ދައުލަތުގެ ބެލުމުގެ ދަށުގައި ދިރިއުޅޭ ކުދިންނަށް އިންޓަރންޝިޕް ހެދުމުގެ ފުރުސަތު ދިނުމަށް ޖެންޑަރ މިނިސްޓްރީއާއި ކޮންރަޑް މޯލްޑިވްސް ރަންގަލި އައިލެންޑް ރިސޯޓާއި ދެމެދު އެއްބަސްވުމެއްގައި ސޮއެކޮށްފިއެވެ. މި އެއްބަސްވުމުގައި ސޮއެކުރެއްވީ ޖެންޑަރ މިނިސްޓްރީގެ ފަރާތުން ޕްރޮގުރާމް މެނޭޖަރ ޖަލާ ޒުހުރީއާއި ކޮންރަޑް މޯލްޑިވްސް ރަންގަލި އައިލެންޑް ރިސޯޓްގެ ޖެނެރަލް މެނޭޖަރ ސްޓެފާނޯ ރުޒަރއެވެ.
ޖުލައި 23 ވަނަ ދުވަހު ސޮއެކުރި މި އެއްބަސްވުމުގެ ދަށުން، ދައުލަތުގެ ބެލުމުގެ ދަށުގައިވާ އުމުރުން 16 އަހަރާއި 18 އަހަރާއި ދެމެދުގެ ކުދިންނަށް ކޮންރަޑް މޯލްޑިވްސް ގައި 1 އަހަރުދުވަހުގެ މުއްދަތަކަށް އިންޓަރޝިޕް ހެދުމުގެ ފުރުސަތު ލިބޭނެއެވެ. އެގޮތުން ޓޫރިޒަމް އަދި ހޮސްޕިޓަލިޓީ ދާއިރާގެ މަސައްކަތްތައް އެކުދިން ދަސްކުރާނެއެވެ.
ދައުލަތުގެ ބެލުމުގެ ދަށުގައިވާ ކުދިންނަށް މިލިބުނު ފުރުސަތާ ބެހޭގޮތުން ޖެންޑަރ މިނިސްޓަރ ޒެނީޝާ ވިދާޅުވީ މިއީ މަސައްކަތުގެ މާހައުލަށް އެކުދިން ނިކުތުމަށް ލިބުނު ވަރަށް ރަނގަޅު ފުރުސަތެއްކަމަށެވެ. އަދި ކުރިއަށްއޮތްތަނުގައިވެސް މިނިސްޓްރީގެ ފަރާތުން އެކުދިންނަށް މިފަދަ ފުރުސަތުތައް ހޯދާދެއްވާނެކަމަށް މިނިސްޓަރ ވިދާޅުވިއެވެ. ޖެންޑަރ މިނިސްޓްރީން މީގެކުރިން އަނަންތަރަ ރިސޯޓާއިއެކުވެސް ވަނީ މިފަދަ އެއްބަސްވުމެއްގައި ސޮއެކޮށްފައެވެ. މި އެއްބަސްވުމުގެ ދަށުން 2 ކުއްޖަކު އަންނަނީ އިންޓަރންޝިޕް ފުރިހަމަކުރަމުންނެވެ.