ދިވެހިންނަށް ފިނިމޫސުމުގެ ތަޖުރިބާ ކުރެވޭގޮތަށް ތަރައްޤީކޮށްފައިވާ ވިންޓަރ ޕާކް ރަސްމީކޮށް ހުޅުވައިފިއެވެ. މިޕާކް ހުޅުއްވައިދެއްވީ، ރަސްރަނި ބަގީޗާގައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމެވެ.
ވިންޓަރ ޕާކަކީ ދިވެހިރާއްޖޭގެ ތާރީޚުގައިވެސް ވިންޓަރ ތީމަކަށް ހަދާފައިވާ މިފަދަ ފުރަތަމަ ޕާކެވެ. ފިނި މޫސުން ދިވެހިންނަށް ތަޖުރިބާކުރެވޭގޮތަށް ތަރައްޤީކުރި މި ޕާކު ފަރުމާ ކޮށްފައިވަނީ އޮލިމްޕިކް ފެންވަރުގެ އައިސް ސްކޭޓްކުރާ ރިންގަކާއި، އައިސް ސްލައިޑަކާއެކު ސްނޯގެ ކުޅިވަރުތައް ކުޅެވޭގޮތަށެވެ. ވިންޓަރ ޕާކް ހުޅުއްވައިދެއްވީ ރަސްރަނި ބަގީޗާގައި ބޭއްވި ޚާއްޞަ ރަސްމިއްޔާތެއްގައި ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމެވެ. ޕާކް ހުޅުވުމުގެ ރަސްމިއްޔާތުގައި އެކަމަނާއާއެކު ކުޑަކުދިންތަކެއް ބައިވެރިވިއެވެ. ޕާކް" ހުޅުއްވައިދެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން މިރޭ ވަނީ ޕާކް ބައްލަވާލައްވާފައެވެ. މިރަސްމިއްޔާތުގައި ވިންޓަރ ޕާކް ތެރޭގައި އައިސް ސްކޭޓިންގއާއި، ސްނޯގެ އެކިއެކި ޙަރަކާތްތައް ދައްކާލާލިއެވެ.،
ވިންޓަރ ޕާކް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވީ، މިޕާކަކީ ކުޑަކުދިންނާއި ޢާއިލާތައް ހިތްހަމަޖެހޭގޮތަށް ވަގުތު ހޭދަކުރެވޭނެ ފަދަގޮތަކައް ރާއްޖޭގައި އޮތް އެންމެ ފެންވަރު ރަނގަޅު ޕާކްކަމަށާއި، މިއީ މި ޞަރަޙައްދުގައިވެސް ފަހަގަކޮށްލެވޭ ތަނެއްކަމަށެވެ.
މީގެ ކުރިން ދިވެހިން އުއްމީދު ނުކުރާ އެތައްކަމެއް ރައީސް ތަރައްޤީކުރައްވަމުން ގެންދަވާކަން ފާހަގަކުރައްވާ މިނިސްޓަރ ވިދާޅުވީ، ރާއްޖެއަށް ބޮޑެތި އިންޤިލާބީ ބަދަލުތަކެއް އެމަނިކުފާނު ގެންވަމުން ގެންދަވާކަމަށެވެ.
ވިންޓަރ ތީމް ޕާކް ތަރައްޤީކުރުމުގައި ދުނިޔޭގެ ފެންވަރުގައި ފާހަގަކޮށްލެވޭ ތަނަކަށް ހެދުމުގެގޮތުން ޔޫރަޕުގެ ތަޖުރިބަކާރުން ޝާމިލުކޮށްފައިވާކަމަށްވެސް މިނިސްޓަރ ވިދާޅުވިއެވެ. އެގޮތުން މި ޕާކްގެ ވަޞީލަތްތައް ޑިޒައިންކޮށް އުފައްދާފައިވަނީ ފްރާންސާއި ޖަރުމަނުގެ އިންޖިނިއަރިންގެ ޓީމުންކަމަށާއި، މި ޕާކް ތަރައްޤީކޮށްފައިވަނީ އެތައް ދިރާސާތަކެއްކުރުމަށްފަހު ރާއްޖޭގެ މާޙައުލަށް އެންމެ އެކަށޭނަގޮތަށްކަމަށް މިނިސްޓަރ ވިދާޅުވިއެވެ. މިކަމުގައި އެމެރިކާގެ ޓެކްނޮލޮޖީވެސް ބޭނުންކޮށްފައިވާކަން މިނިސްޓަރ ފާހަގަކުރެއްވިއެވެ. އެގޮތުން ޕާކްގެ ޢިމާރާތް ފަރުމާކޮށްފައިވަނީ ރާއްޖެއަކީ ހޫނު ޤައުމަކަށް ވާތީ އެކަމަށް ވިސްނައިގެންކަމަށާއި، ޕާކް ވަށައިގެންވާ ފާރަކީ ގިނަ ފަށަލަތަކެއް ހިމެނޭ 8 އިންޗިއަށްވުރެ ބޯ ފާރެއް ކަން މިނިސްޓަރ ފާހަގަކުރެއްވިއެވެ. ރާއްޖޭގެ ފިނިހޫނުމިނަށް އެންމެ އެކަށޭނެގޮތަށް މިތަން ފަރުމާކޮށްފައިވަނީ ޖާގައިގެ ބޭނުން ވީހާވެސް ބޮޑަށް ބޭނުން ހިފޭގޮތަށެވެ.
