ޢާއްމުންނަށް ރައީސް ޔާމީނާއި މުޢާމަލާތްކުރުމުގައި އެއްވެސް ހުރަހެއް ނެތް - ރައީސް އޮފީހުގެ ތަރުޖަމާން
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް މެސެޖުގެ ޒަރިއްޔާއިން މުޢާމަލާތްކުރުމުގައި ޢާއްމުންނަށް އެއްވެސް ހުރަހެއް ނެތްކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ޢިބްރާހީމް މުޢާޒް ޢަލީ ވިދާޅުވެއްޖެއެވެ.
ރައީސް އޮފީހުގެ ތަރުޖަމާނު މިކަން ހާމަކޮށްފައިވަނީ ރައީސް ޔާމީނަށް އެއްވެސް ފަރާތަކުން މެސެޖު ނުކުރެއްވުމަށް އެދޭކަމަށްބުނެ ސޯޝަލް މީޑިއާގައި ދަޢުރުވަމުންދާ ސްކްރީން ޝޮޓަކާއި ގުޅޭގޮތުން ކުރެއްވި ޓުވީޓެއްގައެވެ.
ރައީސް އޮފީހުގެ ތަރުޖަމާނު ޢިބްރާހީމް މުޢާޒް ޢަލީ ވިދާޅުވީ، ރައީސަށް މެސެޖު ނުކުރެއްވުމަށް ކަމަށްބުނެ ފަތުރަމުންދާ ސްކްރީން ޝޮޓަކީ 1 ފެބްރުއަރީގެ ޢަމުރާއި ގުޅޭގޮތުން ކޮށްފައިވާ ޓުވީޓެއްގެ ސްކްރީން ޝޮޓެއް ކަމަށާއި، އެއީ އޭރުގެ ޙާލަތަށް ބަލާ ކޮށްފައިވާ ޓުވީޓެއްކަމަށެވެ. ނަމަވެސް މިހާރު އެ ޙާލަތު ނެތިގޮސްފައިވާކަމަށާއި، ރައީސާއި ޢާއްމުންނާއި ދެމެދު މުޢާމަލާތްކުރުމުގައި އެއްވެސް ހުރަހެއް މިހާރު ނެތްކަމަށް މުޢާޒް ވިދާޅުވިއެވެ.
ރިޔާސީ އިންތިޚާބާއި ދިމާކޮށް އޭރުކޮށްފައިވާ ޓުވީޓާއި، އެ ޓުވީޓާއި ގުޅޭގޮތުން މީޑިއާތަކުގައި ޝާޢިއުކޮށްފައިވާ ޚަބަރުތައް ތާރީޚު ފޮރުވައިގެން ހަޤީޤަތް ޢާއްމުންނަށް އޮޅުން އަރާގޮތަށް ސްކްރީން ޝޮޓުތައް ދަޢުރުކުރަމުންދާތީވެ، މުޢާޒުވަނީ އެކަން ކުށްވެރިކޮށް، އެފަދަ ކަންކަން ނުކުރުމަށް އިލްތިމާސްކުރައްވާފައެވެ. އަދި ދިވެހި ކޮންމެ ރައްޔިތަކަށްވެސް ކުރިއެކޭ އެއްގޮތަށް ރައީސް ޔާމީނަށް މެސެޖުގެ ޒަރިއްޔާއިންވެސް މުޢާމަލާތްކުރުމުގައި އެއްވެސް ހުރަހެއް ނޯންނާނެ ކަމަށްވެސް ރައީސް އޮފީހުގެ ތަރުޖަމާނު ވަނީ ވިދާޅުވެފައެވެ.