ސޫރިޔާގެ ހުޅަނގު ދެކުނު ސަރަހައްދުގައި އެ ޤައުމުގެ ސަރުކާރުން ކޮންޓްރޯލްކުރާ ހިސާބުތަކުގައި ނުރައްކާތެރި އައި.އެސް ޖަމާޢަތުން ދިން އެކި ހަމަލާތަކުގައި މަރުވި މީހުންގެ ޢަދަދު ދުއިސައްތައަށްވުރެ އިތުރުވެއްޖެއެވެ.
ސޫރިޔާގެ ހަނގުރާމަ ގާތުން ބަލަމުންދާ ސީރިއަން އޮބްޒަވޭޓަރީ ފޯ ހިއުމަން ރައިޓްސުން ބުނެފައިވަނީ ސޫރިޔާގެ ހުޅަނގު ދެކުނުގައި ދިން މި ހަމަލާތަކުގައި މަރުވި ގިނަ މީހުންނަކީ ޢާއްމު ރައްޔިތުންކަމަށެވެ. އެ ސަރަހައްދުގައި އެންމެ ގިނަ ހަމަލާތައް އަމާޒުވެފައިވަނީ ސުވައިދާ ނަމަކަށް ކިޔާ ރަށަކަށެވެ.
އައި.އެސްގެ ހަމަލާތަކުގައި ޖުމްލަ ދުއިސައްތަ ފަނަރަ މީހުން މަރުވެފައިވާ ކަމަށާއި، އެ ހަމަލާތަކުގައި 180 މީހުން ޒަޚަމްވިކަމަށް، އެ ރަށުގެ ސިއްހީ ޚިދުމަތްދޭ ފަރާތްތަކާ ހަވާލާދީ ރޮއިޓަރސްއިން ބުނެފައިވެއެވެ. އަދި މި ހަމަލާތަކަށް ފަހު ހިނގި ކުރިމަތިލުންތަކުގައި އައި.އެސް.ގެ 75 ހަނގުރާމަވެރިން މަރުވެފައިވާ ކަމަށްވެސް ރޮއިޓަރސްއިން ބުނެއެވެ.
2014 ވަނަ އަހަރުއްސުރެ ސޫރިޔާގެ ސަރަހައްދުތަކަށް އަތްގަދަކޮށްގެން އުޅޭ އައި.އެސް ޖަމާޢަތަށް2017 ވަނަ އަހަރު ވަނީ، އެ ޖަމާޢަތުގެ އަތްދަށުގައި ހުރި ހުރިހާ ސަރަހައްދުތައް ގެއްލިފައި.