ރެއާލް މެޑްރިޑްގެ ކްރޮއޭޝިޔާ ކެޕްޓަން ލޫކާ މޮޑްރިޗް ގަތުމަށް އިޓަލީގެ އިންޓަމިލާނުން މަސައްކަތް ފަށައފިއެވެ.
އިޓަލީގެ މީޑިޔާ ރިޕޯޓްތައް ބުނާ ގޮތުގައި އިންޓަމިލާނުން ވަނީ މޮޑްރިޗްގެ އެޖެންޓާ ވާހަކަ ދައްކައި ކުޅުންތެރިޔާ ގަތުމުގެ މަޝްވަރާތައް ކޮށްފައެވެ.
އުމުރުން މިހާރު 33 އަހަރުގެ މޮޑްރިޗަކީ ރަޝިޔާގައި މިދިޔަ މަހު ނިމުނު މުބާރާތުގެ ފައިނަލް ކުޅެ މުބާރާތުގެ މޮޅު ކުޅުންތެރިޔާގެ މަގާމު ހޯދި ކުޅުންތެރިޔާ އެވެ. ނަމަވެސް އޭނާ ގަތުމަމީ އެހާ ފަސޭހަ ކަމެއްނޫނެވެ. ސަބަބަކީ މެޑްރިޑުން މިހާރު އޭނާ އަށް ދެމުން އަންނަ މުސާރައެވެ.
ނަމަވެސް ރެއާލް މެޑްރިޑަށް މިދިޔަ ތިން ސީޒަނުގައި ޗެމްޕިއަންސް ލީގު ކާމިޔާބުކޮށްދިނުމުގައި އެންމެ މުހިންމު ރޯލެއް ކުޅުނު މޮޑްރިޗްގެ ކޮންޓްރެކްޓްގައި ބާކީ އޮތީ އެންމެ ދެ އަހަރެވެ. މިހެންވެ ރަނގަޅު އަގެއް ލިބޭނަމަ އޭނާ ވިއްކާލުމަށް މެޑްރިޑުން ވެސް ޝައުގުވެރިވާ ކަމަށް ރިޕޯޓްތައް ބުނެއެވެ.
އިންޓަމިލާނުން މޮޑްރިޗް ގަތުމަށް ފޯރިއާއެކު މަސައްކަތް ފެށީ 100 މިލިއަން ޔޫރޯ އަށް ރެއާލް މެޑްރިޑުގެ ކްރިސްޓިއާނޯ ރޮނާލްޑޯ ޔުވެންޓަސް އަށް ބަދަލުވުމުންނެވެ.