ފަސޭހަ މަދަދު ފޭސް 2 އަދި އިނޮވޭޓިވް ފައިނޭންސް ސްކީމަށް ކުރިމަތިލުމުގެ މުއްދަތު އިތުރުކޮށްފި

ޒުވާނުންނަށް ޙާއްސަކޮށްގެން ސަރުކާރުން ލޯންޗްކޮށްފައިވާ 2 ލޯން ސްކީމަކަށް ކުރުމަތިލުމުގެ މުއްދަތު އިކޮނޮމިކް މިނިސްޓްރީން އިތުރުކޮށްދީފިއެވެ.

މި 2 ލޯން ސްކީމަކީވެސް އިސްލާމިކް ފައިނޭންސް އުސޫލުން އިސްލާމިކް ޑިވެލޮޕްމަންޓް ބޭންކް، އައި.ޑީ.ބީގެ އެހީއާއެކު ބޭންކް އޮފް މޯލްޑިވްސް އިސްމާލިކްއާއި އިކޮނޮމިކް މިނިސްޓްރީއާއި ޕަބްލިކް ސަރވިސް މީޑިއާ، ޕީ.އެސް.އެމް ގުޅިގެން ކުރިއަށްގެންދާ 2 ޕްރޮގްރާމެކެވެ.

މި 2 ލޯން ސްކީމަށްވެސް ކުރިމަތިލުމުގެ މުއްދަތު މިމަހުގެ ނިޔަލަށް ހަމަވާގޮތަށް ކުރިން އޮތްނަމަވެސް، އިކޮނޮމިކް މިނިސްޓްރީން މިހާރު ވަނީ އަންނަ މަހުގެ 10 ވަނަ ދުވަހުގެ ނިޔަލަށް މިމުއްދަތު އިތުރުކޮށްފައެވެ. އަދި މިގޮތަށް ނިންމީ މި 2 ސްކީމަށްވެސް ޒުވާނުންގެ ފަރާތުން ލިބެމުންދާ ތަރުޚީބަށް ބަލާ، އަދިވެސް ގިނަ ފަރާތްތަކަކުން މި 2 ސްކީމުގައި ބައިވެރިވުމަށް އެދޭތީ، އެފަރާތްތަކަށް ފުރުޞަތު ދިނުމުގެ ގޮތުންކަމަށް އިކޮނޮމިކް މިނިސްޓްރީން ބުނެފައިވެއެވެ. އެގޮތުން ބަންދު ނޫން ކޮންމެ ދުވަހެއްގެ ހެނދުނު 10 އިން މެންދުރު 12 ޖެހުމާއި ހަމައަށް އިކޮނޮމިކް މިނިސްޓްރީއާއި، އެމިނިސްޓްރީން އަތޮޅުތަކުގައި ޤާއިމުކޮށްފައިވާ ބިޒްނަސް ސެންޓަރުތަކުން ފޯމް ބަލައިގަތުމަށް ހަމަޖެހިފައިވާކަމަށް އެ މިނިސްޓްރީން ބުނެއެވެ.

އިކޮނޮމިކް މިނިސްޓްރީން އަލަށް ތަޢާރަފުކުރި މި 2 ލޯން ސްކީމުގެ ތެރެއިން ފަސޭހަ މަދަދު ފޭސް 2 ތަފާތު 6 ދާއިރާއަކަށް ޚާއްސަ ކޮށްފައިވާއިރު، މީގެ ތެރޭގައި ހިމެނެނީ ގަރާޖު އަދި މެކޭނިކަލް ވޯކްޝޮޕް ހިންގުން، ކަނޑު އުޅަނދުފަހަރުގެ އިންޖީނު މަރާމާތުކުރުމާއި، އެތަކެއްޗަށް ބޭނުންވާ ސްޕެއަރ ޕާޓްސް ހޯދުން، ކޮންސްޓްރަކްޝަން ބްލޮކްސް އުފެއްދުން، ވަނޑާންކުރުން، ވޯޓަރ ސްޕޯޓްސް ކުރިއެރުވުމާއި، ޑައިވް ސެންޓަރުތައް ހިންގުން ހިމެނެއެވެ. އަދި އިނޮވޭޓިވް ފައިނޭންސް ސްކީމް ޙާއްސަކޮށްފައިވަނީ ރާއްޖޭގެ މުނިފޫހިފިލުވުމުގެ ދާއިރާގައި ހަރަކާތްތެރިވާ ޕްރޮޑަކްޝަން ހައުސްތަކާއި، މީޑިއާ ކުންފުނިތަކަށް ބޭނުންވާ ތަފާތު އިކުއިޕްމަންޓްސް ހޯދުމަށާއި، އެކިކަހަލަ އުފެއްދުންތައް އުފެއްދުމަށެވެ.

ފަސޭހަ މަދަދު ފޭސް 2 އަކީ ޖުމްލަ 74 މިލިއަން 16 ހާސް ރުފިޔާގެ ފަންޑަކާއެކު ހިންގާ ޕްރޮގްރާމެކެވެ. އަދި އިނޮވޭޓިވް ފައިނޭންސް ސްކީމަކީ 7 މިލިއަން 7 ސަތޭކަ 10 ހާސް ރުފިޔާގެ ފަންޑަކާއެކު ހިންގާ ޕްރޮގްރާމެކެވެ. 18 އަހަރުން މަތީ ކޮންމެ ދިވެއްސަކަށްވެސް މި 2 ލޯން ސްކީމަށް ކުރިމަތިލެވޭއިރު، ލޯން ދޫކުރާނީ އެފަރާތަކުން ހުށައަޅާ ޕްރޮޕޯސަލްތައް، އެކަމަށް ޚާއްސަ ކޮމެޓީއަކުން އިވެލުއޭޓް ކުރުމަށްފަހު، އެންމެ އެކަށީގެންވާ ފަރާތްތަކަށް ކަމަށް އިކޮނޮމިކް މިނިސްޓްރީން ބުނެއެވެ.