ރާއްޖޭގެ މާލީ ވުޒާރާގެ ތާރީޚާއި، ރާއްޖޭގެ މާލީ ވުޒާރާ ހިންގެވި ބޭފުޅުންގެ ތާރީޚް ހިމެނޭ ޚާއްޞަ ފޮތެއް ފިނޭންސް މިނިސްޓްރީން ނެރެފިއެވެ.
"ބޮޑުބަނޑޭރީން" މި ނަމުގައި ނެރުނު މި ފޮތް ނެރެފައިވަނީ، ފިނޭންސް މިނިސްޓްރީގައި ބޭއްވި ޚާއްޞަ ރަސްމިއްޔާތެއްގައެވެ. މި ފޮތް ނެރެދެއްވީ ފިނޭންސް މިނިސްޓްރީގައި ގިނަ ޚިދުމަތްތަކެއް ކުރައްވާފައިވާ އެމިނިސްޓްރީގެ އެންމެ ފުރަތަމަ ޕާރމަނަންޓް ސެކްރެޓަރީ އިސްމާޢީލް ޝަފީޤެވެ.
ބޮޑުބަނޑޭރި މިނަމަކީ، އިހުގައި ދައުލަތަށް ލިބޭ މުދަލާއި، ފައިސާ ބަލަހައްޓާމީހާއަށް ކިޔާ އުޅުނު ނަމެކެވެ.
މި ފޮތް ނެރުމަށް ބޭއްވި ރަސްމިއްޔާތުގައި ވަހަކަފުޅު ދައްކަވަމުން ފިނޭންސް މިނިސްޓަރ އަޙްމަދު މުނައްވަރު ވިދާޅުވީ، "ބޮޑުބަނޑޭރިން" މިފޮތުގެ ސަބަބުން ފިނޭންސް މިނިސްޓްރީގެ ތާރީޚާ ގުޅޭ މުހިންމު ގިނަ މަޢުލޫމާތުތަކެއް ލިބިގެންދާނެކަމަށެވެ. ޚާއްސަކޮށް މާލީ ވުޒާރާ ހިންގެވި ބޭފުޅުންނާއި، އެބޭފުޅުން ކުރެއްވެވި އަގުހުރި މަސައްކަތްޕުޅުގެ މަޢުލޫމާތު މިފޮތުގައި އެކުލެވިފައިވާނެކަން މިނިސްޓަރ ފާހަގަކުރެއްވިއެވެ.
މިނިސްޓަރގެ ވާހަކަފުޅުގައި ވަނީ ރާއްޖޭގެ މާލީ ދާއިރާއަކީ ދިގު ތާރީޚެއް އޮތް ދާއިރާއެއްކަން ފާހަގަކުރައްވާ މި ދާއިރާގެ ތާރީޚާ ގުޅޭ މަޢުލޫމާތު އެކުލެވޭ އިތުރު ފޮތްތަކެއް ނެރުމަށް ފިނޭންސް މިނިސްޓްރީން މަސައްކަތްކުރައްވާނެކަމަށް ވިދާޅުވެފަައެވެ. އެގޮތުން ޚާއްޞަކޮށް ރާއްޖޭގެ ބަޖެޓްތަކާ ގުޅޭގޮތުން ވަޒީރުން ދެއްވާފައިވާ ޚިޠާބުތައް ހިމެނޭ ފޮތެއް އެކުލަވާލުމަށް މަސައްކަތް ކުރަމުންދާކަމަށް މިނިސްޓަރ ވަނީ ވިދާޅުވެފައެވެ.
"މި ފޮތް މި ނެރެވެނީ ވަރަށް ތާރީޚީ ދުވަހެއްގައި. އެއްއަހަރަށްވުރެ ގިނަ ދުވަސްވެއްޖެ މިފޮތް އެކުލަވާލުމުގެ މަސައްކަތްފަށާފައިވާތާ. މިފަދަ ފޮތެއް އެކުލަވައިލުމުގެ އެންމެ ބޮޑު ބޭނުމަކީ ރާއްޖޭގެ މާލީ ވުޒާރާ ހިންގެވުމުގެ މުހިންމު މަސްއޫލިއްޔަތު އުފުއްލަވާފައިވާ ބޭބޭފުޅުން ކުރެއްވި މަސައްކަތްޕުޅުގެ އަގުވަޒަންކުރުން. އަދި އަންނަންއޮތް ޖީލުތަކަށްޓަކައި އެބޭފުޅުންގެ ހަނދާނާއި، ޒިކުރު އާކުރުން. މިއީ ފިނޭންސް މިނިސްޓްރީއާއި، ރާއްޖޭގެ މާލީ ދާއިރާއަށްޓަކައި ކުރެވުނު ވަރަށް މުހިންމު މަސައްކަތެއް"- މިނިސްޓަރ މުނައްވަރު ވިދާޅުވިއެވެ.
މި ފޮތް އެކުލަވާލުމުގައި އިސްދައުރެއް އަދާކުރެއްވި ޤައުމީ އަރުޝީފުގެ ޑިރެކްޓަރ ޖެނެރަލް މުޙައްމަދު ޝާތިރު މި ރަސްމިއްޔާތުގައި ދެއްކެވި ވާހަކަފުޅުގައި މި ފޮތަކީ ފިނޭންސް މިނިސްޓަރުގެ އިސްނެންގެވުމުގެ މަތިން އެކުލަވާލި ފޮތެއްކަން ފާހަގަކުރެއްވިއެވެ. އަދި ރާއްޖޭގެ މާލީ ދާއިރާގެ ތާރީޚީ މަޢުލޫމާތު އެކުލެވޭ މުހިންމު ފޮތްތަކެއް ނެރުމަށް މަސައްކަތް ކުރައްވަމުންދާކަންވެސް ޝާތިރު ވަނީ ފާހަގަކުރައްވާފައެވެ.
މި ރަސްމިއްޔާތުގެ ޝަރަފްވެރި މެހެމާން، އިސްމާޢީލް ޝަފީޤް ދެއްކި ވާހަކަފުޅުގައި، ރާއްޖޭގެ މާލީ ކަންކަމާބެހޭ މަޢުލޫމާތު ލިބޭނެފަދަ ވަސީލަތްތައް މަދުކަން ވަނީ ފާހަގަކުރައްވާފައެވެ. އަދި މި ފޮތުގެ ސަބަބުން ގިނަ މަޢުލޫމާތުތަކެއް ލިބެނޭކަން ފާހަގަކުރައްވާ، ސަރުކާރުގެ އެހެން ވުޒާރާތަކުންވެސް އިސްނަގައިގެން މިފަދަ ފޮތްތައް ނެރުމަކީ މުހިންމު ކަމެއްކަމަށް އޭނާ ވިދާޅުވިއެވެ.
"ބޮޑު ބަނޑޭރިން" މި ފޮތުގެ މުސައްނިފަކީ ކަށިމާ އަހްމަދު ޝާކިރެވެ. މި ފޮތުގައި ރާއްޖޭގެ ތާރީޚްގައި މާލީ ވުޒާރާ ހިންގެވި 18 ބޭފުޅާކާ ގުޅޭ މަޢުލޫމާތާއި، މާލީ ދާއިރާގެ ތާރީޚާއި އަދި ފޮޓޯތައް ހިމަނާފައިވެއެވެ.