ކްރޮއޭޝިޔާ އަތުން ރޭ 2-0 ން ބްރެޒިލް މޮޅުވި މެޗުގައި ނޭމާ ސަންޓޯސް ޖެހި ގޯލާއެކު ބްރެޒިލްގެ ކޯޗު ޓިޓޭ ހިނިތުންވެއްޖެއެވެ.
މިއީ މިދިޔަ މާރޗު މަހު ފަޔަށް ލިބުނު އަނިޔާއަށް ފަހު ދުނިޔޭގެ އެންމެ އަގުބޮޑު ކުޅުންތެރިޔާ ކުޅުނު ފުރަތަމަ މެޗެވެ. މި މެޗުގެ ފަހު ހާފުގައި ކުޅެން ނުކުމެ އޭނާ މޮޅު ގޯލެއް ޖެހިއިރު، ބްރެޒިލްގެ ދެ ވަނަ ގޯލު ޖެހީ ފަހު މިނިޓްގައި ރޮބާޓޯ ފިރްމީނޯ އެވެ.
"އަހަރެން ބޭނުންވި މިންވަރަށްވުރެ އިތުރުވާ ވަރަށް އޭނާ ކުޅެފި. އޭނާ އަކީ ވަރަށް އާދަޔާ ހިލާފު ކުޅުންތެރިއެއް. އަހަރެން މިހުރީ ވަރަށް އުފަލުން އޭނާ ދެއްކި ކުޅުމުން. އެހާ ގިނަ ދުވަހު ނުކުޅެ ހުރެފައި އައިސް މިހާ މޮޅަށް ކުޅުމަކީ މާގިނަ ކުޅުންތެރިންނަށް ކުރެވޭ ކަމެއްނޫން،" މެޗަށް ފަހު ބްރެޒިލްގެ ކޯޗު ޓިޓޭ ބުންޏެވެ.
އިނގިރޭސިވިލާތުގެ ލިވަޕޫލްގައި ކުޅުނު މި މެޗުގެ ފުރަތަމަ ހާފުގައި ކްރޮއޭޝިޔާއިން ދެ ފުރުސަތެއް ތަނަވަސްކުރިއެވެ. ދެ ވަނަ ހާފުގައި ބްރެޒިލް މޮޅަށް ކުޅުނު މެޗުގައި ނޭމާ ގޯޅު ޖެހީ ފިލިޕް ކުޓީނިއޯ ތަނަވަސްކުރު ފުރުސަތެއްގައެވެ.
"މި ގޯލު އޭނާ ޖެހީ އަހަރުމެންގެ މުޅި ޓީމު ބައިވެރިވެގެން އުފެއްދި ހަމަލާއެއްގައި. އަހަރެން މިހުރީ އޭނާގެ ކޮމްބިނޭޝަންސްއާ މެދު ވަރަށް ބޮޑަށް ހިތްހަމަޖެހިފައި،" ކޯޗު ބުންޏެވެ.
މި މަހުގެ 14 ވަނަ ދުވަހު ރަޝިޔާގައި ފަށާ ވޯލްޑް ކަޕް ފުޓްބޯޅަ މުބާރާތުގައި ބްރެޒިލް ހިމެނެނީ ކޮސްޓަރިކާ އާއި ސްވިޒަލޭންޑް އަދި ސާބިއާއާ އެއް ގްރޫޕެއްގައެވެ. ކްރޮއޭޝިޔާ ހިމެނެނީ އާޖެންޓީނާ އާއި އައިސްލޭންޑް އަދި ނައިޖީރިއާއާ އެއް ގްރޫޕެއްގައެވެ.