ޕަބްލިކް ސަރވިސް މީޑިއާ، ޕީ.އެސް.އެމް އައު ގަވަނިންގ ބޯޑު ޕްރައިވެޓައިޒޭޝަން އެންޑް ކޯރޕަރޭޝަން ބޯޑުން އެކުލަވާލާއިފިއެވެ.
ޕީ.އެސް.އެމްގެ ގަވަރނިންގ ބޯޑަށް އާ މެންބަރުން އައްޔަންކޮށްފައިވަނީ އެކުންފުނީގެ މިހާރުގެ ގަވަނިންގ ބޯޑު އުވާލައި ބޯޑަށް އާ މެންބަރުން އައްޔަންކުރުމުގެ ބާރު ޕްރައިވެޓައިޒޭޝަން ބޯޑަށް ދިނުމަށް ރައްޔިތުން މަޖިލީހުން މިއަދު ފާސްކުރުމާ ގުޅިގެންނެވެ. ޕަބްލިކް ސަރވިސް މީޑިއާގެ ޤާނޫނަށް ރައްޔިތުންގެ މަޖިލީހުން ގެނެސްފައިވާ އިސްލާޙުތަކާއެކު ކުރިން 7 މެންބަރުންގެ މައްޗަށް އެކުލެވޭ ޕީ.އެސް.އެމްގެ ބޯޑު މެންބަރުންގެ ޢަދަދު މިހާރު ވަނީ 5 މެންބަރުންނަށް މަދުކޮށްފައެވެ.
އެގޮތުން އަލަށް އެކުލަވާލި ބޯޑުގައި ޕީ.އެސް.އެމްގެ ޗެއަރޕަރސަންކަމަށް އައްޔަނުކުރައްވާފައިވަނީ މ.ހުކުރަދިގޭ މަރިޔަމް އަޒްރާ އަޙްމަދެވެ. އަދި މެނޭޖިން ޑިރެކްޓަރާއި، ޑެޕިއުޓީ މެނޭޖިންގ ޑިރެކްޓަރުގެ މަޤާމަށް އައްޔަނުކޮށްފައިވަނީ މިހާރުވެސް އެ މަޤާމުގައި ހުންނެވި ދަފްތަރު ނަންބަރު 1903 ޢިބްރާހީމް ޚަލީލާއި، ޅ. ނައިފަރު ހަނދު، މުޙައްމަދު އިކްރާމް ޢަބްދުލް ލަތީފެވެ. މި 3 ބޭފުޅުންގެ އިތުރުން ބޯޑަށް އައްޔަނުކޮށްފައިވާ އަނެއް 2 ބޭފުޅުންނަކީ ނ. ވެލިދޫ އާހިޔާ، އައިޝަތު ހަފީޒް އަދި ގ.ތަލްވާރުގޭ އިބްރާހީމް ރަޝީދެވެ. މި ދެ ބޭފުޅުން ޕީ.އެސް.އެމްގެ ބޯޑަށް އައްޔަނުކުރައްވާފައިވަނީ ކުންފުނީގެ ޑިރެކްޓަރުންގެ ގޮތުގައެވެ.
ޕީ.އެސް.އެމްގެ ބޯޑަށް އަލަށް ގެނައި ބަދަލާއެކު، ކުރިން އެކުންފުނީގެ ޗެއަރޕަރސަންކަމުގެ މަޤާމުގައި ހުންނެވި ޢިބްރާހީމް އުމަރު މަނިކާއި، ވައިސް ޗެއަރޕަރސަން ޢިބްރާހީމް ޙިލްމީއާއި، ޑެޕިއުޓީ މެނޭޖިންގ ޑިރެކްޓަރެއްގެ ގޮތުގައި ހުންނެވި އައިމިނަތު ޝާޔަން ޝާހިދު، އަދި ދެ ޑިރެކްޓަރުންގެ ގޮތުގައި ތިއްބެވި މުޙައްމަދު ޝާޤިލް އަދި މަޙްމޫދު ޢަލީގެ މަޤާމު ވަނީ ގެއްލިފައެވެ.
ޕީ.އެސް.އެމްގެ މިހާރުގެ ގަވަރނިންގ ބޯޑު އުވާލަން ރައްޔިތުންގެ މަޖިލީހަށް އިސްލާހު ހުށަހެޅުއްވީ، ކުންފުނި އެކުލަވާލުމާއި، ހިންގުމުގައި ރާއްޖޭގެ ކުންފުންޏާބެހޭ ޤާނޫނާއި ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި، ކޯޕަރަޓައިޒް ކުރުމާއި އަދި މޮނިޓަރކޮށް އިވެލުއޭޓް ކުރުމުގެ ޤާނޫނުގައި ބަޔާންކޮށްފައިވާ މުހިއްމު މަފްޙޫމްތަކާއި ސިފަތައް ޕަބްލިކް ސަރވިސް މީޑިއާގެ ޤާނޫނުގައި ހިމެނިފައިނުވާތީކަމަށް އެ އިސްލާޙު ހުށައެޅުއްވި ހޯރަފުށީ ދާއިރާގެ މެމްބަރު މުޙައްމަދު އިސްމާޢީލް ވަނީ ވިދާޅުވެފައެވެ. އަދި އަލަށް ފާސްކުރެވުނު އިސްލާޙުތަކާއެކު ޕީ.އެސް.އެމްގެ ހިންގުން މިހާރަށްވުރެ ހަރުދަނާވެގެންދާނެކަމަށްވެސް މެމްބަރު ވަނީ ވިދާޅުވެފައެވެ.
ޕަބްލިކް ސަރވިސް މީޑިއާ، ޕީއެސްއެމްގެ ޤާނޫނަކީ 2015 ވަނަ އަހަރު ރައްޔިތުން މަޖިލީހުން ފާސްކޮށްފައިވާ ޤާނޫނެކެވެ.