ހުޅުމާލޭ 2 ވަނަ ފިޔަވަހީގައި ތަރައްޤީކުރާ 7000 ހައުސިންގ ޔުނިޓަށް ބޭނުންވާ ފައުންޑޭޝަންގެ މަސައްކަތް ނިމި، ޓަވަރުތަކުގެ ސްޓްރަކްޗަރ އިމާރާތްކުރުމުގެ މަސައްކަތް މިހާރު ފަށާފައިވާކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން ބުނެފިއެވެ. ސަރުކާރުން އިޢުލާންކޮށްފައިވާ ހިޔާ މަޝްރޫޢުގެ ދަށުން، ތަރައްޤީކުރާ 25 ބުރީގެ މި 16 ޓަވަރުގެ ޢަމަލީ މަސައްކަތް ހަވާލުކޮށްފައިވަނީ ޗައިނާގެ ކުންފުންޏަކާއެވެ.
ހުޅުމާލޭ 2 ވަނަ ފިޔަވަހި ތަރައްޤީކުރުމުގެ މަޝްރޫޢަކީ މާލޭ ސަރަޙައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ގެނެސްދީ، މާލޭގެ ތޮއްޖެހުން ކުޑަކުރުމަށްޓަކާ ސަރުކާރުން ކުރިއަށްގެންދާ އެންމެ ބިޔަ މަޝްރޫއެވެ. ޒުވާނުންގެ އުއްމީދުތަކާ ގުޅިފައިވާ، ޒުވާނުން ޝަހަރުގެ ގޮތުގައި ތަރައްޤީކުރާ މިތަނަކީ ދުނިޔޭގެ އެންމެ ކުރިއަރާފައިވާ ސިޓީތަކާ ދާދި އެއް ކޮންސެޕްޓަކަށް، އެންމެފަހުގެ ޒަމާނީ ޚިދުމަތްތަކާއެކު ތަރައްޤީކުރަމުން އަންނަ ތަނެކެވެ. ޒުވާނުންގެ ސިޓީގެ ގޮތުގައި ހުޅުމާލޭ ދެވަނަ ފިޔަވަހި ތަރައްޤީކުރުމުގެ މަސައްކަތް ސަރުކާރުން ކުރަމުންދާއިރު، މިވަގުތު އެންމެ ހަލުވިކޮށް ކުރިއަށްދާ އެއް މަޝްރޫޢަކީ 7000 ސޯޝަލް ހައުސިންގ ޔުނިޓް ތަރައްޤީކުރުމުގެ މަޝްރޫޢެވެ. 25 ބުރީގެ 16 ޓަވަރުގެ މައްޗަށް އެކުލެވޭ މި 7000 ހައުސިންގ ޔުނިޓަކީ ސަރުކާރުން އިޢުލާންކޮށްފައިވާ ބޯހިޔާވަހިކަމުގެ އެންމެ ބިޔަ މަޝްރޫޢުކަމުގައިވާ ހިޔާ މަޝްރޫޢުގެ ދަށުން ކުރިއަށްގެންދާ މަސައްކަތެކެވެ. މިއީ ޗައިނާގެ އެންމެ ބޮޑު ކޮންސްޓްރަކްޝަން ކުންފުނިކަމަށްވާ ޗައިނާ ސްޓޭޓް ކޮންސްޓަރަކްޝަން އިންޖިނިއަރިންގ ކޯރޕަރޭޝަނާއި ހަވާލުކޮށްގެން ކުރިއަށްގެންދާ މަޝްރޫޢެކެވެ.
މި 7000 ހައުސިންގ ޔުނިޓްގެ ޢަމަލީ މަސައްކަތާއި ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން އެޗްޑީސީގެ މެނޭޖިންގ ޑިރެކްޓަރ މުޙައްމަދު ސައިމަން ވިދާޅުވީ، މި 7000 ހައުސިންގ ޔުނިޓު އިމާރާތްކުރުމަށް ބޭނުންވާ ސައިޓް މޮބިލައިޒްކޮށް، ކޮންސްޓްރަކްޝަނަށް ބޭނުންވާ ސާމާނު މިހާރު ރާއްޖެ ގެނެސްފައިވާކަމަށެވެ. އަދި މި 16 ޓަވަރުގެ ފައުންޑޭޝަން އެޅުމަށް ބޭނުންވާ ޝީޓް ޕައިލް ކުރުމުގެ ހުރިހާ މަސައްކަތެއް ނިމިފައިވާކަމަށާއި، ގިނަ ޓަވަރުތަކަށް ބޭނުންވާ ފައުންޑޭޝަންގެ މަސައްކަތްވެސް މިހާރު ނިމި، ޓަވަރުތަކުގެ ސްޓްރަކްޗަރ އިމާރާތްކުރުމުގެ މަސައްކަތް ބާރަށް ކުރިއަށްދާކަން ސައިމަން ފާހަގަކުރެއްވިއެވެ.
ހައުސިންގ ޔުނިޓްތަކުގެ ޢަމަލީ މަސައްކަތް ކުރިއަށްދާއިރު، ހުޅުމާލޭ ދެވަނަ ފިޔަވައްސަށް ބޭނުންވާ މަގުހެދުމާއި، ފެނާއި ނަރުދަމާ ނިޒާމް ޤާއިމުކުރުމުގެ މަސައްކަތްވެސް ހުއްޓުމެއްނެތި ދަނީ ކުރަމުންނެވެ. އެގޮތުން ދެވަނަ ފިޔަވަހީގެ ހުރިހާ ބޮޑެތި މަގުތަކެއްގައި ތާރު އަޅާ ނިމި، ޓްރެފިކް ސައިންތައްވެސް މިހާރު ވަނީ ހަރުކޮށް ނިންމާފައެވެ. މި 7000 ހައުސިންގ ޔުނިޓްގެ މަސައްކަތް ނިމޭއިރު، އެތަންތަނަށް ބޭނުންވާ ކޮމާޝަލް ސްޕޭސްއާއި، ޕާކިން އޭރިއާއި އަދި މި ނޫނަސް އާންމު ރައްޔިތުންނަށް ބޭނުންވާނެ ތަފާތު ވަސީލަތްތައް ޤާއިމުވެގެންދާނެކަމަށް އެޗް.ޑީ.ސީން ބުނެއެވެ.
މި 7000 ހައުސިންގ ޔުނިޓްގެ އިތުރުން، ހިޔާ މަޝްރޫޢުގެ ދަށުން ދަޢުލަތުގެ މުއައްސަސާތަކާއި، ސަރުކާރު ކުންފުނިތަކުގެ ބައިވެރިވުމާއެކު ގިނަ އަދަދެއްގެ ހައުސިންގ ޔުނިޓްތައް ތަރައްޤީކުރުމުގެ މަސައްކަތް މިހާރުވެސް އަންނަނީ ކުރަމުންނެވެ. މިއާއެކު ހުޅުމާލޭ ދެވަނަ ފިޔަވަހީގައި މިއަހަރުގެ ނިޔަލަށް މީހުން އާބާދުކުރަން ފެށުމަކީ އަމާޒެއްކަމަށް އެޗްޑީސީން ބުނެއެވެ.