ރިޔާސީ އިންތިޚާބަށް ޓްރެއިނަރުން ތަމްރީންކުރުމުގެ ޕްރޮގްރާމެއް ފަށައިފި

ރިޔާސީ އިންތިޚާބަށް ޓްރެއިނަރުން ތަމްރީން ކުރުމުގެ ޕްރޮގްރާމެއް އިލެކްޝަންސް ކޮމިޝަނުން ފަށައިފިއެވެ. މިއަދުން ފެށިގެން 7 ދުވަހުގެ މުއްދަތަކަށް ބާއްވާ މި ޕްރޮގްރާމް ކުރިއަށްދަނީ އިލެކްޝަންސް ކޮމިޝަންގެ އިންތިޚާބާބެހޭ މައި މަރުކަޒުގައެވެ.

މިއަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ޓްރެއިނަރުން ތަމްރީން ކުރުމުގެ ޕްރޮގްރާމް ރަސްމީކޮށް ފަށްޓަވައިދެއްވީ އެކަމަށްޓަކާ ބޭއްވި ޚާއްސަ ރަސްމިއްޔާތެއްގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗް.އާރ.ސީ.އެމްގެ ނާއިބު ރައީސް މުޙައްމަދު ޒާހިދެވެ. މި ރަސްމިއްޔާތުގައި ވާހަކަފުޅުދައްކަވަމުން ޒާހިދު ވިދާޅުވީ، ރިޔާސީ އިންތިޚާބުގައި ވޯޓުލާ ދުވަހަކީ ޑިމޮކްރެޓިކް ޤައުމެއްގެ ޙާޔާތުގައި އަންނާނެ އެންމެ މުހިއްމު ދުވަސްކަމަށެވެ. އަދި ކުރިއަށް އޮތް 5 އަހަރަށް ޤައުމު ހިންގުމާ ޙަވާލުވާނެ ވެރިއަކު ހޮވުމަށް ރައްޔިތުން ނުކުމެ، ވޯޓުލާއިރު، ޤާނޫނުތަކާއި ޤަވާޢިދުތަކާ އެއްގޮތަށް އެކަން ކުރުމުގެ ފުރުޞަތު ފަހިކޮށްދިނުމުގެ މަސްއޫލިއްޔަތު، ޒިންމާދާރުކަމާއެކު އަދާކުރުން މުހިއްމުކަމަށް އޭނާ ވިދާޅުވިއެވެ.

"އަޅުގަނޑުމެން ޤައުމުގެ އެންމެ އިސްވެރިއަކަށް ބަހައްޓާނީ ކާކުތޯ ނިންމަން ރައްޔިތުން ނިކުމެ އެކަންކުރާއިރު، ދިވެހިރާއްޖޭގެ ޤާނޫނު އަސާސީއާއި، ޤާނޫނުތަކާ ޤަވާއިދުތަކުގެ ތެރެއިން އެކަން ކުރުމަށް އެ ފުރުޞަތު، އެމަގު ފަހިކޮށްދިނުމަށްޓަކާ އެކަން ކުރުމަށް ހަވާލުވާ މީހުންނަށް ބޭނުންވާ މަޢުލޫމާތު ފޯރުކޮށްދިނުމުގެ މައްސޫލިއްޔަތު ޒިންމާދާރުކަމާއެކު އަދާކޮށްދެއްވުމަކީ އެޗް.އާރ.ސީ.އެމްގެ ވަރަށް ބޮޑު އެދުމެއް"

ޒާހިދު ވިދާޅުވިއެވެ.

