ފިތުރު ޢީދު ދުވަހުގެ މުނާސަބަތުގައި ރައީސުލްޖުމްހޫރިއްޔާގެ ދެކަނބަލުން ބާއްވަވާ ޢީދު ސަލާމް ކުރެއްވުން ރަސްރަނި ބަގީޗާއި ބާއްވާގޮތަށް ހަމަޖައްސައިފިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާން އިބްރާހީމް މުޢާޒް ޢަލީ ކުރެއްވި ޓުވީޓެއްގައި ވިދާޅުވީ، ރައީސްގެ ދެކަނބަލުން ޢީދު ސަލާމް ކުރެއްވުން އޮންނާނީ ޢީދު ދުވަހުގެ ހެނދުނު 9 އަކުން 10 އަކަށް ރަސްރަނި ބަގީޗާގައިކަމަށެވެ. ހުރިހާ އުމުރުފުރާއެއްގެ ފަރާތްތަކާއި، އާއިލާއާއެކު ވީހާވެސް ގިނަ ކުޑަކުދިން ޢީދު ސަލާމުގައި ބައިވެރިވުމަށް ރައީސްގެ ދެކަނބަލުން ދަޢުވަތު އަރުވާފައިވާކަމަށްވެސް ތަރުޖަމާންގެ ޓުވީޓުގައި ވިދާޅުވެފައިވެއެވެ.
މީގެ ކުރިން ޢީދު ސަލާމް ކުރެއްވުން އާއްމުކޮށް ބާއްވަނީ އިސްލާމީ މަރުކަޒުގައެވެ. ފިތުރު ޢީދާއި، އަޟްހާ ޢީދާ ދިމާކޮށް ކޮންމެ އަހަރަކުވެސް ރައީސްގެ ދެކަނބަލުންނާއި ޢީދު ސަލާމް ކުރެއްވުން ބާއްވާއިރު، މިހަރަކާތުގައި ގިނަ އަދަދެއްގެ އާއްމުން ބައިވެރިވަމުންދާކަންވެސް ފާހަގަކޮށްލެވެއެވެ.
މީލާދީ ކަލަންޑަރު ދައްކާގޮތުން މިއަހަރުގެ ފިތުރު ޢީދު ދުވަހަކީ އަންނަ ހުކުރު ދުވަހެވެ.