ރެކޯޑް ޢަދަދަކަށް ޢާއްމު ރައްޔިތުން ނުކުމެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމުގެ ދެކަނބަލުންނާ ޢީދު ސަލާމް ސަލާމްކޮށްފިއެވެ. މިއީ ރާއްޖޭގެ ތާރީޚުގައި މިހާ ގިނަ ޢަދަދެއްގެ ޢާއްމު ރައްޔިތުން ޤައުމުގެ އެންމެ އިސްވެރިޔާއާ ޢީދު ސަލާމްކުރެއްވި ފުރަތަމަ ފަހަރުކަން ފާހަގަކޮށްލެވެއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ޢީދު ނަމާދުކުރެއްވީ މަސްޖިދުއް ސުލްޠާން މުޙައްމަދު ތަކުރުފާނު ޢައުޒަމްގައި ކުރި ޢީދު ނަމާދުގުގެ ޖަމާޢަތުގައެވެ. ޢީދު ނަމާދަށްފަހު ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އެމަނިކުފާނުގެ އަނިބިކަނބަލުން ފާޠިމަތު އިބްރާހީމް ޢީދު ސަލާމްކުރެއްވުން ކުރިއަށް ގެންދެވިއެވެ. މިއަހަރުގެ ފިޠުރު ޢީދު ސަލާމްކުރެއްވުން ކުރިއަށް ގެންދެވީ ރަސްރަނި ބަގީޗާގައެވެ. ރަސްރަނި ބަގީޗާ ވަނީ ޢީދު ދުވަހާ ގުޅޭގޮތަށް ވަރަށް ބޮޑަށް ޒީނަތްތެރިކޮށްފައެވެ. އަދި ޢީދު ސަލާމުގައި ބައިވެރިވި ފަރާތްތަކަށް ހަދިޔާ ބެހުމާއި، ތަފާތު ބުއިންތައްވެސް ލިބޭނެ އިންތިޒާމްތައް އެތަނުގައި ހަމަޖެހިފައި ހުރިކަން ފާހަގަކޮށްލެވެއެވެ.
ރައީސްގެ ދެކަނބަލުންނާއި ޢީދު ސަލާމްކުރަން ލިބުނު ފުރުސަތާއެކު ފެނިގެންދިޔައީ، ހެނދުނު ޢީދުނަމާދަށްފަހު ރަސްރަނި ބަގީޗާގެ ބޭރުގައި އެތައްސަތޭކަ ބަޔަކު ކިއު ހަދާލިތަނެވެ. ޢީދު ސަލާމްކުރުން އޮތީ ހެނދުނު 9:00 ގައި ކަމަށްވިޔަސް އޭގެ ބައިގަޑިއެއްހާއިރު ކުރިން މީހުން އެއްވެ އޮތީ ކިއުހަދާފައެވެ. އެއާއެކު ފެނުނީ ރެކޯޑް ޢަދަދަކަށް ޢާންމުން ނިކުމެ ރައީސްގެ ދެކަނބަލުންނާ ޢީދު ސަލަމްކުރިތަނެވެ. ދެގަޑިއިރާއި ވިހިމިނެޓަށް ދިގުދެމިގެންދިޔަ ޢީދު ސަލާމްކުރެއްވުމުގައި ގާތްގަނޑަކަށް ތިންހާހަށްވުރެ ގިނަ މީހުން ބައިވެރިވެފައިވެއެވެ. އެއީ ނިސްބަތުން މިނަޓަކު އެކަވީސް މީހުންނެވެ.
މިއީ ރާއްޖޭގެ ތަރީޚްގައިވެސް މިހާގިނަ ޢަދަދަކަށް ޢީދު ސަލާމުގައި ރައްޔިތުން ބައިވެރިވިފަހަރެވެ. މީހުން ގިނަކަމުން ގިނަ އިރުތަކެއްވަންދެން އެތައްބަޔަކު ކިއުގައި ތިބެގެންޖެހުނެވެ. އެހެންނަމަވެސް ރައީސްގެ ދެކަނބަލުންނާ ސަލާމް ކޮށްފައިނޫނީ ނުދާން އެތައް އިރެއްވަންދެން އެމީހުންތިއްބެވެ. ނަތީޖާއެއްގެ ގޮތުން ރައީސްގެ ދެކަނބަލުން ޢީދު ސަލާމްކުރައްވަން ކުރިން ކަނޑައަޅުއްވާފައި އޮތް ވަގުތު އިތުރު އެއްގަޑިއިރާއި ވިހި މިނެޓަށް އިތުރުކުރެއްވިއެވެ.
ރައީސްގެ ދެކަނބަލުންނާ ޢީދު ސަލާމްކުރަން ދިޔަ މީހުންގެތެރޭގައި އެކި ޢުމުރުގެ އެކި ފަންތީގެ މީހުން ހިމެނެއެވެ. ޢީދު ސަލާން ކުރުމަށް ރައީސުލްޖުމްހޫރިއްޔާގެ ދެކަނބަލުންގެ އަރިހަށް ވަޑައިގެންނެވި ބޭފުޅުންގެ ތެރޭގައި، ވަޒީރުންނާއި، އެފެންވަރުގެ ބޭފުޅުންނާއި، ރައްޔިތުންގެ މަޖިލީހުގެ ބައެއް މެންބަރުންނާއި، ސްޓޭޓް މިނިސްޓަރުންނާއި، ރާއްޖޭގައި ތިއްބެވި ބޭރު ދައުލަތްތަކުގެ ޢިއްޒަތްތެރިންނާއި، ސަރުކާރުގެ އޮފީސް އޮފީހުގެ ވެރިންނާއި، ރާއްޖޭގެ އެކި ދާއިރާތަކުގެ ބޭފުޅުންނާއި، ޢާންމުންގެ އެތައް ސަތޭކަ ބަޔަކު ހިމެނެއެވެ. އަދި ގިނަ ޢަދަދެއްގެ ކުޑަކުދިންނާއި ޚާއްޞަ އެހީއަށް ބޭނުންވާ މީހުންވެސް ޢީދު ސަލާމުގައި ބައިވެރިވެ ޢީދު ދުވަހުގެ ހެޔޮ އެދުމާއި ތަޙްނިޔާއާއި ރައީސްގެ ދެކނަބަލުންނަށް އަރިސްކުރިއެވެ.
ރަސްރަނި ބަގީޗާގައި ކުރިއަށްދިޔަ މި ޙަރަކާތުން ފެނުނީ ރައީސްގެ ދެކަނބަލުންނާއި ޢާއްމު ރައްޔިތުންނާ ވަރަށް ގާތް ގުޅުމެއް އޮތްތަނެވެ. ބައެއް މީހުން އުފާވެރިކަމުގެ ޝުޢޫރުފާޅުކޮށް، ސެލްފީނަގައި ރައީސް ދެކަނބަލުންނާއެކު ވަގުތުކޮޅެއް ހޭދަކޮށްފައިވާއިރު، ރައީސްގެ ދެކަނބަލުންގެ ފަރާތުންވެސް ފެނުނީ އުފާވެރިކަމެވެ.