ބްރެޒިލްގެ ތަރި ނޭމާ ވޯލްޑް ކަޕުގައި ޑައިވްކޮށް ދެއްކި ކަރުކޭހާ ބެހޭ ގޮތުން ކުޅުންތެރިޔާއާ ވާހަކަ ދައްކާނެ ކަމަށް ޕީއެސްޖީގެ ކޯޗު ތޯމަސް ޓުޗެލް ބުނެފިއެވެ.
އޭނާ މިހެން ބުނީ އާ ސީޒަނަށް ތައްޔާރުވުމަށް މިހާރު ކުޅެމުންދާ މުބާރާތުގެ އެންމެ ފަހު މެޗުގެ ކުރިން ނޫސްވެރިން ސުވާލު ކުރުމުންނެވެ.
"އަހަރެން ވަރަށް ފަރުވާތެރިކަމާއެކު އޭނާއާ ވާހަކަ ދައްކާނަން. އެކަމަކު އެއީ ވަކިން. އޭނާގެ ދެ ކަންފަތާއި އަހަރުމެން ދެމީހުން އަނގަ ފިޔަވައި އެހެން އެއްވެސް މެދުވެރިއެއްނެތި އަހަރެން ވާހަކަ ދައްކާނީ. އަހަންނަށް ހީވަނީ އޭނާއާ ކޮންމެ ވާހަކައެއް ވެސް ދެކެވޭނެހެން އަހަންނަށް،" ކޯޗު ބުންޏެވެ.
ދުނިޔޭގެ އެންމެ އަގުބޮޑު ކުޅުންތެރިޔާ ނޭމާ ވަނީ ވޯލްޑް ކަޕުގައި ބްރެޒިލްގެ ގައުމީ ޓީމުގައި ވަރަށް ގިނަ ކަރުކޭސްތައް ދައްކައި މަކަރު ހަދައިފަ އެވެ. މިހެންވެ އޭނާއަށް ވަނީ ވަރަށް ބޮޑަށް ފާޑުކިއުން ވެސް އަމާޒުވެފައެވެ.
ކޯޗު ބުނީ ބާސެލޯނާއިން ޝައުގުވެރިވާ ޕީއެސްޖީގެ މިޑްފީލްޑަރު އެޑްރިއަން ރަބިއޮޓްގެ ކުރިމަގު އޮތީ ކުޅުންތެރިޔާގެ އަތްމަތީގައި ކަމަށެވެ.
"އޭނާ އެބަޖެހޭ އަމިއްލަ އަށް ބުނަން މިކުލަބަށް ކުޅެން ބޭނުންވާނަމަ އެވާހަކަ. ކުލަބުގެ އެކަމީގެ ގްރެޖުއޭޓަކު ކުލަބުން ދިއުމަކީ އެދެވޭ ގޮތެއްނޫން،" ކޯޗު ބުންޏެވެ.