"ފަރަހިކި ޗެލެންޖް 2018" ގެ ނަމުގައި ލ. އަތޮޅުގައި ބާއްވާ އެންމެ ފުރަތަމަ ރާޅާއެޅުމުގެ މުބާރާތް ފެށުމަށް ތައްޔާރުވެއްޖެއެވެ. މިމަހުގެ 30 އިން އަންނަ މަހުގެ 1 ވަނަ ދުވަހުގެ ނިޔަލަށް ކުރިއަށްދާ މިމުބާރާތަކީ ހެވީލޯޑް މޯލްޑިވްސްގެ ސަބްސިޑަރީ ކުންފުނި، މޯ ހޮޓެލްސް އެންޑް ރިސޯޓްސްއިން އިންތިޒާމުކޮށްގެން ކުރިއަށްގެންދާ މުބާރާތެކެވެ.
މި މުބާރާތަކީ އަތޮޅުތަކުގައި އުޅޭ ރާޅާއަޅަން ބޭނުންވާ ޒުވާނުންނަށް ފުރުސަތު ހޯދައިދިނުމުގެ ގޮތުން ކުރިއަށްގެންދާ އިވެންޓެއްކަމަށް މޯ ހޮޓެލްސް އެންޑް ރިސޯޓްސްއިން ބުނެއެވެ. މި މުބާރާތުގައި ރާއްޖޭގެ އެންމެ ހުނަރުވެރި ރާޅާ އެޅުންތެރިން ބައިވެރިވާނެއެވެ. އެގޮތުން 8 ރަށަކުން ޖުމްލަ 46 ރާޅާ އެޅުންތެރިން މި މުބާރާތުގައި ބައިވެރިވާނެކަމަށް އެކުންފުނިން ބުނެއެވެ.
މިއީ މޯ ހޮޓެލްސް އެންޑް ރިސޯޓްސްއިން ޢާންމު އިޖްތިމާއީ ޒިންމާގެ ދަށުން ހިންގާ އެންމެ ބޮޑު ޙަރަކާތްކަމަށް އެ ކުންފުނިން ބުނެއެވެ. މުބާރާތް ކުރިއަށް ދާނީ ލ. މާބައިދޫގެ ރާޅުގަނޑު ސަރަހައްދުގައެވެ. މިއީ ރާއްޖޭގައި ހުރި އެންމެ ބިޔަ ރާޅު ނަގާ އެއް ސާފް ޕޮއިންޓެކެވެ.
"ފަރަހިކި ޗެލެންޖް 2018"ގެ ސްޕޮންސަރުންނަކީ މޯލްޑިވިއަން، ސީ ސްޕޯޓްސް، އޭޑީކޭ ޖެނެރަލް ޓްރޭޑިން، ދިރާގު، އަދި ލިކުއިޑް ޑެސްޓިނޭޝަން އެވެ.