ދިވެހިންގެ ޞިއްޙީ ފަރުވާގެ އޮނިގަނޑަކީ، ރާއްޖެއަށް ނިސްބަތްވާ ސައްތައިން ސައްތަ ދިވެހި ބްރޭންޑަކަށް ހައްދަވާނެކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. މިނިވަންދުވަހު ޤައުމާ މުޚާޠަބު ކުރައްވާ ވާހަކަފުޅު ދައްކަވަމުން ރައީސް ޔާމީން ވިދާޅުވީ ސަރުކާރުން ޞިއްޙީ ދާއިރާއަށް ކުރާ ޚަރަދު 130 އިންސައްތަ އިތުރުކޮށްފައިވާކަމަށެވެ.
ރާއްޖޭގެ ސިއްހީ ނިޒާމަކީ އެންމެ ގިނަ ބައެއްގެ ފާޑުކިއުންތައް އަމާޒުވާ އެއް ދާއިރާ. ޒަމާނާ އެއްވަރަށް ތަރައްޤީ ނުވެ އޮތް ދާއިރާ. ގިނަ ބަޔަކު ބުނާގޮތުން ވޭތުވެދިޔަ ހުރިހާ ސަރުކާރަކުން އެންމެ ބޮޑަށް އިހުމާލުވެފައިވާ ދާއިރާއަކީވެސް ސިއްހީ ދާއިރާއެވެ.
ރައީސް ޢަބްދުﷲ ޔާމީން އަބްދުލްޤައްޔޫމް ވެރިކަމާ ހަވާލުވެވަޑައިގަތުމަށްފަހު އެމަނިކުފާނުގެ ސަރުކާރުން އެންމެ ބޮޑު އިސްކަމެއް ދިނީ ރާއްޖޭގެ ސިއްހީ ނިޒާމު ތަރައްޤީކޮށް ރައްޔިތުންނަށް ދުޅަހެޔޮ ސިއްހީ ނިޒާމެއް ފޯރުކޮށްދިނުމަށެވެ. ސިއްހީ ނިޒާމަށް އިންޤިލާބީ ބަދަލަުތަކެއް އަންނަމުންދާއިރު މި ދާއިރާކުރިއެރުވުމަށް އެތައް މަޝްރޫޢުތަކެއް އަންނަނީ ހިންގަމުންނެވެ.
މި ވޭތުވެދިޔަ ހަތަރު އަހަރު ސިއްހީ ދާއިރާ ތަރައްޤީކުރުމަށް ޞިއްޙީ ދާއިރާއަށް ކުރާ ޚަރަދު 130 އިންސައްތަ އިތުރުކޮށްފައިވެއެވެ. ސިއްހީ ދާއިރާއަށް ރައްޔިތުންގެ ފަރާތުން ގެއްލިފައިވާ އިތުބާރު އަނބުރާ ހޯދުމަށްޓަކައި ސަރުކާެުން ވަނީ ގިނަ މަސައްކަތްތަކެއް ކޮށްފައެވެ.
ޞިއްޙީ ޚިދުމަތް މިއަދު އޮތް ޙާލަތުން އިތުރު ހަރުފަތަކަށް ގެންދިއުމަށްޓަކައި ޚިދުމަތުގެ ފެންވަރު ރަނގަޅުކުރުމަށް ގިނަ މަސައްކަތެއްކުރާއިރު، ކެންސަރާއި ކިޑްނީ އަދި ހިތުގެ ބަލިތައްފަދަ ބޮޑެތި ބަލިތަކަކީ ރާއްޖެއިން މިހާރު ފަރުވާ ލިބެންހުރި ބަލިތަކެވެ. ރާއްޖެއިން ފަރުވާ ނުލިބޭ ބަލިތަކަށް ހުސްނުވާ އާސަންދަ މެދުވެރިކޮށް ރާއްޖޭން ބޭރުން ބޭސްފަރުވާ ކުރުމުގެ އިންތިޒާމް ހަމަޖެހިފައިވާއިރު މީގެ ކުރިން އަތޮޅުތަކުން ނުލިބޭ ގިނަ ޚިދުމަތްތައް އަތޮޅުތަކަށް ދަނީ ތަޢާރަފްކުރަމުންެވެ.
ޖިއޮގްރަފީ ގޮތުން ވަކިވަކި ރަށްތަކެއްގެ ގޮތުގައި ރާއްޖެ އެކުލެވިފައި އޮތުމަކީ މިދާއިރާ ކުރިއެރުވުމަށް އޮތް ގޮންޖެހުމެއް ނަމަވެސް، އެ ގޮންޖެހުންތަކާއި އެކުވެސް މީހުން ދިރިއުޅޭ ރަށްރަށުގައި އެކަށޭނެ ސިއްހީ ޚިދުމަތެއް ދިނުމަށް ސަރުކާރުން ކާމިޔާބު މަސައްކަތްތަކެއްކޮށް އިތުރު މަސައްކަތްތައްވެސް ދަނީ ކުރަމުންނެވެ.
