ކުދި ވިޔަފާރިތަކުން ދައްކަންޖެހޭ ޓެކުހާ ގުޅޭ ހުރިހާ ޖޫރިމަނާތައް މަޢާފުކޮށްދިނުމަށް މީރާއިން ނިންމައިފިއެވެ.
ދައުލަތުގެ ޓެކްސް އިދާރާ، މީރާއިން ބުނީ ކުދި ވިޔަފާރިތަކުން ދައްކަންޖެހޭ ޓެކުހާގުޅޭ ޖޫރިމަނާތައް މަޢާފްކޮށްދިނުމަށް ނިންމާފައިވަނީ އެ އޮތޯރިޓީން ޖޫރިމަނާ މަޢާފުކުރުމުގައި މިހާރު ވެސް ޢަމަލުކުރަމުންދާ ޢާއްމު އުޞޫލުގެ އިތުރުން، ކުދި ވިޔަފާރިތަކަށް ދޭ ޚާއްޞަ ޢިނާޔަތެއްކަމަށެވެ.
މީރާއިން ބުނީ މަޢާފްކޮށްދިނުމަށް ނިންމާފައިވަނީ ބީ.ޕީ.ޓީ، ވިތްހޯލްޑިންގ ޓެކްސް، ޖީ.އެސް.ޓީ އަދި ގްރީން ޓެކްސްގެ ގޮތުގައި ދައްކަންޖެހޭ ފައިސާއިން މިއަހަރުގެ ޖޫން މަހުގެ ނިޔަލަށް އަރާފައިވާ ޖޫރިމަނާ ކަމަށެވެ. ޖޫރިމަނާ މަޢާފްކޮށްދެވޭނީ ޓެކްސް ދައްކާ ފަރާތްތަކުން ފުރިހަމަކުރަންޖެހޭ އެންމެހައި އިލްތިޒާމްތައް ފުރިހަމަކޮށްފައިވާ ފަރާތްތަކަށްކަމަށާއި، މިކަމަށްއެދި މީރާގެ ނައިންޓެން ފޯމު ހުށަހެޅުމުން އެކަން ހަމަޖެހޭނެކަމަށް އެ އިދާރާއިން ބުނެއެވެ.
ކުދި ވިޔަފާރިތަކުގެ ގޮތުގައި މީރާއިން ގިންތި ކޮށްފައިވަނީ އަހަރަކު 10 މިލިއަން ރުފިޔާއަށް ވުރެ މަދުން ޢާމްދަނީ ލިބޭ ވިޔަފާރިތަކެވެ.
މީރާއިން ކުދި ވިޔަފާރިތަކަށް ދޭ މި ޚާއްޞަ އިނާޔަތް ދިނުމަށް ހަމަޖެހިފައިވަނީ 27 އޮގަސްޓް އިން 27 އޮކްޓޫބަރު ގެ ނިޔަލަށެވެ. މީރާއިން މިދިޔަ އަހަރުވެސް ވަނީ ކުދި ވިޔަފާރިތަކުގެ ޖޫރިމަނާ މަޢާފްކޮށްދީފައެވެ.