ވެލާނާ އިންޓަރނޭޝަނަލް އެއަރޕޯޓުގެ އައު ރަންވޭ ތަރައްޤީކޮށްފައިވަނީ ބައިނަލްއަޤްވާމީ މިންގަނޑުތަކަށް ފެތޭނެހެންކަމަށާއި، އައު ރަންވޭ ބޭނުންކުރުމުގައި އެއަރލައިންތަކުން ކަންބޮޑުވާންޖެހޭ އެއްވެސް ސަބަބެއް ނެތްކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން ބުނެފިއެވެ.
އައު ރަންވޭ ތަރައްޤީކުރުމުގެ ތެރޭގައި ބައެއް ކަންކަމަށް އިހުމާލުވެފައިވާކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކަށް ރައްދުދެއްވައި އެމްއޭސީއެލްގެ މެނޭޖިންގ ޑިރެކްޓަރ އާދިލް މޫސާ ވިދާޅުވީ، އެއީ އެއްވެސް ހަޤީޤަތެއް ނެތް ވާހަކަތަކެއްކަމަށެވެ. އަދި އެއަރޕޯޓު ތަރައްޤީކުރުމުގެ ބިޔަ މަޝްރޫޢުގެ ތެރެއިން ކުރަމުންދާ ހުރިހާ މަސައްކަތްތަކަކީވެސް ބައިނަލްއަޤްވާމީ މިންގަނޑުތަކާއި އުސޫލުތަކުގެ ތެރެއިން ކުރަމުންދާ މަސައްކަތްތަކަމަށް އާދިލް ވިދާޅުވިއެވެ. އެގޮތުން އެއަރޕޯޓު އައު ރަންވޭގެ މަސައްކަތް 24 ގަޑިއިރު ހުއްޓުމެއްނެތި ކުރިއަށްގެންދިޔައިރު، އެ މަސައްކަތް މޮނިޓަރކުރުމުގެ މަސައްކަތް އެމްއޭސީއެލްގެ ފަންނީ ބޭފުޅުންގެ އިތުރުން، ސިންގަރޕޫރުގެ "ސުރްބަނާ ކޮންސަލްޓޭޝަން ފަރމް"ގެ ފަންނީ ބޭފުޅުންވެސް ހަރަކާތްތެރިވަމުންދިޔަކަން އާދިލް ފާހަގަކުރެއްވިއެވެ.
އޭވިއޭޝަން ދާއިރާގައި ކޮލެޓީ ކޮމްޕްރަމައިޒް ކުރުމަކީ އެއްވެސް ހާލެއްގައި ބަލައިގަނެވޭނެ ކަމަކަށްނުވާތީ، އައު ރަންވޭގެ މަސައްކަތް ކުރުމުގައި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން، އައިކާއޯ އަދި ސިވިލް އޭވިއޭޝަނާއި ގުޅުންހުރި އެއްވެސް ޤާނޫނަކާއި، ޤަވާއިދަކާ ޚިލާފުވެފައި ނުވާކަމަށް އާދިލް މޫސާ ވިދާޅުވިއެވެ.
"އަޅުގަނޑުމެން ދިވެހިރައްޔިތުންނަށް ޔަޤީންކަން އަރުވަން ބޭނުންވާ އެއްކަމަކީ މި އެއަރޕޯޓުގައި ހިންގޭ ޕްރޮޖެކްޓަކީ ހަމަ ޔަޤީނުންވެސް ކޮލެޓީ އެޝުއަރެންސް ޕްރޮޖެކްޓެއްކަން. މިކަން ކުރިއަށްގެންދިޔައީ އިންޓަރރޭޝަނަލް ހުރިހާ ސްޓޭންޑެޑްތަކަކަށް ފެތޭވަރަށް އެބޭފުޅުން އެޕްރޫވްކުރައްވައިގެން. އެހެންވީމަ މިކަމުގައި އެއްވެސް ރެގިއުލޭޝަނެއް ނޫނީ އެއްވެސް ކަހަލަ ސްޓޭންޑަޑެއް ބައި-ޕާސްކޮށްފައި ނުވާނެ." - އެމްއޭސީއެލްގެ މެނޭޖިންގ ޑިރެކްޓަރ އާދިލް މޫސާ ވިދާޅުވިއެވެ.