އެތެރެހަށީގެ ބަލިތަކަށް ޚާއްޞަ ޑޮކްޓަރުންނާ، އަންހެނުންގެ ޚާއްސަ ޑޮކްޓަރުންނާއި، އޮޕަރޭޝަން ފަދަ ޚިދުމަތްތަކާއެކު، ކިޑްނީބަލީގެ ފަރުވާ އާއި، ދަތުގެ ފަރުވާ އާއި ލޮލުގެބަލިތަކަށް ފަރުވާކުރުމުގެ ޚިދުމަތްތައް އަތޮޅުތެރޭގައި އަންނަނީ ތަރައްޤީކުރަމުންނެވެ. ކޮންމެ ރަށެއްގައި އާސަންދަ ބޭސް ފިހާރައެއް ޤާއިމްކޮށް، ސީއެމްބިއުލާންސް ވަނީ ތަޢާރަފްކޮށްފައެވެ. އަތޮޅުތެރޭގައި އެންމެ ފުރަތަމަ ޤާއިމް ކުރާ 100 އެނދުގެ ޓަރޝަރީ ހޮސްޕިޓަލް މިއަހަރު އައްޑު އަތޮޅުގައި ހުޅުވުމަށް ތައްޔާރުވަމުން އަންނައިރު 150 އެނދާއެކު ޓާޝަރީ ފެންވަރަށް ކުޅުދުއްފުށީ ރީޖަނަލް ހޮސްޕިޓަލްވެސް އަންނަނީ ތަރައްޤީކުރަމުންނެވެ. ކުޅުދުއްފުށީ ރީޖަނަލް ހޮސްޕިޓަލްގައި ސީޓީ ސްކޭންގެ ޚިދުމަތާއި އެމްއާރުއައި ޚިދުމަތް ދިނުމަށް ބޭނުންވާ ވަސީލަތް ފޯރުކޮށްދީ ޚިދުމަތް ފެށުމަށް އަންނަނީ ތައްޔާރުވަމުންނެވެ.
މީގެ އިތުރުން، އަމިއްލަ ވިޔަފާރި ވެރިންގެ ބައިވެރިވުން ޞިއްޙީ ނިޒާމުގައި ފުޅާ ކުރުމަށް ސަރުކާރުން ކުރާ މަސައްކަތުގެ ދަށުން ފުރަތަމަ މަލްޓި ސްޕެޝަލިޓީ ހޮސްޕިޓަލް "ޓްރީޓޮޕް ހޮސްޕިޓަލް" ހުޅުމާލެގައި ހުޅުވާ މިހާރު އަންނަނީ ޚިދުމަތް ދެމުންނެވެ. މިއީ ފަހުގެ ޓެކްނޮލޮޖީ އާއެކު ފުލީ އޮޓޯމެޓިކު ހޮސްޕިޓަލަކަށް ވާއިރު، މި ސަރައްހައްދުގެ ހޮސްޕިޓަލްތަކަށް ގޮން ޖަހާލެވޭ ވަރުގެ ހޮސްޕިޓަލަކަށް ޓްރީޓޕް ހޮސްޕިޓަލް ވަނީ ވެގެންގޮސްފައެވެ.
ދެން އޮތީ ސިއްހީ ނިޒާމްގެ އިންޤިލާބީ އެންމެ ބޮޑު ވާހަކައެވެ. ދަރުމަވަންތަ ހޮސްޕިޓަލްގެ ވާހަކައެވެ. ރާއްޖޭގައި ހުރި އެންމެ އުސް އިމާރާތާއެކު ސިއްހީ ނިޒާމް އާ އުސްމިންތަކަކަށް ވާސިލުވަމުންދާ މަންޒަަރު މިހާރު މިވަނީ ފެންނަށް ފަށާފައެވެ. ސެޕްޓެމްބަރު މަހު ޚިދުމަތް ދިނުމަށް ތައްޔާރުވަމުންދާ ދަރުމަވަންތަ ހޮސްޕިޓަލްގެ ހަ ފަންގި ފިލާ ޚާއްޞަ ކުރަނީ، ނޭޝަނަލް ޑައިގްނޯސްޓިކް ހިދުމަތަށެވެ.
މި ހޮސްޕިޓަލްގައި އެންމެ ފާޙަގަކޮށްލެވޭ އަނެއް ޚިދުމަތަކީ ރާއްޖޭގައި ފުރަތަމަ ފަހަރަށް ޤާއިމުކުރާ މެޑިކަލް ކޮލެޖުގެ ޚިދުމަތެވެ.
