ޤައުމު ބިނާކުރުމުގެ ޤާބިލުކަމެއް އިދިކޮޅު ފަރާތްތަކުގެ ކިބައިގައި ނެތްކަމަށާއި، އިދިކޮޅު ކެނޑިޑޭޓްގެ ރިޔާސީ ވައުދުތަކާއެކު ރައްޔިތުންނަށް ލިބިގެންދަނީ މާޔޫސްކަންކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރ ސަޢީދު މިހެން ވިދާޅުވީ، ޗައިނާ ސަރުކާރުގެ ފަރާތުން ހިލޭ އެހީގެ ގޮތުގައި 35 ޖަނަރޭޓަރު ރާއްޖެއަށް ހަދިޔާކުރުމަށާއި، ސަރުކާރުގެ 24 ގަޑިއިރުގެ ކަރަންޓު ޔަޤީންކޮށްދިނުމުގެ ސިޔާސަތުގެ ކާމިޔާބީ ފާހަގަކުރުމަށް ޖުމްހޫރީ މައިދާނުގައި ބޭއްވި ޙާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.
އިކޮނޮމިކް މިނިސްޓަރ ސަޢީދު ވިދާޅުވީ، 23 ސެޕްޓެމްބަރަކީ މި ޤައުމުގެ ކުރިމަގު ބިނާކުރުމަށްޓަކާ ރައްޔިތުންނާއި ވަރަށް މުހިއްމު 2 ސުވާލެއް ކުރިމަތިކުރުވާނެ ދުވަހެއްކަމަށެވެ. އެގޮތުން 5 އަހަރުގެ ދައުރެއް ހިންގުމަށް ރައްޔިތުން ހަވާލުކުރާނީ ޤައުމު ފަނާކުރުމުގެ ވިސްނުން ގެންގުޅޭ ބަޔަކާތޯ ނުވަތަ ޤައުމު އާރާސްތުކޮށް މި ޤައުމަށް ތަރައްޤީ ގެންނަން އެނގޭ ބަޔަކާތޯ މިއީ މިއަދު ދިވެހި ކޮންމެ ރައްޔިތަކު ވިސްނާ ފިކުރު ކުރަންޖެހޭ ކަމެއްކަމަށެވެ.
އިދިކޮޅު ފަރާތްތަކަށް ފާޑުވިދާޅުވެ މިނިސްޓަރ ސަޢީދު ވިދާޅުވީ، ރިޔަސީ އިންތިޚާބުގެ ކެމްޕެއިންގެ ތެރެއިން އިދިކޮޅު ރިޔަސީ ކެނޑިޑޭޓުގެ ފަރާތުން މިހާތަނަށް ވެފައިވާ ވަޢުދުތަކަށް ބަލާއިރު، ހަމައެކަނި ލިބިގެންދަނީ މާޔޫސްކަންކަމަށެވެ. އަދި ޤައުމު ބިނާކުރުމުގެ ޤާބިލުކަން އެމީހުންގެ ކިބައިގައި ނެތްކަން ހާމަވާކަމަށްވެސް މިނިސްޓަރ ސަޢީދު ވިދާޅުވިއެވެ.
"23 ވަނަ ވޯޓަކީ ރާއްޖޭގެ މުސްތަޤުބަލު ބިނާކުރާނެ ވޯޓެއް. ވަރަށް މުހިއްމު 2 ސުވާލެއް ރައްޔިތުންނާއި ކުރިމަތިކުރުވާނެ ދުވަހެއް. އެއީ ކުރިން ފެނިފެނި އުނދަގޫވެފައިވާ ފިލްމެއް ދިވެހިން އަލުން ބަލާނީތޯ، ނުވަތަ ރާއްޖެއަށް އެކި ގޮތްގޮތުން ތަރައްޤީގެނެސްދިން ބަޔަކާއެކު ކުރިއަށްދާނީތޯ ދިވެހިން ނިންމާދުވަސް. އިނދިކޮޅު ފަރާތްތަކުން މިހާތަނަށް އެވީ ވައުދުތަކުން ގެނެސްދެނީ މާޔޫސްކަން. އެބޭފުޅުންގެ ސިޔާސަތުތައް ހުރިގޮތުން ޑޮލަރުގެ ރޭޓު ކުރިއަށްއޮތް 5 އަހަރުގެ ކުރީކޮޅު 18 ރުފިޔާއާއި، 20 ރުފިޔާއާއި ދެމެދު އުފުލިގެންދާނެ. ޤައުމުގެ އިންފްލޭޝަން ރޭޓް 5 އިންސައްތައިން 10 އިންސައްތައަށް މައްޗަށް އަރާނެ. ކޮންސްޓްރަކްޝަން ސިނާޢަތަށް މިއައި ބޫސްޓް ޑީފްލޭޓްވެގެންދާނެ."
އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެ.
މިނިސްޓަރ ސަޢީދު ވިދާޅުވީ، ވިޝަނަރީ ލީޑަރެއް ޤައުމަށް ލިބުމަކީ ދޫކޮށްލަން ހެޔޮވާވަރުގެ ކަމެއް ނޫންކަން މި ޤައުމަށް އަންނަމުންދާ ކުރިއެރުންތަކާއެކު ރައީސް ޔާމީން ސާބިތުކޮށްދީފައިވާ ކަމަށެވެ. އަދި އެކަމުގެ އެންމެ އަލިގަދަ އެއް ހެއްކަކީ ޗައިނާ މޯލްޑިވްސް ފްރެންޑްޝިޕް ބްރިޖު ނުވަތަ ސިނަމާލެ ބްރިޖުކަން އެމަނިކުފާނު ވަނީ ފާހަގަކުރައްވާފައެވެ.
މިނިސްޓަރ ވިދާޅުވީ، ޤައުމަކަށް އިޤްތިޞާދީ ދިރުން ގެނެވޭނީ ފުރިހަމަ މިނިވަންކަން އޮވެގެންކަމަށާއި، ތަރައްޤީގެނެވޭނީ އެ މިނިވަންކަން ދަމަހައްޓަންވެސް އެނގިގެންކަމަށެވެ. ހަމައެހެންމެ މިނިސްޓަރ ސަޢީދު ވަނީ ރައީސް ޔާމީންގެ އިޤްތިޞާދީ ސިޔާސަތުތަކަށް ވަރަށް ބޮޑަށް ތަޢުރީފުކުރައްވާފައެވެ. އެގޮތުން ރާއްޖޭގެ އިޤްތިޞާދުގެ އެންމެ މުހިއްމު 2 ތަނބުކަމަށްވާ ވެލާނާ އިންޓަރނޭޝަނަލް އެއަރޕޯޓާއި، މައި ސީޕޯޓު ތަރައްޤީކުރުމަށް މި ސަރުކާރުން ކުރަމުންދާ މަސައްކަތްތައް މިނިސްޓަރ ފާހަގަކުރައްވާފައިވެއެވެ.