ސަރުކާރުގެ ތަރައްޤީގެ މަޝްރޫޢުތަކަށް އިދިކޮޅު ފަރާތްތަކުން ކިޔަމުންދާ ފާޑުކިއުންތަކަށް ރައްދުދެއްވައި ވާހަކަފުޅުދައްކަވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، ތަރައްޤީގެ ނަމުގައި ރައްޔިތުންނަށް ދެއްކޭނެ އެއްވެސް ހަޤީޤީ ތަޞައްވުރެއް އިދިކޮޅު ފަރާތްތަކުގެ އަތުގައި މިއަދު ނެތްކަމަށެވެ. އަދި އެކަމުގެ ނަތީޖާއެއްގެ ގޮތުން ސަރުކާރުގެ ތަރައްޤީގެ މަޝްރޫޢުތަކަށް އެކިގޮތްގޮތުން ހުރަސްއެޅުން ނޫންކަމެއް އެމީހުންނަށް ކުރެވެން ނެތްކަމަށްވެސް މިނިސްޓަރ ވިދާޅުވިއެވެ.
އައު ރަންވޭގެ ސަލާމަތީކަންކަމާ ގުޅޭގޮތުން ކިޔަމުންދާ ފާޑުކިއުންތަކަށް ރައްދުދެއްވާ ވާހަކަފުޅު ދައްކަވަމުން މިނިސްޓަރ ސަޢީދު ވިދާޅުވީ، ބައިނަލްއަޤްވާމީ އެއަރލައިންތަކުން ދަތުރުކުރާ މަންޒިލްތައް ކަނޑައަޅާނީ ބަލަންޖެހޭ މިންގަނޑުތަކަށް ބެލުމަށްފަހުކަމަށާއި، މިއަދު ދިމާވެގެން އުޅޭ ހަޤީޤީ މައްސަލައަކީ އެއީ ނޫންކަމަށެވެ. އަދި މިހާރު ނިކުމެގެން އުޅޭ މައްސަލައަކީ ތަރައްޤީ ހަޖަމުނުވާ ބަޔަކު ސިޔާސީގޮތުން ވަކި މަންފާއެއް ހޯދުމަށް ހިތުހުރި ވާހަކައެއް ދެއްކުންކަމަށްވެސް މިނިސްޓަރ ވިދާޅުވިއެވެ.
"އިންޓަރނޭޝަނަލް އެއަރލައިންސް ރާއްޖެ ކީއްކުރަން، ކޮންމެ ޑެސްޓިނޭޝަނަކަށްވެސް އުދުހޭނީ އެމީހުންނަށް އުދުހެން ސޭފް ތަންތަނަށް. އަދި ޖެއްސޭނެ ތަންތަނަށް. ސަލާމަތީ މިންގަނޑުތަކަށް ފިޓްވާނެ ތަންތަނަށް. މިއަދު ދިމާވެގެން މިއުޅެނީކީ އެކަހަލަ މައްސަލައެއް ނޫން. މިއަދު ދިމާވެގެން މިއުޅޭނީ ސިޔާސީގޮތުން ވަކި މަންފާއެއް ހޯދަން ބޭނުންވާ އިދިކޮޅު ފަރާތްތަކަކުން ރާއްޖޭގެ ވަކި ކަމެއްނޫން، ކޮންމެ ކަމަކަށްވެސް އެމީހުން ބުނަން ބޭނުން ކޮންމެ އެއްޗެއް ބުނެލަނީ." މިނިސްޓަރ ވިދާޅުވިއެވެ.
އެމްއޭސީއެލްގެ އަގުވެއްޓޭގޮތަށް ހަޤީޤަތާ ޚިލާފު ވާހަކަތައް ނުފެތުރުމަށް އެކުންފުނިން ވަނީ އިލްތިމާސްކޮށްފައެވެ. އަދި މިއީ އާއްމުންގެ ސަލާމަތާ ރައްކާތެރިކަމާ ގުޅިފައިވާ ކަމެއްކަމުން، އެފަދަ ވާހަކަތައް ފަތުރާ ފަރާތްތަކާމެދު ފިޔަވަޅު އަޅާނެކަމަށްވެސް އެކުންފުނިން ވަނީ ބުނެފައެވެ.