25 އެއްފަހަރާ ސަތޭކަހާސް މީހުންނަށް ޚިދުމަތް ދެވޭ ފެންވަރުގެ 25 ބުރީގެ ދަރުމަވަންތަ ހޮސްޕިޓަލާއެކު ސިއްހީ ދާއިރާގެ އެތައްކަމަކަމަށް ހައްލުލިބިގެންދާނެއެވެ. އެކަން މިހާރު ރާއްޖެއިން ބޭރަށް ބޭސްފަރުވާ ހޯދުމަށް ދާ ދިވެހިންގެ ނިސްބަތަށް ބަލާލުމުންވެސް އެނގިގެންދޭ. 2014 ވަނަ އަހަރުން ފެށިގެން ސިއްހީ ފަރުވާހޯދުމަށް ޜާއްޖެއިން ބޭރަށް ދާދިއުން ވަނީ އެތައް ގުނައެއް ދައްވެފައި. ރާއްޖޭގެ މަރުކަޒީ ބޭންކް އެމް.އެމް.އޭއިން އެންެމެފަހުން އާއްމުކޮށްފައިވާ ތަފާސް ހިސާބުތައް ދައްކާގޮތުން، 2015 ވަނަ އަހަރު ބޭސްފަރުވާއަށް ރާއްޖެއިން ބޭރަށް ދަތުރުކުރި ދިވެހީންގެ ނިސްބަތަކީ 58 އިންސައްތައެވެ. ނަމަވެސް މިދިޔަ އަހަރު މި އަދަދުވަނީ 45 އިންސައްތަ ދަށްވެފައެވެ.
ރާއްޖޭގެ ސިއްހީ ނިޒާމް ތަރައްގީގެ އާ ޞަފްހާތަކެއް ލިޔަމުންދާއިރު ބޭރު ދުނިޔޭގެ އެކި ކަންކޮޅުތަކުންވެސް ދަނީ ރާއްޖޭގެ ސިއްހީ ނިޒާމަށް ތައުރީފު އޮއްސަމުންނެވެ. ރައީސް ޔާމީންގެ އަމާޒަކީ މި ސަރަޙައްދުގައިވެސް ސިއްހީ ގޮތުން އެންމެ ރަނގަޅު ގައުމަށް ރާއްޖެ ހެދުމާއި، ބޭރު ގައުމަށް ބޭސްފަރުވާއަށް ދިއުން ހުއްޓުވުމެވެ. މި ސަރަޙާއްދުގެ އެހެން ގައުމުތަކުގެ ސިއްހީ ނިޒާމަށް ގޮންޖަހާލެވޭ ވަރުގެ ބޮޑު ތަރައްގީއެއް ގެނެސްދެމުންނެވެ.
ދިވެހިންގެ ޞިއްޙީ ފަރުވާގެ އޮނިގަނޑަކީ، ރާއްޖެއަށް ނިސްބަތްވާ ސައްތައިންސައްތަ ދިވެހި ބްރޭންޑަކަށް، ﷲގެ އިރާދަފުޅުން ވަރަށްއަވަހަށް ބަދަލުވެގެންދާނެއެވެ. ދަރުމަވަންތަ ހޮސްޕިޓަލަކީ އަޅުގަނޑުމެން އެންމެންގެ ޝަރަފަކަށްވާނެއެވެ،
ރާއްޖޭގެ އެކިކަންކޮޅުގައި ޤާއިމުކުރެވެމުންދާ ހޮސްޕިޓަލްތަކާއި، ސްކޫލްތަކާއި، އެއަރޕޯޓްތަކުގައި ދިއްލޭ ބޮކިތަކުން އުދަރެސް ޖަރީވެ، އަމާންކުރެވިފައިވާ ހޮޅުއަށިތަކާއި މައިދާންތައް އަޅުގަނޑުމެންގެ ތުއްތުކުދިންގެ އުފާވެރި އަޑުތަކުން ގުގުމާ، ތަރައްޤީގެ އަމާޒުތައް ފުރިހަމަވެގެންދާތަން ފެނުމަކީ، އަޅުގަނޑުގެ ވަރުބަލިކަން ހަނދާންނެތިގެންދާ ކަމެއް." ރައީސް ޔާމީން ވިދާޅުވިއެވެ.
ރައީސް ޔާމީންގެ ސަރުކާރު މިހާރު އަމާޒު ހިފާފައިވަނީ، ރާއްޖޭގެ ހުރިހާ ޞިއްޙީ މަރުކަޒުތައް ޓެލެމެޑިސިން ނެޓްވޯކަކުން ގުޅާލުމަށެވެ. ސަރުކާރުގެ ތަސައްވުރާ އެއްގޮތަށް ތަރައްޤީގެ މަޝްރޫޢުތައް ފުރިހަމަވެގެންދާއިރު، ދިވެހި ރައްޔިތުންގެ ހިތްތަކަށް އެންމެ ބޮޑު ހިތްހަމަޖެހުމެއް ގެނުވާނެ ދާއިރާއަކީ ސިއްހީ ދާއިރާކަމަށް ސަރުކާރުން ދަނީ ބުނަމުންނެވެ.