ހިޔާ މަޝްރޫގެ ފޯމްތައް ބަލައިގަތުން އަންނަ އާދިއްތަ ދުވަހު، އިންތިޒާމްތައް ވަރަށް ލުއިފަސޭހަވާނެ - ހައުސިންގ މިނިސްޓްރީ

ސަރުކާރުން ކުރިއަށްގެންދާ ބޯހިޔާވެހިކަމުގެ ބިޔަ މަޝްރޫޢު "ހިޔާ"ގެ ފްލެޓްތަކަށްއެދި ހުށަހަޅާ ފޯމުތައް އަންނަ އާދިއްތަ ދުވަހު ބަލައިގަންނަން ފަށާއިރު ފޯމު ހުށަހެޅުމުގައި ލުއިފަސޭހަ ގޮތްތަކެއް ހަމަޖައްސާފައިވާނެކަމަށް ހައުސިން މިނިސްޓްރީން ބުނެފިއެވެ.

މި މަޝްރޫޢުގެ ދަށުން ސަރުކާރުން މިހާރުވެސް އަންނަނީ ހުޅުމާލޭ 2 ވަނަ ފިޔަވަހީގައި 7000 ހައުސިންގ ޔުނިޓް ތަރައްޤީކުރުމުގެ މަސައްކަތް ހަލުވި ދުވެއްޔެއްގައި ކުރަމުންނެވެ. މި ހައުސިންގ ޔުނިޓްތަކަށް ފޯމް ހުށަހެޅުމަށްޓަކައި ކިޔުގައި ނުޖެހި ފޯމު ހުށަހެޅޭނެގޮތަށް ކައުންޓަރުތައް އިތުރުކޮށް، ކިޔުބީ ސިސްޓަމް މެދުވެރިކޮށްވެސް ޓޯކަން ނެގޭނެ އިންތިޒާމް ހަމަޖެހިފައިވާކަމަށް ހައުސިންގ މިނިސްޓްރީން ބުނެއެވެ.

ރާއްޖޭގެ ތާރީޚުގައި ކުރިއަށްގެންދާ ބޯހިޔާވަހިކަމުގެ އެންމެ ބިޔަ މަޝްރޫޢު "ހިޔާ" މަޝްރޫޢުގެ ފްލެޓްތަކަށް ފޯމް ދޫރަން ފަށާފައިވަނީ މެއި މަހުގެ 6 ވަނަ ދުވަހު ދަރުބާރުގޭގައި މިކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. މެއި މަހުގެ ނިޔަލަށް ދަރުބާރުގެއިން 40،000 އަށްވުރެ ގިނަ ފޯމު ދޫކޮށްފައިވާކަމަށް ހައުސިން މިނިސްޓްރީން ބުނެއެވެ. މީގެ އިތުރުން އޮންލައިންކޮށްވެސް ގިނަ ޢަދަދެއްގެ ފޯމު ޑައުންލޯޑްކޮށްފައިވާކަމަށްވެސް އެ މިނިސްޓްރީން މަޢުލޫމާތުދެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން ހައުސިން މިނިސްޓްރީގެ ޑެޕިއުޓީ މިނިސްޓަރ އިބްރާހިމް ނަޒީމް ވިދާޅުވީ، އަންނަ އާދިއްތަ ދުވަހު ފޯމުތައް ބަލައިގަންނަން ފަށާއިރު ޢާންމުންނަށް ވީހާވެސް ފަސޭހަވާނޭހެން، ކިޔުގައި ނުޖެހި ފޯމު ލެވޭނެ އިންތިޒާމް އެ މިނިސްޓްރީން ހަމަޖައްސާފައިވާނެވެ. އެގޮތުން ކިޔުބީ މެދުވެރިކޮށް ޓޯކަން ނެގޭނެ އިންތިޒާމް ހަމަޖައްސާފައިވާކަން އޭނާ ފާހަގަކުރެއްވިއެވެ. އަދި މީގެ ސަބަބުން އޮންލައިންކޮށް ޓޯކަން ނަންބަރު ބަލާ، އެމީހެއްގެ ނަންބަރުގެ ކުރިއަށް އޮތީ ކިތައް ނަންބަރުކަން ޗެކްކޮށްލެވޭނެކަމަށްވެސް އޭނާ ވިދާޅުވިއެވެ.

ފޯމު ބަލައިގަތުމަށް ދަރުބާރުގޭގައި 21 ކައުންޓަރު ބަހައްޓާފައި ހުންނާނެކަމަށާއި، އެންމެ ބާރުބޮޑު 4 ކެޓަގަރީއަށް ޚާއްސަކޮށްގެން ކޮންމެ ކެޓަގަރީއަކަށް 3 ކައުންޓަރު ހުންނާނެކަމަށްވެސް ހައުސިން މިނިސްޓްރީގެ ޑެޕިއުޓީ މިނިސްޓަރ އިބްރާހީމް ނަޒީމް ވިދާޅުވިއެވެ.

