށް އެ ކޮމިޝަނުންވެސް ބުނެފައިވާއިރު، އެތަކެތީގެ އިންޓަރނަލް އޮޑިޓެއް ހަދާ، އިންތިޙާބުގެ ނަތީޖާގެ ސައްޙަކަން އާއްމު ރައްޔިތުންނަށް ކަށަވަރު ކޮށްދޭންޖެހޭނެ ކަމަށްވެސް ޕީ.ޕީ.އެމުން ބުނެފައިވެއެވެ.