އިންޑިއާގެ ލަވްލީ ޕްރޮފެޝަނަލް ޔުނިވަރސިޓީ، އެލް.ޕީ.ޔޫއިން މިއަހަރަށް ހުޅުވާލާފައިވާ ސްކޮލަރޝިޕަށް ކުރިމަތިލުމުގެ ފުރުޞަތު ޑިޕާރޓްމަންޓް އޮފް ހަޔަރ އެޑިއުކޭޝަނުން ހުޅުވާލައިފިއެވެ.
ލަވްލީ ޕްރޮފެޝަނަލް ޔުނިވަރސިޓީން ހުޅުވާލައިފައިވާ ސްކޮލަރޝިޕްގެ ފުރުޞަތުތަކުގެ ތެރޭގައި ހިމެނެނީ ބެޗެލަރސް ޑިގްރީއާއި، މާސްޓަރސް ޑިގްރީ ލެވެލްގެ ކޯސްތަކެވެ. މީގެ ތެރޭގައި ކޯސް ފީ މުޅިން ހިލޭ ލިބޭ ބެޗެލަރސް ޑިގްރީގެ ކޯހަކާއި، 50 އިންސައްތަ ކޯސް ފީ ހިލޭ ލިބޭ ބެޗެލަރސް ޑިގްރީ ކޯހުގެ 15 ފުރުޞަތެއްގެ އިތުރުން، 50 އިއްސައްތަ ކޯސް ފީ ހިލޭ ލިބޭ މާސްޓަރސް ޑިގްރީ ލެވެލްގެ 10 ފުރުޞަތެއް ހިމެނެއެވެ.
ޑިޕާރޓްމަންޓް އޮފް ހަޔަރ އެޑިއުކޭޝަނުން ބުނީ، ސްކޮލަރޝިޕަށް ކުރިމަތިލާ ފަރާތަކީ މި ފުރުޞަތުތަކުގެ ދަށުން އެމީހަކު ބޭނުންވާ ކޯހަކާއިގުޅޭ ޝަރުތުތަކުގެ އިތުރުން، ތަޢުލީމު ޙާޞިލުކުރުމަށް ސަރުކާރުން ނުވަތަ ސަރުކާރު މެދުވެރިވެގެން އެހީ ލިބިފައިވާނަމަ، އެންމެ ފަހުގެ އެހީއަށްފަހު، އެ ޑިޕާރޓްމަންޓުން ކަނޑައަޅާފައިވާ ސުންގަޑިއަށް، ދިވެހިރާއްޖެއަށް ޚިދުމަތްކޮށްފައިވާ ފަރާތަކަށް ވާންޖެހޭނެކަމަށެވެ. އަދި ޑިޕާރޓްމަންޓް އޮފް ހަޔަރ އެޑިޔުކޭޝަން ނުވަތަ އެ ޑިޕާޓްމަންޓް މެދުވެރިވެގެން ކިޔެވުމަށް ލޯނެއް ނަގާފައިވާނަމަ، އެ ލޯނެއް އަނބުރާ ދައްކާ ޚަލާސްކޮށްފައިވާ ފަރާތަކަށްވެސް ވާންޖެހޭނެކަމަށެވެ.
މީގެ އިތުރުން އެމީހަކު ކުރިމަތިލާ ކޯހަކީ މިހާރު ފުރިހަމަކޮށްފައިވާ ކޯހަކަށްވުރެ މަތީ ފެންވަރުގެ ކޯހަކަށްވާންޖެހޭނެކަމަށާއި، އެ ބޭނުންވާ ކޯހާއި އެއް ފެންވަރެއްގެ ކޯހެއް ދައުލަތުގެ ޚަރަދުގައި މިހާރު ފުރިހަމަ ކުރަމުންދާ ދަރިވަރެއް ކަމުގައިވެސް ވެގެން ނުވާނެކަމަށްވެސް އެ ޑިޕާޓްމަންޓުން ބުނެއެވެ.
މި ސްކޮލަރޝިޕަށް ކެންޑިޑޭޓުން ނޮމިނޭޓް ކުރުމަށް ހަމަޖެހިފައިވަނީ އެކަޑަމިކް މެރިޓަށް ޕޮއިންޓްދީގެން އެންމެ މަތިން ޕޮއިންޓް ލިބޭ ތަރުތީބުންނެވެ. އަދި ސްކޮލަރޝިޕަށް ހޮވޭ ދަރިވަރުންގެ ފައިނަލް ސެލެކްޝަން ހެދުމަށް ހަމަޖެހިފައިވަނީ އިންޑިއާގެ ލަވްލީ ޕްރޮފެޝަނަލް ޔުނިވަރސިޓީން ކަމަށާއި، ސްކޮލަރޝިޕަށް ހޮވޭ ދަރިވަރުން ޖުލައި މަހުގެ ފަހުކޮޅު ކިޔެވުމަށް ފުރުމަކީ އެކަށީގެންވާކަމަށް ޑިޕާޓްމަންޓް އޮފް ހަޔަރ އެޑިއުކޭޝަނުން ބުނެއެވެ.
މި ސްކޮލަރޝިޕްތަކަށް ކުރިމަތިލުމުގެ ފުރުޞަތު ހުޅުވާލާފައިވަނީ މިމަހުގެ 16 ވާ ހޯމަދުވަހުގެ ނިޔަލަށެވެ.