ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފާދިއްޕޮޅު އޮޅުވެލިފުށްޓަށް ވަޑަގަތުމުން އެރަށުގެ ރައްޔިތުން އެމަނިކުފާނަށް ހޫނު މަރުހަބާއެއް ކިޔައިފިއެވެ.
ރައީސް ޔާމީނަށް މަރުހަބާ ކިއުމަށްޓަކައި ގިނަ ޢަދަދެއްގެ ރައްޔިތުން އޮޅުވެލިފުށި ބަނދަރު ސަރަހައްދަށް ނިކުފައިވެއެވެ. ރައީސް ވަނީ އެމަނިކުފާނަށް މަރުޙަބާކިއުމަށް ޖަމާވި ރައްޔިތުންނާ ބައްދަލުކުރައްވާފައެވެ.
އޮޅުވެލިފުށްޓަށް ވަޑައިގަތުމަށްފަހު ރައީސް ވަނީ ފާދިއްޕޮޅަށް ކުރެއްވި ދަތުރުފުޅު ނިންމާލައްވާފައެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފާދިއްޕޮޅަށް ކުރެއްވި ދެދުވަހުގެ ދަތުރުފުޅުގައި ވަނީ އެއަތޮޅުގައި މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންނާ ބައްދަލުކުރައްވާފައެވެ. އެމަނިކުފާނުގެ މިދަތުރުފުޅުގައި ނައިފަރުގައި ތަރައްޤީކޮށްފައިވާ ބަނދަރާއި ޅ.އަތޮޅު ހޮސްޕިޓަލްގެ އައު ޢިމާރާތްވެސް ވަނީ ހުޅުއްވާދެއްވާފައެވެ. މީގެ އިތުރުން ކުރެންދޫ ގޮނޑުދޮށް ހިމާޔަތްކުރުމުގެ މަޝްރޫޢުގެ ނިމުންވެސް ވަނީ ފާޙަގަކުރައްވާފައެވެ. ފާދިއްޕޮޅަށް ރައީސުލްޖުމްހޫރިއްޔާ ކުރެއްވި ދަތުރުފުޅުގައި އެއަތޮޅުގެ ހުރިހާ ރަށަކުންވެސް ގިނަ ޢަދަދެއްގެ ރައްޔިތުން ނިކުމެ ވަރަށް ހޫނު މަރުހަބާއެއް ކިޔާފައިވެއެވެ.