ދިވެހިރާއްޖޭގެ އަމާންކަމާއި ހަމަޖެހުމަށާއި، ރާއްޖެއާއި ބޭރު ދުނިޔޭގެ ޤައުމުތަކާ ދެމެދު އޮންނަ ގާތް ގުޅުމަށް އަސަރު ފޯރާ ފަދަ ޙަޤީޤަތާއި ޚިލާފު ދޮގު ވާހަކަތައް ނުފެތުރުމަށް ހޯމް މިނިސްޓްރީން އިލްތިމާސްކޮށްފިއެވެ.
އެ މިނިސްޓްރީން މިކަމަށް އިލްތިމާސްކޮށްފަވަނީ ދިވެހިރާއްޖެއާއި ބޭރު ދުނިޔޭގެ ޤައުމުތަކާ ދެމެދު އޮންނަ ގުޅުމާއި ގުޅޭގޮތުން އިދިކޮޅު އެމްޑީޕީގެ ވެރިކަމުގައި ފޮރިން މިނިސްޓަރުކަން ކުރި އަޙްމަދު ނަސީމު އިންޑިއާގެ ނޫހެއްކަމަށްވާ "ދަ ޓްރިބިއުން" އަށް ދީފައިވާ އިންޓަރވިއުއަށް ރައްދުދެއްވާ ރާއްޖޭގެ ހޯމް މިނިސްޓްރީން ނެރުނު ނޫސް ބަޔާނެއްގައެވެ.
ހޯމް މިނިސްޓްރީގެ ބަޔާނުގައި ރާއްޖެއާއެކު ސިޔާސީގުޅުން ޤާއިމުކޮށްފައިވާ ޤައުމުތަކާއި ރާއްޖެއާ ދެމެދު އޮންނަ ގުޅުން ހީނަރުކޮށް، އެ ޤައުމުތަކުގެ ރައްޔިތުންގެ ހިތްތަކުގައި ރާއްޖެއާމެދު ނަފްރަތު އުފެދޭގޮތަށާއި، ދިވެހި ރައްޔިތުންގެ ހިތްތަކަށް ބިރުވެރިކަން އިޙްސާސް ކުރެވޭފަދަ ގޮތަކަށް، ރާއްޖެ ބަދުނާމުކޮށް، ނަސީމު އިންޑިއާގެ ނޫހަކަށް ދީފައިވާ އިންޓަރވިއުގައި ދައްކަވާފައިވާ ވާހަކަތަކަކީ ކަނޑައެޅިގެން ހަޤީޤަތާއި ޚިލާފު ދޮގު ވާހަކަތަކެއްކަމަށެވެ. އަދި އަޙްމަދު ނަސީމު އެނޫހަށް ދީފައިވާ އިންޓަރވިއުގައި ދައްކަވާފައިވާ ވާހަކަތައް ހޯމް މިނިސްޓްރީންވަނީ ހަރުކަށި އިބާރާތުން ކުށްވެރިކޮށްފައެވެ.
ހޯމް މިނިސްޓްރީން ވިދާޅުވީ، ރާއްޖޭގެ ހަމަޖެހުމަށާއި ދިވެހިންނަށް ނުރައްކާވެދާނެފަދަ އެއްވެސް ކަމެއް ނުވަތަ އެފަދަ އެއްވެސް ޢަމަލެއް މި ސަރުކާރުން ނުކުރާނެކަމަށެވެ. އަދި ރާއްޖެއާއި ދިވެހި ރައްޔިތުންގެ ކިބައިން އަވަށްޓެރި އަދި އެހެންވެސް ޤައުމަކަށް ނުރައްކާވެދާނެފަދަ އެއްވެސް ޢަމަލެއް ނުވަތަ އެފަދަ އެއްވެސް ކަމަކަށް މަގުފަހިވެދާނެ އެއްވެސް ކަމެއް މި ސަރުކާރުން ނުކުރާނެކަމުގެ ޔަޤީންކަންވެސް ހޯމް މިނިސްޓްރީން ނެރެފައިވާ ބަޔާނުގައި ދީފައިވެއެވެ.
ސަރުކާރުން އަބަދުވެސް މަސައްކަތް ކުރަމުން ގެންދަނީ ދިވެހިރާއްޖެއަކީ ދުނިޔޭގައިވާ އެންމެ ރީތި އަދި އެންމެ އަމާން ޤައުމުގެ ގޮތުގައި ބޭއްވުމަށްކަމަށްވެސް ހޯމް މިނިސްޓްރީގެ ބަޔާނުގައި ބުނެފައިވެއެވެ. އެހެންކަމުން ރާއްޖޭގެ އަމާންކަމަށާއި، ހަމަޖެހުމަށް އަސަރު ފޯރާ ފަދަ ޙަޤީޤަތާއި ޚިލާފު ދޮގު ވާހަކަތައް ނުފެތުރުމަށް ހޯމް މިނިސްޓްރީން ވަނީ އިލްތިމާސްކޮށްފައެވެ. އަދި އެފަދަ ގޮތަކަށް ވާހަކަތައް ދައްކާ ފަރާތްތަކުގެ މައްސަލަ ތަޙްޤީޤުކޮށް، ފިޔަވަޅު އަޅާނެކަމަށްވެސް އެ މިނިސްޓްރީން ބުނެއެވެ.