ރިޔާސީ އިންތިޚާބުގެ ކެމްޕެއިންގެ ހަރަކާތްތަކުގައި ދިވެހި ސިފައިން ބައިވެރިކުރަމުންދާކަމަށް ބުނެ ދައްކަމުންދަނީ ހަޤީޤަތާ ޚިލާފު ދޮގު ވާހަކަތަކެއްކަމަށް ސަރުކާރުން ހާމަކޮށްފިއެވެ.
ޖުމްހޫރީ ޕާޓީން އިއްޔެ ބޭއްވި ޕްރެސްކޮންފަރެންސްގައި، ޕީޕީއެމުން މާލޭގައި ދިދަ ފަތިތައް ދެމުމަށާއި، އެނޫންވެސް ކެމްޕެއިން ހަރަކާތްތަކުގައި ސިފައިން ބޭނުންކުރަމުންދާކަމަށް ބުނެ ދައްކާފައިވާ ވާހަކަތަކަށް ރައްދު ދެއްވަމުން މިނިސްޓަރ އޮފް ޑިފެންސް އެންޑް ނެޝަނަލް ސެކިއުރިޓީ އާދަމް ޝަރީފް އުމަރު ވިދާޅުވީ އެއީ ހަޤީޤަތާ ޚިލާފު ދޮގު ވާހަކަތަކެއް ކަމަށެވެ. އަދި ސިފައިންގެ ކަރާމާތް ގެއްލޭގޮތަށް ދޮގު ވާހަކަތައް ނުފެތުރުމަށް ޑިފެންސް މިނިސްޓަރ އިލްތިމާސްކުރެއްވިއެވެ.
މިނިސްޓަރ ވިދާޅުވީ ސިފައިންނަށް އެއްވެސް ސިޔާސީ ހަރަކާތެއްގައި ބައިވެރިވުމަކީ ޤާނޫނުން މަނާކަމެއްކަމަށާއި ސިޔާސީ ހަރަކާތެއްގައި ބައިވެރިވެއްޖެނަމަ ފިޔަވަޅު އަޅުއްވާނެކަމަށެވެ.
ރިޔާސީ އިންތިޚާބު ކައިރިވަމުންދާއިރު، ސިފައިންނާއި ފުލުހުންނާ ގުޅޭގޮތުން ހަޤީޤަތާ ޚިލާފު ވާހަކަތައް އެކި ފަރާތްތަކުން ދައްކަމުންދާއިރު، އެމްއެންޑީއެފް އުވާލާނެކަމަށް ބުނި މައްސަލައެއް މިހާރުވެސް ދަނީ ތަހްޤީގުކުރަމުންނެވެ.