މިސަރުކާރުން ރާއްޖޭގެ މީހުން ދިރިއުޅޭ ރަށްރަށް ފަޅު ނުކުރާނެކަމަށާއި، މާލޭ ސަރަޙައްދަށް މީހުން ޖަމާވުމަށް މަޖުބޫރުކުރުވުމަކީ ރައީސް ޔާމީންގެ ސިޔާސަތެއް ނޫންކަމަށް މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު ވިދާޅުވެއްޖެއެވެ. ހައުސިންގ މިނިސްޓަރ ޑރ. މުޢިއްޒު ވިދާޅުވީ، މި ސަރުކާރުން ތަރައްޤީގެ މަޝްރޫޢުތައް ކުރިއަށްގެންދަނީ މާލޭ ސަރަޙައްދުގައި އެކަނި ނޫންކަމަށާއި، މުޅި ރާއްޖެއަށް ނަޒަރު ހިންގާލުމުންވެސް ތަރައްޤީގެ މަޝްރޫޢުތައް ކުރިއަށްގެންދާ މަންޒަރު ފެނިގެންދާނެކަމަށެވެ.
ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ސަރުކާރުން އިޢުލާންކޮށްފައިވާ "ހިޔާ އެކޮމްޕްލިޝްޓް" ނުވަތަ "އެންމެނަށް ހިޔާ ކަށަވަރު" މަޝްރޫޢާއެކު އަތޮޅުތަކުގައި މީހުން ދިރިއުޅޭ ރަށްރަށްފަޅުވެ، މާލޭގެ ތޮށްޖެހުން އިތުރުވެގެންދާނެކަމަށް ބުނެ ދެކެވޭ ވާހަކަތަކާއި ގުޅޭގޮތުން ހައުސިންގ މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހައުސިން މިނިސްޓަރ ޑރ. މުޙައްމަދު މުޢިއްޒު ވިދާޅުވީ، "ހިޔާ އެކޮމްޕްލިޝްޓް" މަޝްރޫޢަކީ އެއްވެސް ހާލެއްގައި މާލޭގެ ތޮއްޖެހުން އިތުރުކުރުމަށްޓަކާ ހިންގާ މަޝްރޫޢެއް ނޫންކަމަށެވެ.
އަދި މިއީ އެކަމަށް ބޭނުންވާ ދިރާސާތައް ކުރުމަށްފަހު، ވަރަށް ބޮޑަށް ޕްލޭންކުރެވިގެން، ސަރުކާރުން ހިންގާ ބިޔަ މަޝްރޫޢެއްކަމަށް މިނިސްޓަރ މުޢިއްޒު ވިދާޅުވިއެވެ. މާލޭގެ މިހާރުގެ އާބާދީއަކީވެސް ބިމުގެ ޖާގައިގެ ނިސްބަތަށް ބަލާނަމަ، އެކަށީގެންނުވާ ވަރުގެ އާބާދީއެއްކަން ބޭރުގެ މާހިރުން އެކި ފަހަރުމަތިން ފާހަގަކޮށްފައިވާކަން ފާހަގަކުރައްވާ ޑރ. މުޢިއްޒު ވިދާޅުވީ، މިފަދަ މަޝްރޫޢަކާއެކު މާލޭ ސަރަޙައްދު އިތުރަށް ތޮއްޖެހިގެންދާނެކަމަށް ދެކެވަޑައިނުގަންނަވާކަމަށާއި، އޭގެ ބަދަލުގައި މި މަޝްރޫޢު ވެގެންދާނީ ޒަމާނީ ސިޓީއެއްގެ ގޮތުގައި މާލެ ތަރައްޤީކޮށް، އާބާދީ ފެތުރިގަންނަން ލިބޭ ފުރުޞަތަކަށް ކަމަށް މިނިސްޓަރ ވިދާޅުވިއެވެ.
