ރާއްޖޭގެ ޤައުމީ އެއަރލައިން މޯލްޑިވިއަނުން ހިންގަމުން އަންނަ ޓްރެވަލް އެޖެންސީ "މޯލްޑިވިއަން ހޮލިޑޭސް"ގެ ވެބްސައިޓު ރަސްމީކޮށް ލޯންޗްކޮށްފިއެވެ. މިކަމަށްޓަކާ މިއަދު އައިލެންޑް އޭވިއޭޝަންގެ ހެޑް އޮފީހުގައި ބޭއްވި ރަސްމިއްޔާތެއްގައި މޯލްޑިވިއަން ހޮލިޑޭސްގެ ވެބްސައިޓު ލޯންޗްކޮށްދެއްވީ އެކުންފުނީގެ ޗެއަރމަން އަޙްމަދު ޝަފީޢުއާއި މެނޭޖިންގ ޑިރެކްޓަރ ޢަބްދުލް ހާރިސްއެވެ.
"މޯލްޑިވިއަން ހޮލިޑޭސް" އަކީ ރާއްޖޭގެ ޤައުމީ އެއަރލައިނުން މޯލްޑިވިއަންގެ އެތެރޭގެ އުދުހުންތަކާއި، ރާއްޖޭން ބޭރުގެ އުދުހުންތަކަށް ބޭނުންވާ ޓިކެޓް ރިސަރވޭޝަނާއި، ބުކިންގގެ ޚިދުމަތް ފޯރުކޮށްދިނުމަށްޓަކާ އައިލެންޑް އޭވިއޭޝަނުން އޮޕަރޭޓް ކުރަމުންދާ ޓްރެވަލް އެޖެންސީއެކެވެ. މޯލްޑިވިއަން ހޮލިޑޭސްގެ ވެބްސައިޓް ރަސްމީކޮށް ލޯންޗްކުރުމާއެކު، މޯލްޑިވިއަންގެ ޚިދުމަތް ހޯދުމުގައި ކަސްޓަމަރުންނަށާއި، ފަތުރުވެރިންނަށް އިތުރު ފަސޭހަތަކެއް ލިބިގެންދާނެކަމަށް އެކުންފުނިން ބުނެއެވެ. އެގޮތުން ޓިކެޓް ރިސަރވޭޝަން ހެދުމާއި، ހޮޓެލް އަދި ރިސޯޓް ބުކިންގ އޮންލައިންކޮށް ހެދުމާއި، ރިއަލް ޓައިމްކޮށް ކަސްޓަމަރުންނަށް ނުވަތަ ފަތުރުވެރިންނަށް ކޮންފަމޭޝަން ލިބޭނެކަމަށް މޯލްޑިވިއަންއިން ބުނެއެވެ.
މޯލްޑިވިއަން ހޮލިޑޭސްގެ ވެބްސައިޓު ލޯންޗުކޮށްދެއްވުމަށްފަހު ވާހަކަދައްކަވަމުން އައިލެންޑް އޭވިއޭޝަންގެ ޗެއަރމަން އަޙްމަދު ޝަފީޢު ވިދާޅުވީ، ދިވެހިރާއްޖެއަށް އެތެރެވާ ފަތުރުވެރިންގެ ނިސްބަތަށް ބަލާއިރު، އެންމެ ގިނަ އަދަދެއްގެ ފަތުރުވެރިންނަށް އެންމެ ފުރަތަމަ މަރުޚަބާ ކިޔާ ފަރާތަކީ މޯލްޑިވިއަންކަމަށާއި، އެއީ އެކުންފުންޏަށް ލިބޭ ޝަރަފެއްކަމަށެވެ. އަދި ފަތުރުވެރިކަމުގެ އެއްވަނަ މަންޒިލެއްގެ ގޮތުގައި ދިވެހިރާއްޖެ އިސްތިހާރުކުރުމަށް ސަރުކާރުން ކުރާ މަސައްކަތުގައި އެކުންފުނީގެ ބައިވެރިވުން އިތުރުކޮށް، ހަރުދަނާކުރުމަށްޓަކާ ސަރުކާރުގެ ގުޅުންހުރި އިދާރާތަކާއެކު މިހާރުވެސް މަސައްކަތް ކުރަމުންދާކަމަށް ޝަފީޢު ވިދާޅުވިއެވެ.
