އައްޑޫ މެރަތަންއިން ލިބުނު 27،500 ރުފިޔާ ޓައިނީ ހާރޓްސްއަށް ހަދިޔާކޮށްފިއެވެ. އައްޑޫ މެރަތަންއަކީ އައި ރަނަރސްއިން އިސްނަގައިގެން މިއަހަރުގެ ޖޫންމަހުގެ ތެރޭގައި އައްޑޫސިޓީގައި ބޭއްވި ބައިނަލްއަޤުވާމީ ދުވުމުގެ މުބާރާތެކެވެ.
އައި ރަނަރސްގެ ކޯރ ފައުންޑަރ ހުސައިން ޝުޖާއު ވިދާޅުވީ، މެރަތަންގެ ރަޖިސްޓްރޭޝަނަށް ހުޅުވާޅުމުގެ ކުރިންވެސް ރަޖިސްޓްރޭޝަންގެ 10 އިންސައްތަ ޓައިނީ ހަރޓްސްއަށް ހަދިޔާ ކުރަން އެ ޖަމްޢިއްޔާއިން ނިންމާފައިވާކަމަށެވެ. އަދި ރޭސް ފެށުމުގެ ކުރިން 2 ދުވަހު ބޭއްވި އެކްސްޕޯގެ ތެރެއިންވެސް ޗެރިޓީ ބިބްސް ވިއްކާފައިވާކަމަށެވެ. އެހެންކަމުން މިއީ މެރަތަންގެ ހުރިހާ ބައިވެރިންނާއި، ޗެރިޓީ ބިބްސް ގަތް ފަރާތްތަކުން ޓައިނީ ހަރޓްސްއަށް ވެދިން އެހީއެއްކަމަށް ޝުޖާއު ވިދާޅުވިއެވެ.
"އެންމެ ފުރަތަމަ ރަޖިސްޓްރޭޝަންއަށް ފެށިގެންވެސް ހަމަ ހިރިހާ އެންމެންނަށްވެސް އަންގާފަ އިންނާނީ، ރަޖިސްޓްރޭޝަންގެ %10 ދާނީ ޑޮނޭޝަންގެ ގޮތުގައޭ ޓައިނީ ހަރޓްސްއަށް. ދެން ރޭސް ރަޖިސްޓްރޭޝަންގެ އިތުރަށް ރޭސްގެ ކުރީދެދުވަހު އިންނަ އެކްސްޕޯގައި މާލޭގައި އަދި އައްޑޫގައި ހަމަ އެކްސްޕޯ ހިނގަމުންދިޔަ ތަނުގައި ދިޔައީ ޗެރިޓީ ބިބްސް ވިއްކަމުން. މިދޭތި އެއްކޮށްލާފަ ޓޯޓަލް 27،500 މިވަނީ ހަމަ ޓައިނީ ހަރޓްސްއަށް ޑޮނޭޝަންގެ ގޮތުގައި ރެއިޒް ކުރެވިފައި." އައި ރަނަރސްގެ ކޯރ ފައުންޑަރ ހުސައިން ޝުޖާއު ވިދާޅުވިއެވެ.
ޓައިނީ ހަރޓްސްއިން ވަނީ އައި ރަނަރސްއިން އެޖަމްޢިއްޔާއަށް އެކިގޮތްގޮތުން ވެދެމުންދާ އެހީ ފާހަގަކޮށް ޝުކުރުއަދާކޮށްފައެވެ. އަދި އައްޑޫ މެރަތަންގެ ޗެރިޓީ ޕާރޓްނަރަކަށް ޓައިނީ ހާރޓްސް ހަމަޖެއްސުމަކީ ލިބުނު ޝަރަފެއްކަމަށް ޓައިނީ ހަރޓްސްއިން ބުނެއެވެ. މިއަހަރުގެ މިހާތަނަށް ހިތުގެ އެކިކަންކަމަށް ފަރުވާ ދިނުމަށް ޓައިނީ ހަރޓްސްއިން ވަނީ 10 ކުއްޖަކު ރާއްޖެއިން ބޭރަށް ފޮނުވާފައެވެ.