"1980 ވަނަ އަހަރުން ފެށިގެން މިއަދާހަމައަށް އެކިއެކި މާހިރުން އައިސް ހަދާފައިހުރި ރިޕޯޓްތައް އެބަހުރި. އެންމެ ގިނަވެގެންވެސް 60 ހާސް، ނުވަތަ 50 ހާހެއްހައި މީހުން އުޅެންޖެހޭތަނެއް މިތަނަކީ. އެކަމަކުވެސް އެއަށްވުރެ އާބާދީ ބޮޑު މާލޭގެ. މާލެއިން ބޭރަށްވެސް ބައެއް ބޭފުޅުން މިތަން ތަރައްޤީވީމަ ފްލެޓް ހޯއްދަވައިގެން ނުވަތަ ގޯއްޗެއް ހޯއްދަވައިގެން ވަޑައިގަންނަވާނެ. އޭރުން މާލެއަށްވެސް ތަރައްޤީކުރުމުގައި އިތުރު ޖާގަލިބި، ފަސޭހަވެގެންދާނެ. މޮޑާން ސިޓީއަކަށް ބަދަލުކުރުމުގައި އިތުރު ފުރުޞަތުތައް އެބަލިބޭ އޭރުން"
ޑރ. މުޙައްމަދު މުޢިއްޒު ވިދާޅުވިއެވެ.
ހައުސިންގ މިނިސްޓަރ ޑރ. މުޢިއްޒު ވިދާޅުވީ، މި މަޝްރޫޢުގެ ދަށުން 3 ލައްކައަށް ވުރެ ބޮޑު އާބާދީއަކަށް ބޯހިޔާވަހިކަން ކަށަވަރުކޮށްދިނުމަށްޓަކާ 82000 ހައުސިންގ ޔުނިޓް ތަރައްޤީކުރުމަށް ރައީސް ޔާމީން ނިންމަވާފައިވާއިރު، މިފަދަ ބިޔަ މަޝްރޫޢެއްގެ ސަބަބުން ޢުމްރާނީ ތަރައްޤީއާއި ގުޅުހުންހުރި އެހެނިހެން މަޝްރޫޢުތަކަށް އެއްވެސް ބަދަލެއް ނާންނާނެކަމަށެވެ. އަދި މިއީ އެއްވެސް ހާލެއްގައި ރާއްޖޭގެ ރަށްރަށް ފަޅުކޮށް، މާލެއަށް މީހުން ހިޖުރަކުރުން މަޖުބޫރުކުރުވުމަށްޓަކާ ސަރުކާރުން ހިންގާ މަޝްރޫޢެއް ނޫންކަމަށްވެސް އެމަނިކުފާނު ވިދާޅުވިއެވެ. މިނިސްޓަރ މުޢިއްޒު ވިދާޅުވީ، ރައްޔިތުންގެ ވެރިކަމެއް ހިންގުމަކީ ރައްޔިތުން އެދޭ ތަރައްޤީ ގެނެސްދެއްވުން ކަމަށާއި، އެ އަމާޒަށް ވާސިލުވުމުގައި ރައީސް ޔާމީން ކާމިޔާބު ހޯއްދަވާފައިވާ ކަމަށެވެ. އަދި ރާއްޖޭގެ މީހުން ދިރިއުޅޭ ރަށްރަށް ފަޅުކުރުމަކީ މި ސަރުކާރުގެ ސިޔާސަތެއް ނޫންކަމަށްވެސް ޑރ. މުޢިއްޒު ވިދާޅުވިއެވެ.
