ޓީޗަރުންގެ ކަންބޮޑުވުންތަކަށް ސަރުކާރުން ސަމާލުކަން ނުދޭކަމަށް ބުނެ، ކަޅު ހެދުން ލައިގެން ގިނަ އަދަދެއްގެ ޓީޗަރުން މިއަދު ކިޔަވައިދިނުމަށް ނިކުމެއްޖެއެވެ.
ޓީޗާސް އެސޯސިއޭޝަނުން ބުނީ މިއަދުގެ ހަރަކާތަކީ ސަރުކާރަށް އޮތް އިންޒާރެއް ކަމަށާއި، ސަރުކާރުން މިއަދު ޖަވާބުދާރީ ނުވެއްޖެ ނަމަ، މާދަމާއިން ފެށިގެން ރަސްމީ އިހްތިޖާޖްތަކެއް ފަށާނެކަމަށެވެ. އެގޮތުން އޮފީހަށް ނިކުމެ، ސޮއި ކުރުމަށްފަހު އެއްވެސް ޓީޗަރަކު ކިޔަވައިދޭން ނުގޮސް، ސްޓާފް ރޫމްތަކުގައި މަޑުކުރާގޮތަށް ނިންމާފައިވާކަމަށާއި، މިކަން ހުއްޓާލާނީ ޓީޗަރުންގެ ކަންބޮޑުވުންތައް ހައްލުކޮށްދިން އިރަކުން ކަމަށް ޓީޗާރސް އެސޯސިއޭޝަނުން މައުލޫމާތުދެއެވެ. މިއަދުގެ ހަރަކާތުގައި ބައިވެރިވުމުގެ ގޮތުން މާލެ އާއި އަތޮޅުތަކުން ގިނަޢަދަދެއްގެ ރާއްޖޭގެ ޓީޗަރުން ކަޅު ހެދުމުގައި ނިކުމެފައިވާކަމަށް އެ އެސޯސިއޭޝަނުން ބުނެއެވެ.
އިހްތިޖާޖްތައް ފެށުމުގެ ކުރިން އެކަމާއި ގުޅޭ މައުލޫމާތު ދިނުމަށް ހުކުރު ދުވަހުގެ ރޭ އަމީނިއްޔާ ސްކޫލްގައި ވަނީ މާލޭ ސްކޫލްތަކުގެ ޓީޗަރުންނަށް އަމާޒުކޮށް ބައްދަލްވުމެއްވެސް ބާއްވާފައެވެ. ޓީޗާސް އެސޯސިއޭޝަނުން އިސްނަގައިގެން މީގެ ކުރިންވެސް ވަނީ ޓީޗަރުންގެ މުސާރައިގެ މައްސަލަތަކާއި ގުޅިގެން މިފަދަ އިހްތިޖާޖްތަކެއް ބާއްވާފަ. ކުރިން ބޭއްވުނު އިހްތިޖާޖްތަކުގައި އެއްވެސް ޓީޗަރަކު ބައިވެރިނުވުމަށް އެޑިއުކޭޝަން މިނިސްޓްރީން އަންގާފައިވާއިރު، މިފަހަރުގެ އިހްތިޖާޖްތަކާއި ގުޅިގެން އެ މިނިސްޓްރީން އަދި ވަކި އެއްޗެއް ބުނެފައެއް ނުވެއެވެ.