ވިންޓަރ ޕާކުގެ މެއިންޓަނަންސް ބެލެހެއްޓުމަށް ދައުލަތުގެ ބަޖެޓުން އެއްވެސް ހޭދައެއް ކުރަން ނުޖެހޭކަމަށް ހައުސިންގެ މިނިސްޓަރ ވިދާޅުވިއެވެ. ތަން ހިންގާ އޮޕަރޭޓް ކުރުމަށް ބޮޑު ޚަރަދެއް ހިނގިނަމަވެސް، ދެމެހެއްޓެނިވިގޮތެއްގައި މިތަން ބަލަހައްޓާ ޚިދުމަތްދިނުމަށް ކުންފުންޏަކާ ޙަވާލުކޮށްފައިވާކަަމަށްވެސް ހައުސިން މިނިސްޓަރ ވިދާޅުވިއެވެ. އެ ކުންފުނިން ތަނުގެ ހުރިހާ ޚަރަދެއް ބެލެހެއްޓުމާއި ތަން ހިންގުމުގެ ހުރިހަ ކަމެއް ކުރިއަށްގެންދާނެކަމަށާއި، ކެފޭއަކާއެކު ޕްރޮފެޝަނަލްކޮށް ހިންގޭނެ އިންތިޒާމް ހަމަޖައްސާފައިވާކަމަށްވެސް މިނިސްޓަރ ވިދާޅުވިއެވެ.
ވިންޓަރ ޕާކް ވެގެންދާނީ ކުޑަކުދިން އުފަލާއެކު ތަފާތު އިހްސާސްކުރެވޭތަނަކަށްކަން ފާހަގކުރައްވާ މިނިސްޓާރ ވިދާޅުވީ، މިތަނުގައި ފްރާންސްގެ ތަޖުރިބާކާރު އައިސް ހޮކީގެ ޗެމްޕިއަންގެ ތަޖުރިބާކާރު ފަރާތަކުން ކުރިއަށްއޮތް ތިންމަސްދުވަހު ކުދިންނަށް މިކަމަށް ޚާއްޞަ ތަމްރީނުދިނުމަށް ހަމަޖެހިފައިވާކަމަށެވެ.
ވިންޓަރ ޕާކްގައި ޚިދުމަތް ދިނުމަށް ދެ ކައުންޓަރެއް ޤާއިމްކޮށްފައިވެއެވެ. އެގޮތުން ފުރަތަމަ ކައުންޓަރުން ޓިކެޓް ލިބޭނެ އިންތިޒާމު ހަމަޖައްސާފައިވާއިރު، ދެވަނަ ކައުންޓަރުން، ސްކޭޓް ކުރުމަށާއި އައިސް ސްލައިޑް ކުރުމަށް ބޭނުންވާ ވަޞީލަތްތައް ފޯރުކޮށްދޭނެއެވެ. އެގޮތުން އެކަމަށް ޚާއްޞަ ބޫޓާއި ޖެކެޓް އަދި އެނޫންވެސް ވަޞީލަތްތައް ފޯރުކޮށްދޭނެއެވެ.
މި ވިންޓަރ ޕާކްގައި އައިސް ސްކޭޓާއި ސްނޯގެ ތަޖުރިބާކުރި ކުދިންވަނީ މިއީ ރާއްޖޭގައި އެކުންދިނަށް ކުރެވޭ ވަރަށް ތަފާތު ތަޖުރިބާއެއްގެ ގޮތުގައި ސިފަކޮށްފައެވެ.
ވިންޓަރ ޕާކް ޢާންމުންނަށް ހުޅުވާލުމަށް ހަމަޖެހިފައިވަނީ އަންނަ ބުދަދުވަހުއެވެ. އެދުވަހުން ފެށިގެން ކިއުބީ ސިސްޓަމުގެ ތެރެއިންވެސް ޓޯކަން ނަމްބަރު ނަގައިގެން ޕާކަށް ވަނުމުގެ ފުރުޞަތު ޢާއްމުންނަށް ހުޅުވާލަން ހައުސިން މިނިސްޓްރީން ވަނީ ނިންމާފައެވެ.