ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށާއި، އެމަނިކުފާނުގެ ސަރުކާރަށް ތާޢިދުކުރުމުގެ ގޮތުން ގދ. ފިޔޯރީގައި ސައިކަލް ބުރެއް ބާއްވައިފިއެވެ.
މި ސައިކަލު ބުރުގައި އެދާއިރާގެ މެންބަރު ޙުސައިން މުޙައްމަދު ލަޠީފާއި، ފިޔޯރީގެ ގިނަ ޢަދަދެއްގެ ޒުވާނުންނާއި ކަނބަލުން ބައިވެރިވިއެވެ. ޕީ.އެސް.އެމް ނިއުސްއަށް މައުލޫމާތުދެއްވަމުން ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް ވިދާޅުވީ، ޕީޕީއެމުން ބޭއްވި ހަރަކާތަކީ، ފިޔޯރީގެ ރައްޔިތުން ތިބީ ރައީސް ޔާމީނާއި އެކުގައިކަން ހާމަކޮށްދިނުމުގެ ގޮތުން ކުރިއަށްގެންދިޔަ ހަރަކާތެއްކަމަށެވެ.
މިއަދު ހަވީރު ކުރިއަށްގެންދިޔަ މިސައިކަލުބުރގައި ސަރުކާރަށް ތާޢީދުކޮށް ޒުވާނުން ޝުޢޫރު ފާޅުކޮށްފައިވެއެވެ. މެންބަރު ޙުސައިން މުޙައްމަދު ލަޠީފް ވިދާޅުވީ، ކުރިއަށްވެސް ގިނަ ހަރަކާތްތަކެއް އެބަހުރިކަމަށާއި، އެގޮތުން ފަރެސްމާތޮޑާ ދާއިރާގެ ރަށްތަކުގައި ޕީޕީއެމްގެ ޖަގަހަތައް ހުޅުވުމާއި އެނޫންވެސް ތަފާތު ހަރަކާތްތައް ކުރިއަށްގެންދިއުމަށް ނިންމާފައިވާކަމަށެވެ.
ކުރިއަށްއޮތް ރިޔާސީ އިންތިޚާާބުގައި ރައީސް ޔާމީނަށް ތާއީދުކުރާކަން ހާމަކުރުމަށްޓަކައި ރާއްޖޭގެ އެކި ކަންކޮޅުތަކުގައި ޒުވާނުން އިސްވެ ސައިކަލުބުރުތަކާއި، ހިނގާލުންތަކާއި އެނޫންވެސް ގިނަ ހަރަކާތްތައް އަންނަނީ ބާއްވަމުންނެވެ.