އަންނަ ސެޕްޓެމްބަރ މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވޯޓުލުމަށްޓަކާ 43 ރިސޯޓެއްގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމައިފިއެވެ.
އިލެކްޝަންސް ކޮމިޝަނުން ބުނީ ރިޔާސީ އިންތިޚާބުގައި ވޯޓު ފޮށި ބަހައްޓާނެ ރިސޯޓުތައް ކަނޑައަޅާފައިވަނީ ދެ ފަހަރެއްގެ މަތިން އެކޮމިޝަނުން ހުޅުވާލި ފުރުޞަތައްފަހު ކަމަށެވެ.
ރިސޯޓްތަކުގައި ވޯޓު ފޮށި ބެހެއްޓުމަށް އެންމެ ފުރަތަމަ އިލެކްޝަންސް ކޮމިޝަނުން ހުޅުވާލީ 250 ދިވެހި މުޢައްޒަފުން މަސައްކަތް ކުރާ ރިޒޯޓުތަކުގައި އެކަންޏެވެ. އެގޮތުން 7 ރިސޯޓެއްގައި ވޯޓު ފޮށި ބެހެއްޓުމަށް ކުރިން އެކޮމިޝަނުން ނިންމި ނަމަވެސް ރިސޯޓްތަކުގެ މުޢައްޒަފުންނާއި، ސިޔާސީ ޕާޓީތަކުގެ އެދުމުގެ މަތިން، 100 އަށްވުރެ ގިނައިން ދިވެހިން މަސައްކަތްކުރާ ރިސޯޓްތަކުގައި ވޯޓު ފޮށި ބެހެއްޓުމަށް އެކޮމިޝަނުން ފަހުން ވަނީ ނިންމާފައެވެ.
ރާއްޖޭގައި ހިންގަމުން އަންނަ ރިސޯޓުތަކުގެ ތެރެއިން 77 ރިސޯޓެއްގައި މި ޢަދަދު ހަމަވާއިރު، ޓުއަރިޒަމް މިނިސްޓްރީއާއި އިލެކްޝަންސް ކޮމިޝަން ގުޅިގެން، އެ 77 ރިސޯޓުގައި ވޯޓުފޮށި ބެހެއްޓުމާއި ގުޅޭގޮތުން ވަނީ މަޝްވަރާކޮށްފައެވެ. ނަމަވެސް ވޯޓުލުމުގެ އިދާރީކަންކަން ފަހިކޮށްދޭނެކަމަށް ބުނެ، ރިސޯޓުގައި ވޯޓު ފޮށި ބެހެއްޓުމުގެ ހުއްދަ ދީފައިވަނީ 36 ރިސޯޓަކުންނެވެ. އަދި ބައެއް ރިސޯޓްތަކުން އެ ރިސޯޓުތަކުގައި ފޮށި ބެހެއްޓުމާއި ދެކޮޅު ހަދާފައިވަނީ، ފަތުރުވެރިންނަށް ޚިދުމަތް ދިނުމުގައި އުދަނގޫކަމެއް ކުރިމަތިވެދާނެތީއާއި، ކައިރި ބައެއް ރަށްތަކުގައި މުވައްޒަފުންނަށް ވޯޓުލެވޭނެ އިންތިޒާމު ހަމަޖެހިފައިވާތީކަމަށްވެސް އިލެކްޝަންސް ކޮމިޝަނުން ބުނެފައެވެ.
ރިސޯޓުތަކުގައި މަސައްކަތް ކުރާ ދިވެހިންނަށް ވޯޓުލުމުގެ ހައްޤު ވީހާވެސް ފަސޭހައިން ލިބޭނެ މަގު ތަނަވަސްކޮށްދިނުމަށްޓަކާ އިލެކްޝަންސް ކޮމިޝަނުން ވަނީ ވޯޓުފޮށްޓެއް ބެހެއްޓުމަށް ކޮމިޝަނުން ބޭނުންވާ އިދާރީ އެހީތެރިކަން ފުރިހަމަކުރެވޭނެ ރިސޯޓުތަކާއި، ސިނާޢީ މަސައްކަތްކުރާ ތަންތަނުން އެކަން ލިޔުމުން އެކޮމިޝަނާއި ހިއްސާކުރުމަށް މިދިޔަ ބުދަ ދުވަހުގެ ނިޔަލަށް ދެވަނަ ފަހަރަށް ފުރުޞަތު ހުޅުވާލާފައެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އިލެކްޝަންސް ކޮމިޝަންގެ ރައީސް އަޙްމަދު ޝަރީފު ވިދާޅުވީ، އެކޮމިޝަނުން ފަހުން ހުޅުވާލި ފުރުޞަތުގައި އިޖާބަދިން ރިސޯޓުތަކަށް ބަލާ، 43 ރިސޯޓެއްގައި ވޯޓު ފޮށި ބެހެއްޓުމަށް މިހާރު އެކޮމިޝަނުން ނިންމާފައިވާކަމަށެވެ. އަދި މިއަދަދު އިތުރު ނުވާނެކަމަށާއި، ރިސޯޓުތަކުން ވޯޓުލުމަށްޓަކާ ރީ-ރަޖިސްޓްރީވާ މީހުންގެ ނިސްބަތުން ވޯޓް ފޮށި ބަހައްޓާ ރިސޯޓްތައް މަދުވެދާނެކަމަށްވެސް ޝަރީފު ވިދާޅުވިއެވެ.
އަންނަ ސެޕްޓެމްބަރ މަހުގެ 23 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓުލުމަށްޓަކާ، ރާއްޖެއާއި، ރާއްޖޭން ބޭރުގެ 5 ޤައުމެއް ހިމެނޭހެން ޖުމްލަ 490 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.