ވޯލްޑް ކަޕަށް ތައްޔާރުވާ ޕޯޗުގަލްގެ ޓީމާ ކްރިސްޓިއާނޯ ރޮނާލްޑޯ ގުޅިއްޖެކަމަށާއި، އޭނާ އައުމުން ޓީމު މުޅީން ފުރިހަމަވެއްޖެކަމަށް ޕޯޗުގަލްގެ ކުޅުންތެރިން ބުނެފިއެވެ.
މިޑްފީލްޑަރު ޖޯ މޮޓީނިއޯ މިހެން ބުނީ ރަޝިޔާގައި ކުޅޭ މުބާރާތަށް އެންމެ 11 ދުވަހަށް ވެފައިވަނިކޮށް ރޮނާލްޑޯ ޓީމާ ގުޅުމުންނެވެ. އެހެން ކުޅުންތެރިންނަށްވުރެ ފަހުން ކެޕްޓަން ރޮނާލްޑޯ ޓީމާ ގުޅުނީ ކުރު ޗުއްޓީއެއްގައި ހުރުމުންނެވެ. އެއީ ޗެމްޕިއަންސް ލީގު ފައިނަލަށް އޭނާ ކުޅޭ ރެއާލް މެޑްރިޑް ދިއުމުން އެހެން ކުޅުންތެރިންނަށްވުރެ ފަހުން ސީޒަން ނިމުމުންނެވެ.
"ދުނިޔޭގެ އެންމެ މޮޅު ކުޅުންތެރިޔާ ޓީމާ ގުޅުމުން ޓީމުގެ ފެންވަރަށް ވަރަށް ބޮޑު ކުރިއެރުމެއް އަންނާނެ. އަހަރުމެން ޤަބޫލު ކުރާ ގޮތުގައި އޭނާ އައުމުން މި ޓީމު މުޅިން ފުރިހަމަވެއްޖެ. އަހަރުމެން ތައްޔާރުމިވަނީ ވަރަށް ޔަގީންކަމާއެކު،" 2016 ވަނަ އަހަރުގެ ޔޫރޯ ކާމިޔާބުކުރި ޕޯޗުގަލްގެ މިޑްފީލްޑަރު ބުންޏެވެ.
ވޯލްޑް ކަޕާ ކުރިމަތިލާއިރު ރޮނާލްޑޯގެ ކުރިމަގު އޮތީ ނޭނގުމެއްގެ ތެރޭގައެވެ. އުމުރުން މިހާރު 33 އަހަރުގެ ކުޅުންތެރިޔާ ރެއާލް ދޫކޮށްލަން ބޭނުންވާ ކަމަށް އަޑުފެތުރެމުންދާއިރު އޭނާ އަދި މިކަމާމެދު ވަކިއެއްޗެއް ނުބުނެ އެވެ.
"އަހަރުމެންނަށް ހިޔެއްނުވޭ ޓްރާންސްފާގެ ކަންތައްތަކާހުރެ އޭނާގެ ކުޅުމަށް އަސަރުކޮށްފާނެހެން. އެއަށްވުރެ ޕްރޮފެޝަނަލް ކުޅުންތެރިއެއް އޭނާއަކީ. މި ޓީމުގައި އޭނާ ހުރުމަކީ ވަރަށް ބޮޑު ތަފާތެއް އަންނާނެ ކަމެއް،" މޮޓީނިއޯ ބުންޏެވެ.
ވޯލްޑް ކަޕްގެ ކުރިން ޕޯޗުގަލް ކުޅޭނެ ހަމައެކަނި މެޗަކީ ބުރާސްފަތި ދުވަހު އަލްޖީރިއާ ދެކޮޅަށް ކުޅޭ މެޗެވެ. އެ މެޗުގައި ރޮނާލްޑޯ ކުޅޭނެއެވެ.