ރައީސުލްޖުމްހޫރިއްޔާގެ ޢަބްދުﷲ ޔާމީން ޢަބްދުލްޤައްޔޫމްގެ އަނބިކަނބަލުން ފާތިމަތު އިބްރާހީމް މާލެއަތޮޅުގެ ރަށްތަކަށް ދަތުރުފުޅެއް ފައްޓަވައިފިއެވެ.
ރައީސުލްޖުމްހޫރިއްޔާގެ އަނބިކަނބަލުން ފައްޓަވާފައިވާ އެންމެ ގާތުން ކެމްޕެއިންގެ ދަށުން މިއަދު އެންމެ ފުރަތަމަ ވަޑައިގެންފައިވަނީ ކ. ދިއްފުއްޓަށެވެ. އެކަމަނާ ދިއްފުއްޓަށް ވަޑައިގަތުމުން އެރަށު ރައްޔިތުންވަނީ އެކަމާއަށް ހޫނު މަރުޙަބާއެއް ދަންނަވާފައެވެ. ރަށުގެ ކުދިބޮޑު ދެޖިންސުގެ ރައްޔިތުން ވަނީ އެކަމާނާއަށް މަރުޙަބާ ދެންނެވުމަށްޓަކައި ބަނދަރު ސަރަހައްދަށް ނުކުމެފައެވެ.
ރައީސްގެ އަނބިކަނބަލުންގެ މިދަތުރުފުޅުގައި ރައީސް ޔާމީންގެ ރިޔާސީ ކެމްޕެއިން ހަރަކާތްތަކުގައި ބައިވެރިވެވަޑައިގަންނަވާނެއެވެ. އެގޮތުން އެކަމަނާވަނީ ދިއްފުށީ ރައްޔިތުންނާ ބައްދަލުކުރައްވައި އެރަށު ރައްޔިތުންގެ ހާލު ބައްލަވާލައްވައި، އެކުގައި ވަގުތު ހޭދަކުރައްވާފައެވެ. ޚާއްޞަކޮށް މުޖުތަމައުގެ އަޅާލުން ބޭނުންވާމީހުންނާއި، އިސްރަށްވެހިންނާއެކު އެކަމަނާވަނީ ވަގުތު ހޭދަކުރައްވާފައެވެ.
ރައީސުލްޖުމްހޫރިއްޔާގެ އަނބިކަނބަލުން ކ. އަތޮޅަށް ދަތުރުފުޅެއް ފައްޓަވާފައިވަނީ ލ. އަތޮޅަށް ކުރެއްވި ދަތުރުފުޅު އިއްޔެ ނިންމަވާލެއްވުމަށްފަހުއެވެ.