"އެރަށެއްގައި ދިރިއުޅެން ބޭނުންވާ ބަޔަކަށް އެރަށެއްގައި ދިރިއުޅުމުގެ ފުރުޞަތު އޮންނާނެ. އެއްވެސް ބަޔަކު ގަދަކަމަކުން ރަށަކުން ނުބާލާނެ މި ސަރުކާރަކުންނެއް. އެރަށެއްގެ ރައްޔިތުން އެރަށެއްގައި އުޅެން ބޭނުންވާހާ ހިނދެއްގައި އެކަންކަން ފުރިހަމަކޮށްދެއްވާފައި އެހުރީ. މިހާރުވެސް އެ މަސައްކަތް މިދަނީ ކުރިއަށްގެންދަމުން. ދަތުރުފަތުރުގެ ނިޒާމަށް ބަލާލިޔަސް، ވަރަށް ބޮޑުތަނުން ގާތްކޮށްދެއްވައިފި ރައީސް ޔާމީން. ކުރީގައި އޮތީ މަދު އެއަރޕޯޓުތަކެއް. އެކަމު މިހާރު އެތައް އެއަރޕޯޓުތަކެއް ތަރައްޤީކުރަމުން އެބަދޭ.. އެންމެ ދުރުގައި އޮންނަ، އަދި އެންމެ ކުޑަ ރަށުގައި ދިރިއުޅޭ މީހާއަށްވެސް އެންމެ ކައިރީގައި އޮންނަ އެއަރޕޯޓަކުން ދަތުރުކުރުމުގެ ފުރުޞަތު އެމަނިކުފާނު އެގެންދަވަނީ ފަހިކޮށްދެއްވަމުން. އެހެންވީމަ އެއްވެސް ހާލެއްގައި ރަށްތައް ފަޅުކޮށް، ހުރިހާ އެންމެން މާލެއަށް ގެނެއުމުގެ ވިސްނުމެއް ނެތް"
ޑރ.މުޙައްމަދު މުޢިއްޒު ވިދާޅުވިއެވެ.
"ހިޔާ އެކޮމްޕްލިޝްޓް"ގެ ނަމުގައި ވިލިމާލެ 2 ތަރައްޤީކުރުމުގެ މަޝްރޫޢު ސަރުކާރުން މިހާރު އިޢުލާންކޮށްފައިވާއިރު މި މަޝްރޫޢު ކުރިއަށްގެންދިއުމަށް ނިންމާފައިވަނީ މައިގަނޑު 2 ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ ދަށުން ގުޅީފަޅުން 230 ހެކްޓަރުގެ ބިން ހިއްކާ އެތަނުގައި ފްލެޓްތައް އެޅުމަށް ވަނީ ހަމަޖެހިފައި. އަދި ދެވަނަ ފިޔަވަހީގެ ދަށުން މާލޭ ކައިރީގައި އޮންނަ ފުށިދިއްގަރު ފަޅުން 800 ހެކްޓަރުގެ ބިން ހިއްކާ އެތަނުން ގޯތި ދޫކުރުމަށް ވަނީ ނިންމާފައެވެ.
މި މަޝްރޫޢުގެ ދަށުން ބޯހިޔާވަހިކަން ބޭނުންވާ ކޮންމެ ރައްޔިތަކަށްވެސް ދޫކުރުމަށް ނިންމާފައިވަނީ 1000 އަކަފޫޓުގެ ގޯއްޗެއް ނުވަތަ ހަމަ އެ ސައިޒުގެ އެޕާޓްމަންޓެކެވެ. މި ބިޔަ މަޝްރޫޢުގެ އަމަލީ މަސައްކަތް ފެށުމަށް އީދާރީގޮތުން ވާންޖެހޭ ތައްޔާރީތައް މިހާރު ވަމުންދާއިރު، މި މަޝްރޫޢުގެ ދަށުން ބޯހިޔާވަހިކަން ބޭނުންވާ ފަރާތްތަކަށް އެކަމަށް އެދޭ ފޯމް މިމަހުގެ 7 ވަނަ ދުވަހުން ފެށިގެން 4 މަސް ދުވަހުގެ މުއްދަތަކަށް ދޫކުރުމަށް ވަނީ ހަމަޖެހިފައެވެ.