މި ރަސްމިއްޔާތުގައި ވާހަކަފުޅުދައްކަވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފު ވިދާޅުވީ، މި ޕްރޮގްރާމްގެ ތެރެއިން ތަމްރީންވެގެން ނިކުންނަށް ފަރާތްތަކާއި، ޖުމްލަކޮށް ރިޔާސީ އިންތިޚާބުގައި އޮފިޝަލުންގެ ގޮތުގައި ޙަރަކާތްތެރިވާ ފަރާތްތަކަކީ ސިޔާސީ ވަކި ފިކުރަކުން އެއްކިބާވެ، ނަޒާހަތްތެރިކަން ކުރިއަށްނެރޭ ބަޔަކަށް ވާންޖެހޭނެކަމަށެވެ. އަދި މި ޕްރޮގްރާމް ފުރިހަމަ ކުރާ ޓްރެއިނަރުން، ރާއްޖޭގެ އެކި ކަންކޮޅުތަކަށްގޮސް، އިންތިޚާބީ މަރުކަޒުތަކުގައި ހަރަކާތްތެރިވާ އޮފިޝަލުން ތަމްރީނުކުރުމުގައި ސަމާލުކަން ދޭންޖެހޭ ކަންތައްތައް ޝަރީފް ވަނީ ފާހަގަކުރައްވާފައެވެ.

"ވޯޓުލާން އަންނަ މީހުންނަށާއި، ވޯޓުލުން އޮބްޒާވްކުރަން ތިއްބަވާ ބޭފުޅުންނަށް އިޙްސާސްވާންވީ ވަރަށްހާމައޭ މިކަންތައްތައް ހިނގާގޮތް. އެއްވެސް ވަރަކަށް އެއްވެސް ފަރާތަކުން އިންތިޚާބުގައި އޮޅުވާލުމާއި، ވޯޓުލުމާއި ވޯޓުގުނުމުގެ މަރުހަލާގެ ކަންތައްތައް ހިނގަމުންދާއިރު އޮޅުވާލުމާއި މަކަރެއް ހެދުމުގެ ފުރުޞަތު ނެތްކަން އެބޭފުޅުންނަށް ހާމަވާ ވަރަށް ތިބޭފުޅުން އެބަޖެހޭ އޮފިޝަލުން ތަމްރީންކޮށްދޭން"

އަޙްމަދު ޝަރީފު ވިދާޅުވިއެވެ.

މި ޕްރޮގްރާމުގައި މައިގަނޑުގޮތެއްގައި ތަމްރީން ދިނުމަށް ހަމަޖެހިފައިވާ ކަންތައްތަކާ ގުޅޭގޮތުން ވާހަކަދައްކަވަމުން މި ޕްރޮގްރާމްގެ މާސްޓަރ ޓްރެއިނަރ ޢަބްދުﷲ ރާޒީ ވިދާޅުވީ، ރިޔާސީ އިންތިޚާބާއި ގުޅޭގޮތުން ރާއްޖޭގައި ހެދިފައިހުރި ޤާނޫނުތަކާއި ޤަވާއިދުތަކާ ގުޅޭގޮތުން ޓްރެއިނަރުންނަށް ތަމްރީން ދެވިގެންދާނެކަމަށެވެ. އަދި ވޯޓުލާ ދުވަހު ހިނގާފާނެކަމަށް ބެލެވޭ ކަންތައްތަކާއި، އެކަންކަމަށް ޖަވާބުދާރީވުމުގައި ވިސްނަންޖެހޭނެ ކަންކަމާގުޅޭގޮތުން ޢަމަލީގޮތުން ތަޖުރިބާކުރުމުގެ ފުރުޞަތު ބައިވެރިންނަށް ލިބިގެންދާނެކަމަށެވެ.

7 ދުވަހުގެ މުއްދަތަކަށް ކުރިއަށްގެންދާ ޕްރޮގްރާމުގައި ރާއްޖޭގެ އެކި ސަރަޙައްދުތައް ހިމެނޭހެން ޖުމްލަ 70 ޓްރެއިނަރުން ތަމްރީން ވެގެންދާނެކަމަށް އިލެކްޝަންސް ކޮމިޝަނުން ބުނެއެވެ. އަދި ކުރިއަށް އޮތްތާނގައި ދާއިމީކޮށް ޓްރެއިނަރުން އެކޮމިޝަނަށް ނެގުމުގެ ވިސްނުން ގެންގުޅެމުންދާކަމަށާއި، އެކަމާމެދު ކޮމިޝަންގެ ތެރޭގައި މަޝްވަރާކުރަމުންދާކަމަށްވެސް އެކޮމިޝަނުން ބުނެއެވެ.