"އަޅުގަނޑުމެންގެ މައިގަނޑު އުދުހުންތައް އެތެރޭގައި ކުރިއަށްދާއިރު، ރާއްޖެއަށް ޒިޔާރަތްކުރާ ޓޫރިސްޓުން އެންމެ ފުރަތަމަ ރިސީވްކޮށް އެމީހުންގެ ޑްރީމް ޑެސްޓިނޭޝަންތަކަށް ގެންދާ ބަޔަކީ އަޅުގަނޑުމެން. އެހެންކަމުން ކަސްޓަމަރުންނާއި ކައިރިވެ، ދިވެހިރާއްޖެ ޕްރޮމޯޓްކުރުމަށް އެމް.އެމް.ޕީ.އާރ.ސީ ފަދަ ސަރުކާރުންގެ ކަމާބެހޭ ފަރާތްތަކާއި ގުޅިގެން މިކުރެވޭ މަސައްކަތް އަޅުގަނޑުމެން އެބަޖެހޭ އިތުރަށް ހަރުދަނާކުރަން. ސަބަބަކީ ރާއްޖެއަށް އަންނަ ފަތުރުވެރިންގެ އަދަދު އިތުރުވުމަކީ ރާއްޖޭގެ ފަތުރުވެރިކަމުގެ ދާއިރާގެ އިތުރުން މި ކުންފުނީގެ ވިޔަފާރިއަށާއި ދެމުންދާ ޚިދުމަތްތަކަށް ލިބިގެންދާނެ އިތުރު ކުރިއެރުމެއްކަމަށްވާތީ" ޝަފީޢު ވިދާޅުވިއެވެ.
މި ރަސްމިއްޔާތުގައި ވާހަކަދައްވަމުން އެމްއެމްޕީއާރސީގެ އެކްޓިންގ މެނޭޖިންގ ޑިރެކްޓަރ ޙާރިސް މުޙައްމަދު ވިދާޅުވީ، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 8 މިލިއަނަށް އެރުވުމުގެ އަމާޒަށް ދިވެހިރާއްޖެ މިހާރު މިސްރާބު ޖަހާފައިވާއިރު، މިއީ ޓެކްނޮލޮޖީގެ ޒަމާންކަމަށްވެފައި، ރާއްޖެ ޕްރޮމޯޓްކުރުމުގައި ޓެކްނޮލޮޖީގެ އެހީއާއެކު އައު އިޖާބީ ކަންކަން ތަޢާރަފުކޮށް، އެކަންކަމަށް އަޙުލުވެރިވާންޖެހޭކަމަށެވެ. އަދި މޯލްޑިވިއަން ހޮލިޑޭސްގެ ވެބްސައިޓާއެކު، ރާއްޖެއަށް ޒިޔާރަތްކުރަން ބޭނުންވާ ބޭރުގެ ފަތުރުވެރިންނަށް ޝަޢުގުވެރި މަޢުލޫމާތުތަކެއް ލިބިގެންދާނެކަމަށް އުއްމީދުކުރައްވާ ކަމަށްވެސް ޙާރިސް ވިދާޅުވިއެވެ.
"ރާއްޖެ ކަހަލަ ޖަޒީރާ ޤައުމެއްގައި އެއްތަނުން އަނެއްތަނަށް ދަތުރުކުރަން ހުރި މަގުތައް ފަސޭހައިން ފަތުރުވެރިންނަށް އެނގިގެންދިއުމަކީ އަޅުގަނޑު ޤަބޫލުކުރާގޮތުގައި އެމީހުން ދަތުރުކުރުމަށް ލިބޭ ވަރަށް ބޮޑު ކުރިއެރުމަކަށް ވެގެންދާނެ. ފަސޭހައަކަށް ވެގެންދާނެ. އެމީހުންގެ ވިސްނުމާއި ފިކުރަށާއި، އެމީހުންގެ ބަޖެޓް ބައްޓަންކޮށްލުމަށްޓަކާ ލިބިގެންދާނެ ފަސޭހައަކަށްވެގެންދާނެ" ޙާރިސް ވިދާޅުވިއެވެ.
ޤައުމީ އެއަރލައިން މޯލްޑިވިއަންގެ ޚިދުމަތް ފުޅާކުރުމަށްޓަކާ އައިލެންޑް އޭވިއޭޝަނުން އަންނަނީ ތަފާތު ގިނަ މަސައްކަތް ކުރަމުންނެވެ. 2000 ވަނަ އަހަރު އެންމެ 2 އެއަރކްރާފްޓާއެކު ޚިދުމަތްދޭން ފެށިނަމަވެސް، ފާއިތުވި އަހަރުތަކުގެ ތެރޭގައި އައިލެންޑް އޭވިއޭޝަނުން ވަނީ އެކުންފުނީގެ ފްލީޓުގެ އަދަދު އިތުރުކޮށް، ކުންފުނިން ދެމުން އަންނަ ޚިދުމަތްތައް އިތުރަށް ފުޅާކޮށްފައެވެ. އެގޮތުން ސީޕްލޭންގެ ޚިދުމަތާއި، ވަން-ސްޓޮޕް ޓްރެވަލިންގގެ އިތުރުން ކާގޯގެ ޚިދުމަތް އެކުންފުނިން ފުޅާދާއިރާއެއްގައި ފޯރުކޮށްދެއެވެ.