ޔުނައިޓެޑް އެރަބް އެމަރޭޓްސް، ޔޫއޭއީގެ ފާސްޓްފުޑް ފްރަންޗައިޒް ރެސްޓޯރެންޓެއް ކަމަށްވާ "ޗިކިންގ" ގެ ރެސްޓޯރެންޓެއް ރަސްފަންނުގައި ހުޅުވައިފިއެވެ. ރަސްފަންނުގައި ހަދާފައިވާ ޕެވީލިއަންގައި ހުޅުވި މި ރެސްޓޯރެންޓް ހުޅުއްވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމެވެ.
"ޗިކިންގ"ގެ އައުޓްލެޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހައުސިންގ މިނިސްޓަރ ޑރ. މުޙައްމަދު މުޢިއްޒު ވަނީ ރަސްފަންނު ތަރައްޤީކުރުމުގެ ކުރިން އެސަރަޙައްދުގެ އޮތް ގޮތުގެ މައްޗަށް އަލިއަޅުއްވާލައްވާފައެވެ. އެގޮތުން މުޢިއްޒު ވިދާޅުވީ އެސަރަޙައްދަކީ މީގެކުރިން މޫސުން ގޯސްވެ އުދައަރާ އަދި އެނޫންވެސް ކުނީގެ މައްސަލަތަކާއި އެހެނިހެން މައްސަލަތައްދޭމާވާ، އަޅާނުލާ ދޫކޮށްލާފަ އޮތް ސަރަޙައްދެއްކަމަށެވެ. ނަމަވެސް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ތަޞައްވުރަކަށްވީ، އެ ސަރަޙައްދަކީ ރައްޔިތުންނަށް އިޖްތިމާޢީ ފައިދާކުރަނިވި ތަނަކަށް ހެދުންކަމަށާއި، އާއިލާތަކާއި ކުޑަކުދިންނަށް އެސަރަޙައްދުން ހިތްހަމަޖެހޭ ޒަމާނީ އަދި ބައިނަލްއަޤްވާމީ ފެންވަރުގެ ޚިދުމަތްތަކެއް ލިބޭތަނަކަށް ވުންކަމަށެވެ.
"ދުނިޔޭގެ ފެންވަރުގެ ތަނަކަށް މިހާރު ރަސްފަންނު ވެގެން މިދަނީ. މި ސަރަޙައްދަށް އަންނަ ފަރާތްތަކަށް ހިތްހަމަޖެހުންލިބޭނެ ތަނަކަށް ވެގެންގޮއްސި. މިރަސްފަންނު ކޮންސެޕްޓްގެ ތެރޭގައި ރައީސް ޔާމީން ބޭނުންފުޅުވީ މީގެ ކުރިން ބޭރު ޤައުމުތަކުން ދިވެހިންނަށް ލިބެމުންދިޔަ ޚިދުމަތްތައްވެސް ރާއްޖެއިން ލިބިގެންދިއުން. އާއިލާތަކާއި ކުޑަކުދިންނާއި ޒުވާނުންނަށް މި ސަރަޙައްދުން ފަސޭހަ ޒަމާނީ ޚިދުމަތްތަކެއް ލިބިގެންދިއުން" މިނިސްޓަރ މުޢިއްޒު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން އެމްޑަބްލިއުއެސްސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވީ، ބައިނަލްއަޤްވާމީ ބްރޭންޑްތައް ރާއްޖެއަށް ތަޢާރަފުކުރެއްވީ ރައީސް ޔާމީންކަމަށާއި، ރާއްޖޭގެ އާއިލާތަކަށް ދުޅަހެޔޮކަމާއި، އިޖްތިމާއީ ހަމަޖެހުމާއެކު ވަޒީފާގެ ގިނަ ފުރުޞަތުތަކެއް މި ސަރުކާރުން ފަހިކޮށްދެއްވާފައިވާކަމަށެވެ. ރައީސް ޔާމީންގެ ތަޞައްވުރަކީ އިތުރު ފްރަންޗައިޒް ބްރޭންޑްތައް ރާއްޖެއަށް ތަޢާރަފްކުރުންކަން ފާހަގަކުރައްވާ، ފަޒުލް ވިދާޅުވީ ރާއްޖެއަކީ ނިސްބަތުން މީހުން މަދު ޤައުމަކަސް، އެހެން ޤައުމުތަކުން ލިބޭ ފެންވަރުގެ ޚިދުމަތް ރާއްޖެއިންވެސް ލިބޭނެކަން ރައީސް ޔާމީން ސާބިތުކޮށްދެއްވާފައިވާކަމަށެވެ.
"މިފްރަންޗައިޒް އައުޓްލެޓާއެކު ރާއްޖޭގެ އެހެނިހެން ސަރަޙައްދުތަކުގައިވެސް ފްރަންޗައިޒް އައުޓްލެޓްތައް ހުޅުވިގެންދާނެކަމާމެދު އަޅުގަނޑު ޝައްކެއްނުކުރަން. އަޅުގަނޑުމެންނަށް ފެނިގެން މިދަނީ ދުނިޔޭގެ ބޮޑެތި ބްރޭންޑްތައް މިތަނުގައި ހުޅުވެމުންދާތަން. ވަރަށް އަވަހަށް އިތުރު 2 ބްރޭންޑްގެ އައުޓްލެޓް މި ޕެވީލިއަންގައި ހުޅުވިގެންދާނެ" ފަޒުލް ވިދާޅުވިއެވެ.
"ޗިކިންގ" އަކީ 2000 ވަނަ އަހަރު ތަޢާރަފުކުރި، ޔޫއޭއީގެ ފާސްޓްފުޑް ފްރަންޗައިޒްއެކެވެ. "ޗިކިންގ"ގެ އަމާޒަކީ 2025 ވަނަ އަހަރާ ހަމައަށް ދުނިޔޭގެ އެކިކަންކޮޅުތަކުގައި އެއްހާސް އައުޓްލެޓް ހުޅުވުމެވެ.
ހަވާ އެރުވުމުގެ ހަރަކާތަކާއެކު ރަސްފަންނު ޕެވީލިއަންގައި ހުޅުވި ފްރަންޗައިޒް ރެސްޓޯރަންޓް ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުންގެ ދައުވަތަށް ގިނަ ޢަދަދެއްގެ ކުޑަކުދިން ބައިވެރިވިއެވެ. ރަސްފަންނުގައި ހުޅުވި "ޗިކިންގ" ރެސްޓޯރެންޓް ކުޑަކުދިންގެ ޕާޓީތަކަށާއި ޙަފްލާތަކަށް ދޫކުރުމަށް ހަމަޖެހިފައިވާ ކަމަށް އެމްޑަބްލިއުއެސްސީން ބުނެއެވެ.