"މުޅިޖުމްލަ 21 ކައުންޓަރެއް ބަހައްޓައިގެން ކުރިއަށްގެންދަން މިހާރު ރޭވިފައިމިވަނީ. ފޯމު ދޫކުރިއިރު އަޅުގަނޑުމެންނަށް ލިބުނު މަޢުލޫމާތުގެ އަލީގައި އެންމެ ބާރުބޮޑުކޮށް މިދާ ކެޓަގަރީ އަޅުގަނޑުމެންނަށް މިފާހަގަކުރެވޭ 4 ކެޓަގަރީއެއް. އެ 4 ގެޓަގަރީއަށް ޚިދުމަތްދޭން އަޅުގަނޑުމެން ކެޓަގަރީއަކަށް 4 ކައުންޓަރު ބަހައްޓަން މިހާރު އަޅުގަނޑުމެން ނިންމާފަ މިވަނީ. ފޯމު ހުށައަޅަން ވަޑައިގަތުމުގެ ކުރިން ކިޔުބީ ތުރޫކޮށް ޓޯކަން ނަންބަރެއް ނެންގެވޭނެ އިނގޭތޯ؟ ލިބިވަޑައިގަންނަވާ ފަސޭހައަކީ އެބޭފުޅާގެ ނަންބަރު ޖެހުމުގެ ކުރިއަށް ކިތައް ބޭފުޅުން އެބަ ތިބިކަމާ މިކަންކަން އެނގިވަޑައިގަންނަވާނެ. އެއްގޮތަކަށްވެސް، ގޮސް މާދުރާލައި ކިޔުހައްދަވައިގެން އެތާ ތިއްބަވާކަށް ޖެހިވަޑައި ނުގަންނަވާނެ" އިބްރާހިމް ނަޒީމް ވިދާޅުވިއެވެ.

ހިޔާ މަޝްރޫޢުގެ ދަށުން ފްލެޓްތަށް ދޫކުރުމަށް ހަމަޖެހިފައިވަނީ 12 ކެޓަގަރީއަކަށް ބަހާލައިގެންނެވެ. މީގެ ތެރޭގައި ހިމެނެނީ، ސިވިލް ސާރވިސް މުވައްޒަފުންނަށް 1000 ފްލެޓް، އުމުރުން 18- 40 ދެމުދު ކައވެނިކޮށްގެން އުޅޭ މީހުންނަށް 1000 ފްލެޓް، ދަފްތަރުގައި ނުހިމެނޭ މާލޭ ރަށްވެހިންނަށް 1000 ފްލެޓް، މާލޭ މުނިސިޕަލްޓީގެ ޚާއްޞަ ދަފްތަރުގައި ހިމެނޭ މީހުންނަށް 1044 ފްލެޓް، ޑޮކްޓަރުންނާއި ނަރުހުންނަށް 475 ފްލެޓް، ޓީޗަރުންނަށް 625 ފްލެޓް، އެކަނިވެރި މައިންނާއި ބަފައިންނަށް 500 ފްލެޓް، ނުކުޅެދުންތެރިކަން ހުންނަ ފަރާތްތަކާއި އައިލާތަކަށް 200 ފްލެޓް، ގުޅިފަޅާއި ޓާޓާ ފްލެޓްތަކަށް ފައިސާ ނުދެއްކުނު ފަރާތަކަށް 300 ފްލެޓް، ސިފައިންނާއި ފުލުހުންނަށް 600 ފްލެޓް އަދި މާފަންނު ހުޅަނގު ދާއިރާ އަށް ނިސްބަތްވާ ވަރަށް ދަތިހާލުގައި އުޅޭ ގޭބިސީތަކަށް ދޫކުރާ 256 ފްލެޓެވެ.

ހުޅުމާލޭ 2 ވަނަ ފިޔަވަހީގައި ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުގެ ދަށުން 1 ލައްކައަށްވުރެ ގިނަ މީހުންންގެ އާބާދީއަކަށް ގެދޮރުވެރިކަން ޔަޤީންވެގެންދާނެކަމަށް ސަރުކާރުން ބުނެއެވެ.

ދައުލަތުގެ ކުންފުނިތަކާ ގުޅިގެން ކުރިއަށްގެންދާ "ހިޔާ" މަޝްރޫޢުގެ ފްލެޓްތައް އެޅުމުގެ މަސައްކަތް ހުޅުމާލޭ ދެވަނަ ފިޔަވަހީގައި ވަނީ ފަށާފައެވެ. އެގޮތުން މި މަޝްރޫޢުގެ ދަށުން 25 ބުރީގެ ޢިމާރާތްތައް ހިމެނޭގޮތުން 15 ބުއިއަށްވުރެ އުސް 62 ޓަވަރު އެޅުމަށް ހަމަޖެހިފައިވާކަމަށް ސަރުކާރުން ވަނީ ހާމަކޮށްފައެވެ.