ވޯރލްޑް އޭރޯޕްރެސް ޗެމްޕިއަންޝިޕްގައި ވާދަކުރާނެ ދިވެއްސަކު ހޯދުމަށް ދިރާގުން ޙަރަކާތެއް ބޭއްވުމަށް ނިންމައިފިއެވެ.
'ދިރާގު މޯލްޑިވްސް އޭރޯޕްރެސް ޗެމްޕިއަންޝިޕް 2018 - އަ ގެދަރިންގ ފޯރ ކޮފީ ލަވަރސް' ގެ ނަމުގައި ބާއްވާ މި ޙަރަކާތް އޮންނާނީ ސެޕްޓެމްބަރ 7 ވަނަ ދުވަހު ރަސްރަނި ބަޖީޗާގައިކަމަށް ދިރާގުން ބުނެއެވެ.
މި އިވެންޓް ބޭއްވުމުގެ ކުރިން އޭރޯޕްރެސް އިން ކޮފީހެދުމުގެ ޕަބްލިކް ވޯކްޝޮޕް ތަކެއް ބޭއްވުމަށް ހަމަޖެހިފައިވާކަމަށް ދިރާގުން ބުނެއެވެ. މި ވޯކްޝޮޕްތައް ބޭއްވުމަށް ހަމަޖެހިފައިވަނީ އޮގަސްޓް މަހުގެ 16 އަދި 19 ވަނަ ދުވަހު ހުޅުމާލޭ ފެމިލީރޫމް ކެފޭގައެވެ. އަދި 30 އޮގަސްޓް ގައި މާލޭ ދިރާގު ޕްރިމިއަމް ލައުންޖްގައެވެ.
ދިރާގު މޯލްޑިވްސް އޭރޯޕްރެސް ޗެމްޕިއަންޝިޕަކީ ޢާއްމުންނަށް ހުޅުވާލައިގެން ބައްވާ މިކަހަލަ އެއްމެ ބޮޑު ކޮފީ އިވެންޓްކަމަށް ދިރާގުން ބުނެއެވެ. މި އިވެންޓްގެ ތެރެއިން ރާއްޖޭގެ ތަފާތު ކޮފީ އުފައްދާ ކެފޭތަކާއި ބައްދަލުވެ އެތަންތަނުން ތައްޔާރުކުރާ އެކި ވައްތަރުގެ ކޮފީ ރަހަބަލާލާ ތަޖުރިބާ ކޮށްލުމުގެ ފުރުސަތު ލިބިގެންދާނެއެވެ.
މިއީ ދިރާގާއި ކޮފީ ލެބް ރޯސްޓަރސް އިން އިންތިޒާމު ކޮށްގެން ބާއްވާ ޙަރަކާތެކެވެ. މިމުބާރާތުން އެއްވަނައަށް ހޮވޭ މީހަކަށް ދިރާގުގެ އެހީގައި އޮސްޓްރޭލިއާގެ ސިޑްނީ ގައި ބާއްވާ ވޯރލްޑް އޭރޯޕްރެސް ޗެމްޕިއަންޝިޕް 2018 ގައި ވާދަކުރުމުގެ ފުރުޞަތު ލިބިގެންދާނެއެވެ.
ވޯރލްޑް އޭރޯޕްރެސް ޗެމްޕިއަންޝިޕަކީ ދުނިޔޭގެ މަޤުބޫލުކަން ލިބިފައިވާ ކޮފީ އިވެންޓެކެވެ. އެންމެ ފުރަތަމަ 2010 ވަނަ އަހަރު ލަންޑަން ގައި ފެށި މިމުބާރާތް ކޮންމެ އަހަރަކުވެސް ތަފާތު ޤައުމެއްގެ ތަފާތު ސިޓީއެއްގައި ބާއްވައެވެ. މިއަހަރު ސިޑްނީގައި ބާއްވާ މުބާރާތުގައި ތަފާތު 50 ޤައުމެއްގެ ޗެމްޕިއަނުން ވާދަކުރާނެއެވެ.
ދިރާގުން ބުނީ ދިވެހި ހުނަރުވެހިން ބާރުވެރިކުރުމާއި އެމީހުންނަށް ދުނިޔޭގެ ބޮޑެތި ސްޓޭޖްތަކުގައި ތަމްސީލު ކުރުމުގެ ފުރުސަތު ހޯދައިދިނުމަކީ ދިރާގުން ވަރަށް އިސްކަން ދޭކަމެއްކަމަށެވެ.