މި އަހަރުގެ މިނިވަންދުވަހާ ދިމާކޮށް، ޙުކުމް ތަންފީޛުކުރަމުންދާ ބައެއް މީހުންނަށް ޢަދަބު ލުއިކޮށްދެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ނިންމަވައިފިއެވެ.
މިގޮތަށް އަދަބު ލުއިކޮށްދެއްވުމަށް ނިންމެވީ، މަޢާފްދިނުމާއި އަދަބު ލުއިކޮށްދިނުމުގެ ޤާނޫނުގެ 29 ވަނަ މާއްދާގެ ދަށުން ޝަރުޠުހަމަވާ މީހުންނަށް ކަމަށް ރައީސުލްޖުމްހޫރިއްޔާގެ އޮފީހުން ބުނެއެވެ.
ޢަދަބު ލުއިކޮށްދެއްވުމަށް ރައީސުލްޖުމްހޫރިއްޔާ ނިންމަވާފައިވަނީ އެކަމަށްޓަކައި އެކުލަވާލެވުނު ކޮމިޓީއަކުން ޙުކުމް ތަންފީޛުކުރަމުންދާ މީހުންނާއި އެމީހުންގެ ބެލެނިވެރިންނާއި އިންޓަވިއު ކުރުމަށްފަހު ކަނޑައެޅިފައިވާ ޚާއްޞަ ޝަރުތުތަކަކާއިއެކުގައެވެ. އެގޮތުން އަދަބު ލުއިކޮށްދެއްވާފައިވާ މީހަކު، ޝަރުޠަކާ ޚިލާފުވެއްޖެނަމަ، އެމީހަކަށް އަދަބު ލުއިކޮށްދިން ދިނުން ބާޠިލުވުމާއެކު، ރައީސުލްޖުމްހޫރިއްޔާ، އެމީހަކަށް އަދަބު ލުއިކޮށްދެއްވުމުގެ ކުރިން އެމީހަކު ހުރި ޙާލަތަށް ރުޖޫޢަވެގެންދާނެ ކަމަށާއި، އަދި ޢަދަބު ލުއިކޮށްދެއްވި ޙުކުމުގެ ތަންފީޛުނުވެ ބާކީ އޮތް މުއްދަތު ތަންފީޛު ކުރަންޖެހޭނެ ކަމަށް ރައީސުލްޖުމްހޫރިއްޔާ ކަނޑައަޅުއްވާފައިވެއެވެ.
ޖިނާއީ ޙުކުމެއްގެ ދަށުން އަދަބު ކަނޑައެޅިފައިވާ މީހުންގެ އަދަބު ލުއިކޮށްދެއްވި ކަމުގައިވީނަމަވެސް، އެ މީހެއްގެ މައްޗަށް ކުރެވުނު ޙުކުމުގައި ފައިސާ އަނބުރާ އަދާކުރުމަށް އިލްތިޒާމެއް އޮތް ކަމުގައިވާނަމަ، އެ އިލްތިޒާމަކަށް ލުޔެއް ދެއްވާފައެއް ނުވެއެވެ.
ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން، އަދަބު ލުއިކޮށްދެއްވުމުގައި މީހަކު މެރުމުގެ ކުށާއި، އިސްލާމީ ޝަރީޢަތުގައި ޙައްދު ކަނޑައެޅިފައިވާ ކުށްތަކާއި، ޓެރަރިޒަމްގެ ކުށާއި، ކުޑަކުއްޖަކަށް ޖިންސީ ގޯނާކުރުމުގެ ކުށާއި، މަސްތުވާތަކެތީގެ ވިޔަފާރިކުރުމުގެ ކުށާއި، ގަދަކަމުން ބަދުއަޚުލާޤީ ޢަމަލު ހިންގުމުގެ ކުށާއި، އެއް ޖިންސުން ޖިންސީ ގުޅުން ހިންގުމުގެ ކުށުގެ ޙުކުމްތައް ތަންފީޛުކުރަމުންދާ ނުވަތަ ކުރަންޖެހިފައިވާ މީހުން ހިމަނާފައެއްނުވެއެވެ.