ފަރަށް އެރި އީރާނުގެ ބޯޓުން މިހާތަނަށް 115 ކިލޯ ގްރާމްގެ މަސްތުވާތަކެތި ފެނިފައިވޭ - ފުލުހުން
ހއ.އިންނަފިނޮޅު ފަރަށް އެރި އީރާނުގެ ބޯޓުން މިހާތަނަށް 115 ކިލޯ ގްރާމްގެ މަސްތުވާތަކެތި ފެނިފައިވާކަމަށް ފުލުހުން ހާމަކޮށްފިއެވެ.
މިދިޔަ ބުރާސްފަތި ދުވަހު ރާއްޖޭގެ ކަނޑުގެ ސަރަޙައްދުން ޤަވާއިދާ ޚިލާފަށް ދަތުރުކުރަމުންދަނިކޮށް އިރާނުގެ ބޯޓެއް ފަރަށް އެރި މައްސަލައިގައި ފުލުހުންނާއި، އެމް.އެން.ޑީ.އެފް ގުޅިގެން ކުރިއަށްގެންދާ ޚާއްސަ އޮޕަރޭޝަނާއި ގުޅޭގޮތުން މަޢުލޫމާތު ދިނުމަށް މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ފުލުހުންގެ ތަރުޖަމާން އަޙްމަދު ޝިފާން ވިދާޅުވީ، ހއ.އިންނަފިނޮޅު ކައިރިން ފަރަށް އެރި އިރާނުގެ ބޯޓުގައި ޖުމްލަ 8 މީހުން ތިބިކަމަށެވެ.
އޭގެ ތެރޭގައި ޕާކިސްތާނުގެ ރައްޔިތަކާއި، އީރާނުގެ 7 ރައްޔިތުން ހިމެނޭކަމަށާއި، މި 8 މީހުންވެސް މިވަގުތު ތިބީ ފުލުހުންގެ ބެލުމުގެ ދަށުގައިކަމަށް ޝިފާން ވިދާޅުވިއެވެ. އަދި މިހާތަނަށް މި ބޯޓުން 115 ކިލޯ ގްރާމްގެ މަސްތުވާތަކެތި ފެނިފައިވާކަމަށާއި، މީގެ ތެރޭގައި ކައިރި ރަށްރަށަށް ލައްގާފައިވާ މަސްތުވާތަކެތި ހިމެނޭހެން ޖުމްލަ 14 ވައްތަރެއްގެ މަސްތުވާތަކެތި ފެނިފައިވާކަމަށެވެ. މިތަކެއްޗަކީ ސީދާ ރާއްޖޭގައި ވިއްކުމަށް ނުވަތަ ބޭނުންކުރުމަށް އެތެރެކުރި ތަކެތިކަން ފުލުހުންގެ ތަޙްޤީޤަށް ފާހަގަކުރެވިފައިނުވާކަމަށްވެސް ޝިފާން ވިދާޅުވިއެވެ.
މި ބައްދަލުވުމުގައި އެމް.އެން.ޑީ.އެފްގެ ފަރާތުން ވާހަކަދައްކަވަމުން ކޯސްޓްގާޑުގެ ޕްރިންސިޕަލް ޑިރެކްޓަރ ލެފްޓިނެންޓް ކާނަލް މުޙައްމަދު ސަލީމް ވިދާޅުވީ، އީރާނުގެ މި ބޯޓު ފަރަށް އަރައިގެން އުޅޭކަމުގެ މަޢުލޫމާތު ކޯސްޓްގާޑާއި ހިއްސާކޮށްފައިވަނީ މަސްވެރިންތަކެއްކަމަށާއި، އެ މަޢުލޫމާތު ލިބުމާއެކު އެމް.އެން.ޑީ.އެފްގެ ކޯސްޓްގާޑް ޓީމް އެ ސަރަޙައްދަށް ދިއުމުން ބޯޓުގައި ތިބި ފަޅުވެރިންގެ ފަރާތުން ފެނިގެންދިޔައީ ގަސްތުގައި ބޯޓުގައި އަލިފާން ރޯކޮށްލުމަށް މަސައްކަތް ކުރި މަންޒަރުކަމަށެވެ.
އަދި އެއަށްފަހު ލައިފް ޖެކެޓް އަޅައިގެން ފިލުމަށްޓަކާ މޫދަ އެ އެންމެންވެސް ފުއްމާލިކަން އޭނާ ފަހަގަކުރިއެވެ. ފަރަށް އެރި ބޯޓު މީގެ ކުރިންވެސް މަސްތުވާތަކެއްޗާއެކު ރާއްޖޭގެ ކަނޑުގެ ސަރަޙައްދުން ދަތުރުކޮށްފައިވާކަމަށް ބައެއް މީޑިއާތަކުގައި ރިޕޯޓްކޮށްފައިވާތީ، އެކަމަށް އިޝާރާތްކުރައްވާ ސަލީމް ވިދާޅުވީ، މި ބޯޓު މީގެ ކުރިން ރާއްޖޭގެ ކަނޑުގެ ސަރަޙައްދުން ޤަވާއިދާ އެއްގޮތަށް ނުވަތަ ޤަވާއިދާ ޚިލާފަށްވިޔަސް ދަތުރުކޮށްފައިވާކަމުގެ އެއްވެސް މަޢުލޫމާތެއް ކަމާބެހޭ ފަރާތްތަކުގެ ރިކޯޑްތަކުން ނުދައްކާކަމަށެވެ.
އީރާނުގެ ބޯޓުން ގިނަ ޢަދަދެއްގެ މަސްތުވާތަކެތި ނައްތާލުމަށް ކުރި މަސައްކަތުގެ ސަބަބުން، ހއ.އިންނަފިނޮޅު ހިމެނޭ ސަރަޙައްދުގެ ކައިރި ރަށްތަކަށް މަސްތުވާތަކެތީގެ ބާވަތްތައް އަދިވެސް ލެއްގުން އެކަށީގެންވާތީވެ، އެކަމަށް ސަމާލުވެ ތިބުމަށާއި، މަސްތުވާތަކެތިކަމަށް ޝައްކުކުރެވޭ ނުވަތަ އެބާވަތުގެ އެއްޗެއް ފެނިއްޖެނަމަ ލަސްނުކޮށް ކަމާބެހޭ ފަރާތްތަކަށް ރިޕޯޓް ކުރުމަށް ފުލުހުންނާއި ސިފައިން ވަނީ އާއްމުންގެ ކިބައިން އިލްތިމާސްކޮށްފައެވެ. އަދި މިކަމާގުޅިގެން ރާއްޖޭގެ ކަނޑުގެ ސަރަޙައްދު ބެލެހެއްޓުން އިތުރަށް ފުޅާކުރުމަށްޓަކާ ކައިރި ޤައުމުތަކުގެ އެހީތެރިކަމާއެކު މިހާރުވެސް ފިޔަވަޅުތަކެއް އަޅާފައިވާކަން އެފަރާތްތަކުން ފާހަގަކުރެއެވެ.