މިއަހަރުގެ މިނިވަންދުވަހުގެ މުނާސަބަތުގައި ބާއްވާ ހެވިކަމާއި ކުޅިވަރުގެ ހަރަކާތްތައް ބަލާލުމަށް ގަލޮޅު ދަނޑަށް ވަދެވޭނީ އެކަމަށް ދަޢުވަތު ދީފައިވާ ފަރާތްތަކަށް އެކަނިކަމަށް މިނިސްޓްރީ އޮފް ހޯމް އެފެއާޒުން ބުނެފިއެވެ.
މިނިވަން ދުވަހުގެ މުނާސަބަތުގައި ބާއްވާ ހެވިކަމާއި ކުޅިވަރުގެ ޙަރަކާތްތައް ދައްކާލުމުގެ ރަސްމިއްޔާތު އޮންނާނީ މިމަހުގެ 27 ވާ ހުކުރު ދުވަހުގެ ރޭ 9 އިން 11:30 އަށް ގަލޮޅު ރަސްމީ ފުޓްބޯޅަ ދަނޑުގައެވެ. މި ރަސްމިއްޔާތުގައި ސިފައިންގެ ޝަރަފުގެ ހިނގާލުމާއި، އެމް.އެން.ޑީ.އެފާއި، ކެޑޭޓް ކޯގެ ބޭންޑުގެ ޙަރަކާތްތަކާއި، ސްކޫލު ދަރިވަރުންގެ ތަފާތު އެކި މުނިފޫހިފިލުވުމުގެ ހަރަކާތްތައް ފެނިގެންދާނެކަމަށް ހޯމް މިނިސްޓްރީން މަޢުލޫމާތުދެއެވެ.
މިފަހަރުގެ ހެވިކަމުގެ ހަރަކާތްތަކާ ގުޅޭގޮތުން ޕީ.އެސް.އެމް ނިއުސްއަށް މަޢުލޫމާތުދެއްވަމުން ހޯމްމިނިސްޓްރީގެ ޑެޕިއުޓީ ޑިރެކްޓަރ ޢައްބާސް މުޙައްމަދު ވިދާޅުވީ، ހެވިކަމުގެ ހަރަކާތްތައް ބަލާލުމަށް ގަލޮޅު ދަނޑަށް ވަދެވޭނީ އެކަމަށް ދަޢުވަތު ދީފައިވާ ފަރާތްތަކަށް އެކަނި ކަމަށާއި، އެކަމަށް ޚާއްސަ ފާސްތަކެއް މިނިސްޓްރީގެ ފަރާތުން ދަޢުވަތު އެރުވާފައިވާ ފަރާތްތަކަށް ދީފައިވާނެކަމަށެވެ. ކުރީގެ ތަޖުރިބާތަކަށް ބަލާ، މިފަހަރު ގަލޮޅު ދަނޑަށް މީހުން ވެއްދުމުގައި ޚާއްސަ އިންތިޒާމްތަކެއް ހަމަޖައްސާފައިވާކަމަށްވެސް ޢައްބާސް ވިދާޅުވިއެވެ. އެގޮތުން ދަޢުލަތުގެ އެންމެ މަތީ ފަންތީގެ ވެރިންނާއި، ވުޒާރާތަކުގެ އިސް ބޭބޭފުޅުންނާއި، ކުޅިވަރުތަކުގައި ބައިވެރިވާ ސްކޫލް ދަރިވަރުންގެ ބެލެނިވެރިން ހިމެނޭހެން "އޭ" އިން ފެށިގެން "އެފް" އާ ހަމައަށް 6 ވައްތަރެއްގެ ފާހެއް އެކި ކުލަ ކުލައިން ތައްޔާރުކޮށްފައިވާ ކަމަށާއި، އެބޭފުޅުންނަށް ދަނޑަށް ވަދެވޭނީ ދީފައިވާ ފާހުގައި އިންނަ ކުލައަކަށް ޙާއްސަކޮށްފައިވާ ގޭޓަކުން ކަމަށްވެސް ޢައްބާސް ވިދާޅުވިއެވެ.
ހެވިކަމުގެ ކުޅިވަރުތައް ފެށުމަށް ހަމަޖެހިފައިވަނީ ހުކުރު ދުވަހުގެ ރޭ 9 ޖަހާއިރު ކަމަށްވިޔަސް، ގަލޮޅު ރަސްމީ ދަނޑުގެ ގޭޓުތައް އެރޭ 7:15 ގައި ހުޅުވާލާނެކަމަށާއި، ދަޢުވަތު ދީފައިވާ ފަރާތްތަކުން އެންމެ ފަހު ވަގުތަށް މަޑުނުކޮށް ވަގުތު އޮއްވާ ދަނޑަށް ދިއުމަށް ހޯމްމިނިސްޓްރީން އެދެއެވެ.
މިއަހަރުގެ މިނިވަން ދުވަހުގެ މުނާސަބަތުގައި ބާއްވާ ޕެރޭޑާއި، ރޫޓް މާޗް އަންނަ ހޮނިހިރު ދުވަހު މާލޭގެ މަގުތަކުގައި އޮންނައިރު، ރާއްޖޭގެ އެކި ކަންކޮޅުތަކުގައި މިނިވަން ދުވަހާއި ގުޅުވައިގެން ތަފާތު ހަރަކާތްތައް ރަށު ފެންވަރުގައި ކުރިއަށް ގެންދިއުމަށް ހަމަޖެހިފައިވާކަމަށްވެސް ހޯމް މިނިސްޓްރީން ބުނެއެވެ.